പാക്കിസ്ഥാനില് സൈനിക ഹെലികോപ്ടര് തകര്ന്ന് വിദേശ അംബാസഡര്മാരടക്കം ആറു പേര് കൊല്ലപ്പെട്ടു; ഹെലികോപ്ടര് തകര്ത്തതിന്റെ ഉത്തരവാദിത്വം താലിബാന് ഏറ്റെടുത്തു
പാക്കിസ്ഥാനില് സൈനിക ഹെലികോപ്ടര് തകര്ന്നുവീണ് വിദേശ അംബാസഡര്മാരടക്കം ആറു പേര് കൊല്ലപ്പെട്ടു. നോര്വീജിയന്, ഫിലിപ്പിന്സ് അംബാസിഡര്മാര് ഉള്പ്പെടെയുള്ളവരാണ് കൊല്ലപ്പെട്ടത്. അതിനിടെ ഹെലികോപ്ടര് തകര്ത്തത് തങ്ങളാണെന്ന അവകാശവാദവുമായി താലിബാന് രംഗത്തെത്തി.
നോര്വീജിയന് അംബാസിഡര് ലീഫ് എല് ലാര്സെന്, ഫിലിപ്പിന്സ് അംബാസിഡര് ഡോമിംഗോ ഡി ലുസെനാരിയോ ജൂനിയര് എന്നിവര്ക്കൊപ്പം മലേഷ്യന്, ഇന്തോനേഷ്യന് അംബാസിഡര്മാരുടെ ഭാര്യമാരും രണ്ട് ഹെലികോപ്ടര് പൈലറ്റുമാരുമാണ് അപകടത്തില് കൊല്ലപ്പെട്ടത്.
വടക്കന് പാക്കിസ്ഥാനിലെ നള്ട്ടാര് താഴ്വരയിലുള്ള സ്കൂളിനുമുകളിലാണ് ഹെലികോപ്ടര് തകര്ന്നുവീണതെന്ന് പാക് സൈനിക അധികൃതര് ട്വിറ്ററിലൂടെ അറിയിച്ചു. അടിയന്തര ലാന്ഡിങ്ങിന് ശ്രമിക്കവെയാണ് വിമാനം തകര്ന്നുവീണതെന്നാണ് ആദ്യ റിപ്പോര്ട്ടുകള് പുറത്തുവന്നത്. സാങ്കേതിക തകരാര് മൂലമാണ് വിമാനം തകര്ന്നതെന്ന് ദൃക്സാക്ഷികളെ ഉദ്ധരിച്ച് അല് ജസീറയും റിപ്പോര്ട്ട് ചെയ്തു. ഇസ്ലാമാബാദില് നിന്നും 300 കിലോമീറ്റര് അകലെയാണ് അപകടം നടന്ന സ്ഥലം.
ഇതിനിടെയാണ് ഹെലികോപ്ടര് തകര്ത്തത് തങ്ങളാണെന്ന അവകാശ വാദവുമായി പാക് താലിബാന് രംഗത്തെത്തിയത്. പാക് പ്രധാനമന്ത്രി നവാസ് ഷെരീഫ് ആയിരുന്നു ലക്ഷ്യമെന്നും പാക് താലിബാന് വക്താവ് മുഹമ്മദ് ഖൊറസാനിയാണ് അവകാശപ്പെട്ടു. എന്നാല് ഇതുസംബന്ധിച്ച് സൈനിക അധികൃതരുടെ ഭാഗത്തുനിന്ന് ഔദ്യോഗിക പ്രതികരണം ഉണ്ടായിട്ടില്ല.
പാക്കിസ്ഥാനിലെ ഗില്ഗിത് ബാലിസ്താന് പ്രദേശത്തേക്ക് നയതന്ത്ര പ്രതിനിധികളെ വഹിച്ചുകൊണ്ടുപോകുകയായിരുന്ന ഹെലികോപ്ടറാണ് തകര്ന്നുവീണത്. ഹെലികോപ്ടറില് 11 വിദേശ നയതന്ത്രപ്രതിനിധികള് അടക്കം 17 പേരാണ് ഉണ്ടായിരുന്നത്. ഹിമാലയന്, കാരകോറം, ഹിന്ദു കുഷ് മലനിരകള് ഒന്നിക്കുന്ന പാക്കിസ്ഥാന്റെ വടക്കേ അറ്റത്തുള്ള പ്രദേശമാണ് ഗില്ഗിത് ബാലിസ്താന്.
ഹെലികോപ്ടര് തകര്ന്നുവീണതിനെ തുടര്ന്ന് സ്കൂളില് തീപിടിച്ചു. ഗില്ജിറ്റ് ജില്ലയിലെ സൈനിക സ്കൂളില് കെട്ടിടത്തിനു മുകളില് ഹെലികോപ്റ്റര് തകര്ന്നു വീഴുകയായിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
