സുപ്രധാന സമുദ്രപാതയായ സൂയസ് കനാലില്‍ പടുകൂറ്റന്‍ കണ്ടെയ്‌നര്‍ കപ്പലായ എവര്‍ഗ്രീന്‍ കുടുങ്ങിയതോടെ ആഗോള ചരക്കുനീക്കം പ്രതിസന്ധിയില്‍. 321 കപ്പലുകളാണ് ഇതോടെ സൂയസ് കനാലിന്റെ ഇരു ഭാഗത്തുമായി കുടുങ്ങിയിരിക്കുന്നത്. ഗള്‍ഫില്‍ നിന്ന് യൂറോപ്പിലേക്കുള്ള എണ്ണനീക്കവും തടസപ്പെട്ടിരിക്കുകയാണ്.

ഇത് വലിയ പ്രതിസന്ധിക്കിടയാക്കാം. മെഡിറ്ററേനിയന്‍ കടലിനെയും ചെങ്കടലിനെയും ബന്ധിപ്പിക്കുന്ന സൂയസ് യൂറോപ്പിനും ഏഷ്യക്കും ഇടയിലെ ചരക്കുഗതാഗത ദൈര്‍ഘ്യം ഗണ്യമായി കുറയ്ക്കുന്നതാണ്.

ലോകത്തിലെ ചരക്കു ഗതാഗതത്തിന്റെ പത്തു ശതമാനവും ഇതുവഴിയാണ്. ചൊവ്വാഴ്ചയാണ് എവര്‍ഗ്രീന്‍ സൂയസ് കനാലില്‍ കുടുങ്ങിയത്. ചൈനയില്‍നിന്ന് നെതര്‍ലാന്റ്‌സിലേക്കു പോകുകയായിരുന്ന നാനൂറ് മീറ്റര്‍ നീളവും രണ്ടു ലക്ഷം ടണ്‍ ഭാരവുമുള്ള കപ്പല്‍ കനത്ത കാറ്റില്‍പ്പെട്ട് വട്ടംതിരിഞ്ഞ് മുന്‍പിന്‍ഭാഗങ്ങള്‍ മണ്ണിലുറച്ചുപോകുകയായിരുന്നു.

നിലവില്‍ കപ്പല്‍ ഉറച്ചഭാഗത്തെ മണ്ണ് നീക്കംചെയ്തുകൊണ്ടിരിക്കുകയാണ്. ഏകദേശം 20000 ക്യൂബിക് മീറ്റര്‍ മണ്ണും മണലും മാറ്റേണ്ടതായിട്ടുണ്ട്. കപ്പലിലുള്ള കണ്ടെയ്‌നറുകള്‍ നീക്കം ചെയ്തശേഷം വേലിയേറ്റസമയത്ത് വലിയ ടഗ് ബോട്ടുകളുടെ സഹായത്തോടെ നീക്കാനാകുമെന്നു കരുതുന്നു.

ഇന്ന് ഉണ്ടാകുന്ന വേലിയേറ്റത്തിലാണ് അധികൃതര്‍ വലിയപ്രതീക്ഷവച്ചിരിക്കുന്നത്. ഏതാനും ദിവസങ്ങള്‍ക്കകം സൂയസില്‍ ചരക്കുനീക്കം പുസ്ഥാപിക്കാനാകുമെന്നാണ് പ്രതീക്ഷ. വരുന്ന ശനിയാഴ്ചയോടെ പ്രശ്‌നപരിഹാരമാകുമെന്ന് കപ്പലിന്റെ ഉടമസ്ഥര്‍ അഭിപ്രായപ്പെട്ടു.