വളര്‍ത്തുമൃഗങ്ങളുടെ അറിവും ബുദ്ധിയും ഒക്കെ അളക്കുന്ന നിരവധി സംഭവങ്ങള്‍ നമ്മള്‍ കണ്ടിട്ടും കേട്ടിട്ടുമുണ്ട്. പ്രത്യേകിച്ച്‌ വളര്‍ത്തുനായ്ക്കളുടെ. നായക്കുട്ടിയായി അഭിനയിച്ച്‌ ഉടമസ്ഥന്റെ മടിയില്‍ കയറി ഇരിക്കുന്ന ഭീമന്‍നായയുടെ വീഡിയോ വൈറലായത് അടുത്തിടെയായിരുന്നു. ഇപ്പോഴിതാ പിറ്റ്ബുള്‍ ഇനത്തില്‍പ്പെട്ട പെണ്‍നായയാണ് ഏവരെയും അത്ഭുതപ്പെടുത്തുന്നത്. ടിക്ടോക്കിലാണ് ഇതിന്റെ വീഡിയോ വൈറലായിരിക്കുന്നത്.

@maxpotentialdogtraining എന്ന അക്കൗണ്ടില്‍ റയാന്‍ എന്ന പേരുള്ള യുവാവാണ് വീഡിയോ പോസ്റ്റ് ചെയ്തത്. നോവ എന്ന നായയെയും ഉടമസ്ഥയായ യുവതിയുമാണ് വീഡിയോയിലുള്ളത്. 'തന്റെ ഉടമ ഗര്‍ഭിണിയാണെന്ന് നായ അറിഞ്ഞ നിമിഷം' എന്ന തലക്കെട്ടോടെയാണ് വീഡിയോ പങ്കുവെച്ചിരിക്കുന്നത്. യുവതിയുടെ വയറിനെ സംരക്ഷിച്ചുനില്‍ക്കുന്നതുപോലെയുള്ള നായയുടെ ഭാവവാണ് കാഴ്ചക്കാരുടെ ഹൃദയത്തില്‍ തൊടുന്നത്.

യുവതിയുടെ അരയ്ക്ക് പുറത്ത്, വയറില്‍ തൊടാതെ നില്‍ക്കുന്ന നായ വീട്ടമ്മയുടെ മുഖത്തും വയറിലും മാറി മാറി നോക്കുന്നതാണ് വീഡിയോയില്‍ കാണുന്നത്. ഇതുവരെ പത്ത് ലക്ഷത്തിലധികം പേരാണ് വീഡിയോ കണ്ടത്. 1,87,000 പേര്‍ വീഡിയോ ലൈക്ക് ചെയ്തിട്ടുണ്ട്. നിരവധി പേര്‍ നായയുടെ ബുദ്ധിയെ പ്രകീര്‍ത്തിച്ച്‌ കമന്റുകള്‍ കുറിച്ചിട്ടുണ്ട്. 'നായക്ക് എല്ലാം അറിയാം. മണത്ത് കണ്ടുപിടിക്കാനാകുമെന്നാണ് തോന്നുന്നത്'- ഒരാള്‍ കമന്റ് ചെയ്തു. ഗര്‍ഭാവസ്ഥ ഉള്‍പ്പെടെ ശരീരത്തിലെ മാറ്റങ്ങള്‍ തിരിച്ചറിയാന്‍ നായകള്‍ക്ക് കഴിവുണ്ടെന്ന് മറ്റൊരാള്‍ കുറിച്ചു. ഗര്‍ഭവാവസ്ഥയില്‍ വളര്‍ത്തുനായ വയറില്‍ തലവെച്ചുകിടന്ന ഓര്‍മകള്‍ പങ്കുവെച്ച്‌ മറ്റൊരു യൂസറും രംഗത്തെത്തി. പിന്നീട് ടിക് ടോക് യൂസര്‍ പുതിയൊരു വിവരം അപ്ഡേറ്റ് ചെയ്തു. നോവയും മറ്റു വളര്‍ത്തുമൃഗങ്ങളും കുഞ്ഞിനെ ആദ്യമായി കാണുന്നതിന്റെ വിവരമാണത്. നിങ്ങളൊക്കെ കരുതുന്നപോലെ മധുരതരമായിരുന്നു ആ കൂടിക്കാഴ്ചയെന്നും യൂസര്‍ കുറിക്കുന്നു.