ചൈനീസ് റോക്കറ്റുകള്‍ ടേക്ക് ഓഫിലും യാത്രാ മധ്യേയുമൊക്കെ കത്തി ചാമ്പലാകുന്നത് പുതുമയുള്ള കാര്യമല്ല. എന്നാല്‍ ഇന്ത്യയുടെ ആകാശത്തിനു മുകളില്‍ ചൈനീസ് റോക്കറ്റ് നിന്നു കത്തിയതാണ് ഇപ്പോഴത്തെ ചര്‍ച്ചാ വിഷയം. ദിവസങ്ങള്‍ക്ക് മുന്‍പാണ് മഹാരാഷ്ട്രയിലെ ഗ്രാമവാസികള്‍ രാത്രി ആകാശത്ത് ആ കാഴ്ച കണ്ടത്. ഇതുവരെ അവര്‍ കണ്ടിട്ടില്ലാത്ത തരത്തിലുള്ളൊരു വിചിത്ര കാഴ്ച തന്നെയായിരുന്നു അത്. ആകാശത്ത് എന്തോ ഒരു വസ്തു വലിയൊരു പ്രകാശമുണ്ടാക്കിക്കൊണ്ട് കടന്നു പോകുന്നതായിരുന്നു അവര്‍ കണ്ടത്. ഉല്‍ക്കാവര്‍ഷമാണെന്നാണ് ആദ്യം അവര്‍ സംശയിച്ചത്.അതുമായി ബന്ധപ്പെട്ട പല ചര്‍ച്ചകളും അന്ന് നടന്നു. എന്നാല്‍, ഇപ്പോഴാണ് അവിടെ സംഭവിച്ചത് എന്ത് എന്നതിനുള്ള കൃത്യമായ തെളിവുകളടക്കം ലഭിച്ചിരിക്കുന്നത്. മഹാരാഷ്ട്ര മധ്യപ്രദേശ് സംസ്ഥാനങ്ങളുടെ ആകാശത്ത് രാത്രിയില്‍ കണ്ട ആ കണ്ണുചിമ്മിക്കുന്ന വിസ്മയത്തിന് പിന്നില്‍ ചൈനീസ് റോക്കറ്റിന്റെ ഭാഗമാണ് എന്നാണ് കണ്ടെത്തല്‍. 'ചൈന റോക്കറ്റില്‍' നിന്നുള്ള അവശിഷ്ടങ്ങള്‍ മഹാരാഷ്ട്രയിലെ ഗ്രാമത്തില്‍ നിന്നും അധികൃതര്‍ കണ്ടെടുത്തു.

പിന്നാലെ ഇത് സ്ഥിരീകരിക്കാനെത്തിയ ഉദ്യോഗസ്ഥര്‍ ആകാശത്ത് നിന്ന് വീണ വലിയ ലോഹ വളയവും ഗോളവും കഴിഞ്ഞ വര്‍ഷം ബഹിരാകാശത്തേക്ക് വിക്ഷേപിച്ച ചൈനീസ് റോക്കറ്റില്‍ നിന്നുള്ളതണെന്ന് പ്രാദേശിക മാധ്യമങ്ങളോട് പറഞ്ഞു. രണ്ട് മുതല്‍ മൂന്ന് മീറ്റര്‍ വരെ (6.510 അടി) വ്യാസവും 40 കിലോഗ്രാം (90 പൗണ്ട്) ഭാരവുമുള്ള ലോഹ വളയം ശനിയാഴ്ച വൈകിട്ട് ഗ്രാമപ്രദേശത്ത് കണ്ടെത്തിയതായി ജില്ലാ കളക്ടര്‍ അജയ് ഗുല്‍ഹാനെ പിടിഐയോട് സ്ഥിരീകരിച്ചു.

മഹാരാഷ്ട്രയിലെ ചന്ദ്രപൂര്‍ ജില്ലയിലെ പേര് വെളിപ്പെടുത്താത്ത ഒരു സ്ത്രീ പറഞ്ഞത്.'ഞങ്ങള്‍ ഒരു വിരുന്ന് ഒരുക്കുന്നതിന്റെ തിരക്കിലായിരുന്നു, ഗ്രാമത്തിലെ ഒരു തുറന്ന സ്ഥലത്ത് സ്‌ഫോടനത്തോടെ ചുവന്ന ഡിസ്‌ക് വീണപ്പോള്‍ ആകാശം ജ്വലിച്ചു', സ്‌ഫോടനത്തിനു പിന്നാലെ ആളുകള്‍ ഭയന്ന് അവരുടെ വീടുകളിലേക്ക് ഓടി, ഏകദേശം അരമണിക്കൂറോളം അകത്ത് തന്നെ നിന്നുവെന്നും അവര്‍ വെളിപ്പെടുത്തി.

