റൊമാനിയയിലെ പിയത്ര നീമിലെ പെട്രോഡാവ ഡേസിയന്‍ കോട്ടയ്ക്ക് തൊട്ടരികിലായി അന്യഗ്രഹ ജീവികള്‍ സ്ഥാപിച്ചെന്നു കരുതുന്നു ഫലകം കണ്ടെത്തുകയുണ്ടായി. പതിമൂന്നടി ഉയരത്തില്‍ ത്രികോണാകൃതിയുളള ഫലകമാണ് ഇപ്പോൾ കണ്ടെത്തിയത്. ഭൂമിയില്‍ ഉറപ്പിച്ച നിലയിലുളള തിളക്കമാര്‍ന്ന ഏതോ ലോഹം കൊണ്ടുണ്ടാക്കിയ സ്തംഭത്തില്‍ കുറിപ്പുകള്‍ക്ക് സമാനമായ ചിലത് കാണുകയും ചെയ്യുന്നുണ്ട് എന്നാണ് റിപ്പോര്‍ട്ടുകൾ വ്യക്തമാക്കിയത്. വിജനമായ സ്ഥലത്തെത്തിയ ചിലരാണ് ഈ ഫലകം കണ്ടത്. ഇതിനുപിന്നാലെ ഭൂമിയുടെ നിയന്ത്രണം കൈക്കലാക്കുന്ന അന്യഗ്രഹ ജീവികള്‍ മനുഷ്യനെ അടിമകളാക്കുന്ന കാലം അടുത്തിരിക്കുന്നു എന്നവിധത്തിലുള്ള ചർച്ചകൾ പുരോഗമിക്കുകയാണ്.

അതേസമയം ഇത്തരത്തിലൊരു ഫലകം നേരത്തേ അമേരിക്കയിലെ തെക്കന്‍ യൂറ്റായിലെ മരുഭൂമിയില്‍ കണ്ടെത്തിയിരുന്നു. റൊമാനിയയില്‍ കണ്ടെത്തിയ ഫലകത്തിന് ഇതില്‍ നിന്ന് ചില വ്യത്യാസങ്ങള്‍ കണ്ടെത്തിയിരുന്നു. ആദ്യത്തെ ഫലകം പോലെ ഇതും അന്യഗ്രഹജീവികള്‍ സ്ഥാപിച്ചതാണെന്നാണ് അന്യഗ്രഹ ജീവികളില്‍ വിശ്വസിക്കുന്നവര്‍ വ്യക്തമാക്കുന്നത്. അന്യഗ്രഹ ജീവികളല്ലാതെ ആരും ആളൊഴിഞ്ഞ സ്ഥലത്ത് ഇത്തരത്തിൽ ഫലകം സ്ഥാപിക്കില്ല എന്നും അവര്‍ പറയുന്നു. അമേരിക്കയിലെ ഫലകം കാണാതായതിന് തൊട്ടടുത്ത ദിവസമാണ് റൊമാനിയയിൽ ഫലകം കണ്ടെത്തിയിരിക്കുന്നത. ഇക്കാര്യത്തിൽ സത്യാവസ്ഥ എന്താണെന്ന് ഇപ്പോഴും വ്യക്തമല്ല.

അമേരിക്കയിലെ മരുഭൂമിയിലെ ചുവന്ന പാറക്കെട്ടുകള്‍ക്ക് സമീപത്ത് മണ്ണില്‍ നിന്ന് 12 അടി ഉയരത്തിലാണ് ആദ്യത്തെ ഫലകം കണ്ടെത്തിയിരുന്നത്. ഈ ഫലകത്തിനും ത്രികോണാകൃതിയാണ് ഉള്ളത്. ഹെലികോപ്ടര്‍ വഴി ചെമ്മരിയാടുകളുടെ സര്‍വേ നടത്തിക്കൊണ്ടിരുന്ന ഉദ്യോഗസ്ഥരാണ് ആദ്യത്തെ ഫലകം കണ്ടെത്തിയത്. ശാസ്ത്രജ്ഞര്‍ ഇതിനെക്കുറിച്ച്‌ പരിശോധിച്ചെങ്കിലും കൂടുതല്‍ കാര്യങ്ങളൊന്നും തന്നെ  പുറത്തുവിട്ടിരുന്നില്ല. സുരക്ഷാ കാരണങ്ങള്‍ മുന്‍നിർത്തിയാണ് ഇതെന്നാണ് വിശദീകരണം. സ്റ്റാന്‍ലി കുബ്രിക് സംവിധാനം ചെയ്ത പ്രശസ്ത ഹോളിവുഡ് ചിത്രം ' 2001 : എ സ്‌പേസ് ഒഡീസിയില്‍ ' ഇതുപോലൊരു സ്തംഭത്തെക്കുറിച്ച് പരാമർശിച്ചിട്ടുണ്ട്. ചിത്രത്തില്‍ അന്യഗ്രഹ ജീവികളാണ് ഈ സ്തംഭം നിര്‍മിച്ചിരിക്കുന്നത് എന്നും ഉണ്ട്. അതുകൊണ്ട് തന്നെ ചിത്രത്തിന്റെ ആരാധകരില്‍ ആരെങ്കിലും നിര്‍മിച്ച്‌ മരുഭൂമിയില്‍ സ്ഥാപിച്ചതാകാന്‍ ഇടയുണ്ടെന്നാണ് അന്ന് ചില ഗവേഷകര്‍ വ്യക്തമാക്കിയത്.