ബ്രിട്ടനിലെ എലിസബത്ത് രാജ്ഞിയുടെ ഭര്ത്താവും എഡിന്ബറോ പ്രഭുവുമായ ഫിലിപ്പ് രാജകുമാരന് അന്തരിച്ചു... രാജകുമാരനോടുള്ള ആദരസൂചകമായി ബക്കിംഗ്ഹാം കൊട്ടാരത്തിലും ബ്രിട്ടനിലെമ്പാടും കോമണ്വെല്ത്ത് രാജ്യങ്ങളിലും ദേശീയപതാകകള് പകുതി താഴ്ത്തി
ബ്രിട്ടനിലെ എലിസബത്ത് രാജ്ഞിയുടെ ഭര്ത്താവും എഡിന്ബറോ പ്രഭുവുമായ (ഡ്യൂക്ക് ഓഫ് എഡിന്ബറോ ) ഫിലിപ്പ് രാജകുമാരന് അന്തരിച്ചു. 99 വയസായിരുന്നു.
വിന്ഡ്സര് കൊട്ടാരത്തില് ഇന്നലെ രാവിലെ ( ബ്രിട്ടീഷ് സമയം ) ആയിരുന്നു അന്ത്യം. അണുബാധയ്ക്കും ഹൃദയ ശസ്ത്രക്രിയയ്ക്കുമായി ഇരുപത്തെട്ട് ദിവസം ആശുപത്രിയിലായിരുന്ന അദ്ദേഹം മാര്ച്ച് 16നാണ് വിന്ഡ്സര് കൊട്ടാരത്തില് തിരിച്ചെത്തിയത്. ഇന്നലെ ഉച്ചയോടെ എലിസബത്ത് രാജ്ഞി ( 94 ) തന്നെയാണ് എഴുപത്തിമൂന്ന് വര്ഷം നീണ്ട ദാമ്പത്യത്തിന് അന്ത്യം കുറിച്ച് ഫിലിപ്പ് രാജകുമാരന് വിടവാങ്ങിയ വിവരം ലോകത്തെ അറിയിച്ചത്.
നൂറാം പിറന്നാളിന് കൃത്യം രണ്ട് മാസം ശേഷിക്കെയാണ് അന്ത്യം. അനാരോഗ്യം കാരണം 2017മുതല് പൊതുവേദികളില് നിന്ന് വിട്ടുനില്ക്കുകയായിരുന്നു.
ഫിലിപ്പ് രാജകുമാരന്റെ അഭിലാഷ പ്രകാരം ബെര്ക്ക്ഷയറിലെ വിന്ഡ്സര് കൊട്ടാരത്തിലായിരിക്കും സംസ്കാരം. ലണ്ടനില് കൊവിഡ് നിയന്ത്രണങ്ങള് പാലിച്ച് സൈനിക അകമ്പടിയോടെ വിലാപയാത്ര നടക്കുമെന്നും റിപ്പോര്ട്ടുണ്ട്. സംസ്കാര സമയം വെളിപ്പെടുത്തിയിട്ടില്ല.
എലിസബത്ത് - ഫിലിപ്പ് ദമ്പതികള്ക്ക് നാല് മക്കളാണ് - രാജകുമാരന്മാരായ ചാള്സ്, ആന്ഡ്രൂ, എഡ്വേര്ഡ് എന്നിവരും ആന് രാജകുമാരിയും. ചാള്സിന്റെ മക്കളാണ് വില്യമും ഹാരിയും. എട്ട് പേരക്കുട്ടികളും അവര്ക്ക് പത്ത് മക്കളുമുള്ള മുതുമുത്തച്ഛനാണ് ഫിലിപ്പ് രാജകുമാരന്.
രാജകുമാരനോടുള്ള ആദരസൂചകമായി ബക്കിംഗ്ഹാം കൊട്ടാരത്തിലും ബ്രിട്ടനിലെമ്പാടും കോമണ്വെല്ത്ത് രാജ്യങ്ങളിലും ദേശീയപതാകകള് പകുതി താഴ്ത്തി. എലിസബത്ത് രാജ്ഞിക്ക് എട്ട് ദിവസത്തെ ദുഃഖാചരണമാണ്. കൂടാതെ രാജകീയ ദുഃഖാചരണം 30 ദിവസം നീളും.
"
https://www.facebook.com/Malayalivartha