മറ്റൊരു വസ്തു അര മീറ്റര്‍ (1.5 അടി) വ്യാസമുള്ള ഒരു വലിയ ലോഹ ഗോളമാണ്. ജില്ലയിലെ തന്നെ മറ്റൊരു ഗ്രാമത്തിലാണ് ഈ ഗോളം വീണത്. ഇതെല്ലാം പരിശോധനയ്ക്കായി ശേഖരിച്ചിട്ടുണ്ട്. വസ്തുക്കളുടെ കൂടുതല്‍ ഭാഗങ്ങള്‍ ചിതറിക്കിടക്കുന്നുണ്ടോ എന്ന് കണ്ടെത്താന്‍ ഉദ്യോഗസ്ഥരെ ജില്ലയിലെ എല്ലാ ഗ്രാമങ്ങളിലേക്കും അയച്ചിതായും ജില്ലാ കളക്ടര്‍ വ്യക്തമാക്കി.

ആര്‍ക്കും പരുക്കുകളോ കാര്യമായ നാശനഷ്ടങ്ങളോ റിപ്പോര്‍ട്ട് ചെയ്തിട്ടില്ല. 2021 ഫെബ്രുവരിയില്‍ വിക്ഷേപിച്ച ചൈനീസ് റോക്കറ്റില്‍ നിന്നുള്ള അവശിഷ്ടങ്ങളായിരിക്കാം ഇതെന്ന് ഇസ്രോ അധികൃതരും അറിയിച്ചു. ചൈനീസ് റോക്കറ്റിന്റെ ഭാഗം ശനിയാഴ്ച ഭൂമിയുടെ അന്തരീക്ഷത്തിലേക്ക് പ്രവേശിക്കുമെന്ന് നേരത്തെ റിപ്പോര്‍ട്ടുണ്ടായിരുന്നു.

റോക്കറ്റിന്റെ ഭാഗങ്ങളില്‍ ചിലത് അന്തരീക്ഷത്തിലെ പുനര്‍പ്രവേശനത്തെ അതിജീവിക്കാറുണ്ട്. ഇത്തരത്തില്‍ കത്തിതീരാത്ത നോസിലുകള്‍, വളയങ്ങള്‍, ടാങ്കുകള്‍ തുടങ്ങി റോക്കറ്റ് ഭാഗങ്ങള്‍ ഭൂമിയിലേക്ക് പതിക്കാറുണ്ടെന്നും ഇസ്രോ ഉദ്യോഗസ്ഥന്‍ പറഞ്ഞു.

ഈ വളയം ചൈനയുടെ ലോങ് മാര്‍ച്ച് 3 ബി റോക്കറ്റിന്റെ ഒരു ഭാഗവുമായി സാമ്യമുണ്ടെന്ന് ഹാര്‍വാര്‍ഡ്‌സ്മിത്‌സോണിയന്‍ സെന്റര്‍ ഫോര്‍ ആസ്‌ട്രോഫിസിക്‌സിലെ ബഹിരാകാശ നിരീക്ഷകനായ ജോനാഥന്‍ മക്ഡവല്‍ ട്വീറ്റ് ചെയ്തു. വസ്തുക്കള്‍ അന്തരീക്ഷത്തില്‍ പ്രവേശിക്കുമ്പോള്‍ വലിയ അളവിലുള്ള താപവും ഘര്‍ഷണവും സൃഷ്ടിക്കും. അത് അവ കത്താനും ശിഥിലമാകാനും ഇടയാക്കും. പക്ഷേ വലിയവ പൂര്‍ണമായും നശിപ്പിക്കപ്പെടണമെന്നില്ല എന്നാണ് വിദഗ്ധര്‍ പറയുന്നത്.

2020ല്‍, മറ്റൊരു ചൈനീസ് ലോങ് മാര്‍ച്ച് റോക്കറ്റില്‍ നിന്നുള്ള അവശിഷ്ടങ്ങള്‍ ഐവറി കോസ്റ്റിലെ ഗ്രാമങ്ങളില്‍ വീണിരുന്നു. ഇത് പ്രദേശത്ത് കാര്യമായ നാശമുണ്ടാക്കി. പക്ഷേ പരുക്കുകളോ മരണമോ ഉണ്ടായില്ല.