ബ്രിട്ടനില്‍ അതിവേഗം പടരുന്ന പുതിയ തരം കൊറോണവൈറസ് മറ്റ് രാജ്യങ്ങളിലേക്കും വ്യാപിക്കുന്നതായി റിപ്പോർട്ട്. അതിവ്യാപനശേഷിയുള്ള വൈറസ് കണ്ടെത്തിയതിനു പിന്നാലെ യു.കെയിൽ ജാഗ്രത പുറപ്പെടുവിച്ചു. കൊവിഡ് മഹാമാരി പൊട്ടിപ്പുറപ്പെട്ട് ഒരു വര്‍ഷം പിന്നിടുമ്പോഴാണ് ഏവരിലും ഞെട്ടൽ ഉളവാക്കി വൈറസിന്റെ പുതിയ ഇനം ശക്തിപ്രാപിച്ച് പടരുന്നത്. പുതുതായി കണ്ടെത്തിയ കൊറോണ വൈറസ് ‘നിയന്ത്രണാതീതമാണ്’ എന്ന മുന്നറിയിപ്പിനു പിന്നാലെ യുകെയിൽനിന്നുള്ള വിമാനങ്ങൾ നിരോധിക്കാനൊരുങ്ങുകയാണ് യൂറോപ്യൻ രാജ്യങ്ങൾ.

അതോടൊപ്പം തന്നെ യുകെയിൽനിന്നുള്ള എല്ലാ പാസഞ്ചർ വിമാനങ്ങൾക്കും ഞായറാഴ്ച മുതൽ നെതർലൻഡ് നിരോധനം ഏർപ്പെടുത്തിയിരുന്നു. ബ്രിട്ടൻ, ദക്ഷിണാഫ്രിക്ക എന്നിവി‌ടങ്ങളിൽനിന്നുള്ള വിമാനങ്ങൾക്കു കടുത്ത നിയന്ത്രണം ഏർപ്പെടുത്തുമെന്നു ജർമനി അറിയിച്ചുകൊണ്ട് രംഗത്ത് എത്തി. ബ്രിട്ടനിൽനിന്നുള്ള വിമാന, ട്രെയിൻ സർവീസുകൾ അർധരാത്രി മുതൽ നിർത്തിവയ്ക്കുമെന്ന് അയൽരാജ്യമായ ബെൽജിയം അറിയിക്കുകയുണ്ടായി.

രാജ്യത്ത് അതിവേഗം പടരുന്ന പുതിയതരം കൊറോണ വൈറസുണ്ടെന്നു കഴിഞ്ഞദിവസമാണു ചീഫ് മെഡിക്കൽ ഓഫിസർ ക്രിസ് വിറ്റി സ്ഥിരീകരിച്ചത്. കണ്ടെത്തലുകൾ ലോകാരോഗ്യ സംഘടനയെ ഇതിനോടകം തന്നെ അറിയിച്ചു. ബ്രിട്ടനിൽ കോവിഡ് കേസുകളും ആശുപത്രി വാസവും കൂടിയിരിക്കുകയാണ്. പുതിയ വൈറസിന്റെ ദ്രുതഗതിയിലുള്ള വ്യാപനത്തിന്റെ ഫലമായാണു രോഗം കൂടുന്നത് എന്നാണ് റിപ്പോർട്ട്.

മാത്രമല്ല, പുതിയ വൈറസ് ഉയർന്ന മരണനിരക്കിനു കാരണമാകും എന്നതിനോ വാക്സീനുകളെയും ചികിത്സകളെയും ബാധിക്കും എന്നതിനോ നിലവിൽ തെളിവുകളില്ല. കൊവിഡിനെ ചെറുക്കാനുള്ള വാക്‌സിനുകള്‍ മികച്ച പ്രതികരണം നേടി മുന്നേറുമ്പോഴാണ് പുതിയ ഇനം വൈറസിന്റെ ഉത്ഭവം ഏവരിലും ആശങ്ക ഉണർത്തുന്നത്. നിലവില്‍ തയ്യാറാക്കിയിട്ടുള്ള വാക്‌സിനുകള്‍ വൈറസിനെ പ്രതിരോധിക്കാന്‍ തക്കതാണോ എന്നാണ് ലോകം ഉറ്റുനോക്കുന്നത്.