മണ്ണിനടിയില്‍ കുഴിച്ചിട്ട ശവപ്പെട്ടിയില്‍ 50 മണിക്കൂര്‍ സാഹസത്തിന്റെ 12 മിനിറ്റ് ദൈര്‍ഘ്യമുള്ള വീഡിയോയാണ് ഇപ്പോള്‍ സമൂഹ മാധ്യമങ്ങളില്‍ വൈറലാകുന്നത്. കാഴ്ചക്കാരെ കൂട്ടാന്‍ യുട്യൂബര്‍ 'മിസ്റ്റര്‍ബീസ്റ്റ്' തിരഞ്ഞെടുത്തത് ഇത്തരി കടുത്തുപോയി. വീഡിയോ കുറഞ്ഞ സമയത്തിനുളളില്‍ തന്നെ യുട്യൂബില്‍ മാത്രം 5.6 കോടിലധികം തവണ കണ്ടുകഴിഞ്ഞു. മിസ്റ്റര്‍ ബീസ്റ്റ് എന്നറിയപ്പെടുന്ന ജിമ്മി ഡൊണാള്‍ഡ്‌സണ്‍ യുട്യൂബറാണ് ഇത്തിരി വേറിട്ട വഴി തിരഞ്ഞെടുത്തത്. അദ്ദേഹത്തിന്റെ വിഡിയോകളില്‍ പലതും പ്രകോപനപരവും അപകടകരവുമാണ്. എന്നാല്‍, ഓരോ വിഡിയോയ്ക്കും കുറഞ്ഞത് മൂന്നു കോടി വ്യൂസ് എങ്കിലും ലഭിക്കുന്നുണ്ട്. അവയില്‍ ചിലതിന്റെ വ്യൂസ് പത്ത് കോടി വരെ എത്തിയിട്ടുണ്ട്.

മിസ്റ്റര്‍ ബീസ്റ്റിന്റെ പുതിയ വിഡിയോ ഇത്തിരി സാഹസം നിറഞ്ഞതായിരുന്നു. 50 മണിക്കൂറോളം ശവപ്പെട്ടിയില്‍ കഴിയുന്നതാണ് വിഡിയോ. യുട്യൂബില്‍ 5.7 കോടി ആരാധകരുളള ബീസ്റ്റ് തന്റെ സുഹൃത്തുക്കളുടെ സഹായത്തോടെയാണ് കുഴിച്ചുമൂടുന്നതും വിഡിയോ പകര്‍ത്തിയതും. ഗ്ലാസില്‍ നിര്‍മിച്ച ശവപ്പെട്ടിയിലാണ് 22 കാരനായ ബീസ്റ്റിനെ അടക്കം ചെയ്തത്.
രണ്ട് ദിവസത്തിലധികമാണ് ശവപ്പെട്ടിയില്‍ ചെലവഴിച്ചത്. ശവപ്പെട്ടിക്കുള്ളില്‍ ക്യാമറ സ്ഥാപിക്കുകയും ചെയ്തിരുന്നു. 50 മണിക്കൂര്‍ സാഹസത്തിന്റെ 12 മിനിറ്റ് ശ്രമം മാത്രമാണ് അപ്‌ലോഡ് ചെയ്തിട്ടുള്ളത്. ശവപ്പെട്ടിയില്‍ കിടക്കുമ്‌ബോഴും തന്റെ സുഹൃത്തുക്കളുമായി അദ്ദേഹം ആശയവിനിമയം നടത്തിയിരുന്നു. രണ്ടു ദിവസത്തോളം താന്‍ മൂത്രമൊഴിക്കാതെ കഴിച്ചുകൂട്ടിയെന്നാണ് അദ്ദേഹം പറഞ്ഞത്. ഇതുകാരണം ശക്തമായ പുറംവേദനയുണ്ടായിരുന്നു. പെട്ടിയിലെ ഒറ്റപ്പെട്ട ജീവിതം ഭീകരമായിരുന്നു. ഒരു ദിവസത്തിനുശേഷം വേദനയും ക്ലോസ്‌ട്രോഫോബിയയും അനുഭവിക്കാന്‍ തുടങ്ങിയതിനാല്‍ ഈ അനുഭവം എളുപ്പമുള്ള ഒന്നായിരുന്നില്ലെന്നും ജിമ്മി പറഞ്ഞു.