തായ്‍‍വാനിലെ മീൻപിടിത്തം ഒരു രക്ഷയില്ല .ഇങ്ങനെയും മീൻ പിടിക്കാനാകുമോ എന്ന് ആരും ചോദിച്ച് പോകുകയാണ് ഇത് കണ്ടിട്ട് . വിനോദസഞ്ചാരികളുടെ തിരക്കേറിയ സന്ദര്‍ശനകേന്ദ്രമാണ് ഇവിടം. ഒറ്റനോട്ടത്തിൽ മീൻപിടിക്കുന്നയിടം കണ്ടാൽ കല്ലുകൊണ്ട് രണ്ട് ഹൃദയാകൃതി ഉണ്ടാക്കിവച്ചിരിക്കുന്നതുപോലെയാണ് . മീന്‍പിടിക്കുന്നതിനുള്ള പുരാതനമായൊരു വിദ്യയാണ് ഇത് . മത്സ്യബന്ധനത്തിന്റെ ഈ കാഴ്ച കാണാനായി നിരവധി വിനോദസഞ്ചാരികള്‍ ഇവിടെയെത്തുന്നു . ഫോട്ടോഗ്രാഫര്‍മാരായ സഞ്ചാരികള്‍ക്ക് ചിത്രങ്ങളെടുക്കാന്‍ കിടിലൻ സ്ഥലം.

തെക്കന്‍ പസഫിക് ദ്വീപുകള്‍, പസഫിക് സമുദ്രത്തിന്റെ തീരത്തുള്ള ഏഷ്യന്‍ രാജ്യങ്ങള്‍, ഫിന്‍ലാന്‍ഡ്, ഓസ്ട്രേലിയ എന്നിവിടങ്ങളില്‍ ഇത്തരത്തില്‍ മീൻപിടിക്കുന്ന രീതി നടത്തിയിരുന്നുവെന്നു പഠനങ്ങള്‍ സൂചിപ്പിക്കുന്നു. തായ്‌‌വാനിലെ പടിഞ്ഞാറ് ഭാഗത്തുള്ള പെന്‍ഗു ദ്വീപസമൂഹത്തില്‍, കഴിഞ്ഞ 700 വര്‍ഷമായി പ്രാദേശിക മത്സ്യത്തൊഴിലാളികള്‍ കല്ലുകള്‍ അടുക്കി വച്ച് ഒരു പ്രത്യേകരീതിയിലുള്ള ചിറകെട്ടിയാണ് മീന്‍പിടിക്കുന്നത്. കല്ലുകൾക്കിടയിൽ മീൻ കുടുങ്ങിയാൽ അവയ്ക്ക് അതിൽ നിന്നും നീന്തിമാറാനും സാധിക്കില്ല.  570 ലധികം മീൻപിടിക്കുന്ന കല്ല് നിറഞ്ഞയിടം പെന്‍ഗുവിലുണ്ട്. ഒരു കാലത്ത് പെന്‍ഗുവിലെ മത്സ്യത്തൊഴിലാളികളുടെ സമ്പദ്‌‌വ്യവസ്ഥയുടെ ഒരു പ്രധാന ഉറവിടമായിരുന്നു ഈ കല്ലുകൊണ്ടുള്ള മീൻപിടിക്കുന്ന രീതി.മത്സ്യബന്ധന രീതികളിലെ മാറ്റങ്ങളും ഇത്തരം കെണികള്‍ സമുദ്ര പരിസ്ഥിതിക്ക് കേടുപാടുകള്‍ വരുത്തുന്നുവെന്നും കണ്ടെത്തിയതിനാല്‍ ചിലത് നിർത്തലാക്കേണ്ടി വന്ന സാഹചര്യം ഉണ്ടായിട്ടുണ്ട്.