യുഎഇയിലേക്കു പുറപ്പെടുന്ന താമസവീസക്കാര്‍ യാത്രയ്ക്ക് മുന്‍പ് വെബ്‌സൈറ്റില്‍ രജിസ്റ്റര്‍ ചെയ്ത് അനുമതി നേടണമെന്ന ചട്ടം കര്‍ശനമാക്കി. ദുബായ് വിമാനത്താവളത്തിലെത്തുന്ന ദുബായ് വീസക്കാര്‍ smart.gdrfa.gov.ae എന്ന സൈറ്റിലും മറ്റ് എമിറേറ്റുകളിലെ താമസ വീസക്കാര്‍ ഫെഡറല്‍ അതോറിറ്റിയുടെ uaeentry.ica.gov.ae എന്ന സൈറ്റിലുമാണ് രജിസ്റ്റര്‍ ചെയ്യേണ്ടത്.

അബുദാബി വീസക്കാര്‍ ഫെഡറല്‍ അതോറിറ്റി ഫോര്‍ ഐഡന്റിറ്റി ആന്‍ഡ് സിറ്റിസന്‍ഷിപ് (ഐസിഎ) അനുമതിയില്ലാതെ ദുബായ് വിമാനത്താവളത്തില്‍ ഇറങ്ങുന്നത് കഴിഞ്ഞദിവസം തടഞ്ഞിരുന്നു.

വളരെ വൈകി ബസുകളിലാണ് ഇങ്ങനെ കുടുങ്ങിയ നാനൂറോളം പേരെ അബുദാബിയില്‍ എത്തിച്ചത്. തുടര്‍ന്ന്, ഐസിഎ അനുമതി ഇല്ലാത്ത അബുദാബി യാത്രക്കാരെ തല്‍ക്കാലം ദുബായിലേക്കു യാത്രചെയ്യാന്‍ അനുവദിക്കുന്നില്ലെന്നു വിമാനക്കമ്പനികളും വ്യക്തമാക്കി.

അബുദാബിയിലേക്ക് നേരിട്ടുള്ള വിമാനങ്ങള്‍ കുറവായതിനാലും ഐസിഎ അനുമതി നേടുക പ്രയാസമായതിനാലുമാണ് പലരും ദുബായില്‍ ഇറങ്ങിയ ശേഷം അബുദാബിയിലേക്കു പോയിരുന്നത്.