നെഞ്ചിൽ കത്തിയുമായി ഒരുവർഷത്തോളം ജീവിക്കുക എന്നത് പ്രയാസമേറിയ കാര്യമാണ് എന്നാൽ, ഒരു ഫിലിപ്പൈൻ യുവാവിന്റെ കഥ കേട്ടാൽ ഞെട്ടിപ്പോകും. ജോലിയുമായി ബന്ധപ്പെട്ട ആവശ്യത്തിനായി ആരോഗ്യപരിശോധനക്കെത്തിയതായിരുന്നു 36കാരനായ ഫിലിപ്പീന്‍ യുവാവ്​ കെന്‍റ്​ റയാന്‍ തോമോ.

ആരോഗ്യ പരിശോധനയില്‍ തെളിഞ്ഞതാ​ക​ട്ടെ അമ്പരപ്പിക്കുന്ന ഒരു വിവരവും. 14മാസത്തോളമാണ്​ ശ്വാസകോശത്തിനും വാരിയെല്ലിനും ഇടയില്‍ നാലിഞ്ച്​ വലിപ്പത്തിലുള്ള കത്തിയുമായി കെന്‍റ്​ ജീവിച്ചിരുന്നത്.

കഴിഞ്ഞവര്‍ഷം ജനുവരിയില്‍ ജോലി കഴിഞ്ഞ്​ വീട്ടിലേക്ക്​ മടങ്ങുന്നതിനിടെ കെന്റിന് ആക്രമം നേരിട്ടിരുന്നു. ​കത്തികൊണ്ട്​ പരിക്കേറ്റ കെന്‍റിനെ ആശുപത്രിയില്‍ പ്രവേശിപ്പിക്കുകയും ചെയ്തതായിരുന്നു. തന്‍റെ മുറിവ്​ മാത്രമാണ്​ ഡോക്​ടര്‍മാര്‍ തുന്നിച്ചേര്‍ത്തതെന്നും ശരീരത്തിനകത്ത്​ അകപ്പെട്ട കത്തി എടുത്തുമാറ്റിയില്ലെന്നും യുവാവ്​ പറഞ്ഞിരുന്നു.

ശരീരത്തിനകത്തുനിന്ന്​ കത്തിയെടുത്താല്‍ മാത്രമേ ഖനിയിലെ പുതിയ ജോലിയില്‍ ഇദ്ദേഹത്തിന് ജോലി ലഭിക്കുകയുള്ളൂ. ശരീരത്തില്‍ കത്തിയുമായി ജീവിക്കുന്ന ഒരാളെ ജോലിയില്‍ പ്രവേശിപ്പിക്കുന്നത്​ അപകടകരമാണെന്ന്​ തൊഴിലുടമ വ്യക്തമാക്കി.

'കഴിഞ്ഞവര്‍ഷം എന്നെ ചികിത്സിച്ച ഡോക്​ടര്‍മാര്‍ മുറിവ്​ സൂക്ഷ്​മമായി പരിശോധിച്ചില്ല. അവര്‍ ശരിയായി പരിശോധിച്ചിരുന്നെങ്കില്‍ ഇത്​ സംഭവിക്കില്ലായിരുന്നു. ഇത്​ അവരുടെ തെറ്റാണ്​. അവര്‍ തന്നെ ശരിയാക്കി നല്‍കണം' - കെന്‍റ്​ പ്രദേശിക മാധ്യമങ്ങളോട് പറഞ്ഞു.

തനിക്ക് മുറിവുണ്ടായപ്പോൾ ആശുപത്രിയിൽ പോയിരുന്നു. അവര്‍ അത്​ തുന്നിച്ചേര്‍ക്കുകയും ചെയ്തു. ശേഷം വേദന സംഹാരി നല്‍കുകയും വീട്ടിലേക്ക്​ പോകുവാനും പറഞ്ഞു. ശൈത്യകാലത്തും മറ്റും നെഞ്ചിന്​ വേദന അനുഭവപ്പെട്ടിരുന്നു.

പക്ഷെ, ഇത്രയും ഗുരുതരമാണെന്ന്​ കരുതിയിരുന്നില്ല. ശരീരത്തില്‍ കത്തിയുണ്ടാകുമെന്ന്​ ചിന്തിക്കാന്‍ പോലും കഴിഞ്ഞില്ല. വേദന അനു​ഭ​വപ്പെടുമ്പോൾ ഡോക്​ടറെ സമീപിക്കാന്‍ പോലും തയാറായില്ല. വേദന മാറുന്നത്​ വരെ വി​ശ്രമിച്ചു. ഇപ്പോള്‍ അതിന്‍റെ യഥാര്‍ഥ കാരണം മനസിലായതായും കെന്‍റ്​ വ്യക്തമാക്കി.

ശരീരത്തില്‍നിന്ന്​ കത്തി നീക്കം ചെയ്യണമെങ്കില്‍ ശസ്ത്രക്രിയ വേണ്ടിവരും. എന്നാല്‍ അതിനുള്ള പണം തന്‍റെ കൈയിലുമില്ല. കത്തി നീക്കം ചെയ്യാന്‍ പണം ​കണ്ടെത്തണമെങ്കില്‍ ജോലിക്ക് പോകണം. ജോലി ലഭിക്കണമെങ്കില്‍ കത്തി നീക്കം ചെയ്യുകയാണ് വേണ്ടതെന്നു കെന്റ് പറയുന്നുണ്ട്.