പാക്കിസ്ഥാന്റെ പുതിയ പ്രധാനമന്ത്രി ഷഹബാസ് ഷെരീഫ്... പാക്കിസ്ഥാന്റെ ചരിത്രത്തില് അവിശ്വാസ വോട്ടെടുപ്പിലൂടെ പുറത്തായ ആദ്യ പ്രധാനമന്ത്രിയാണ് ഇമ്രാന് ഖാന്; സത്യപ്രതിജ്ഞാ ചടങ്ങുകള് ഉടന് നടക്കും
പാക്കിസ്ഥാന്റെ പുതിയ പ്രധാനമന്ത്രിയായി പാക്കിസ്ഥാന് മുസ്ലിം ലീഗ് നവാസ് അധ്യക്ഷന് ഷഹബാസ് ഷരീഫിനെ തിരഞ്ഞെടുത്തു. സത്യപ്രതിജ്ഞാ ചടങ്ങുകള് ഉടന് നടക്കും. ദേശീയ അസംബ്ലിയില് നടന്ന വോട്ടെടുപ്പില് 174 അംഗങ്ങള് ഷെഹബാസിന് അനുകൂലമായി വോട്ട് രേഖപ്പെടുത്തി.
പുതിയ പ്രധാനമന്ത്രിയെ തിരഞ്ഞെടുക്കുന്നതിനു മുന്പേ മുന് പ്രധാനമന്ത്രി ഇമ്രാന് ഖാനും പാക്കിസ്ഥാന് തെഹ്രീകെ ഇന്സാഫ് പാര്ട്ടി അംഗങ്ങളും രാജിവച്ചു. പാക്കിസ്ഥാനില് ഒരു പ്രധാനമന്ത്രിയും കാലാവധി തികച്ചിട്ടില്ലെന്ന ചരിത്രം ഇമ്രാനിലൂടെയും ആവര്ത്തിച്ചു.
ദേശീയ അസംബ്ലിയില്നിന്നു രാജി വയ്ക്കുകയാണെന്ന് ഇമ്രാന് ഖാന് ട്വിറ്ററില് പ്രഖ്യാപിച്ചു. ഇമ്രാനെ പുറത്താക്കാനുള്ള അവിശ്വാസ പ്രമേയ വോട്ടെടുപ്പും ഭരണകക്ഷിയായിരുന്ന പിടിഐയുടെ അംഗങ്ങള് ബഹിഷ്കരിച്ചിരുന്നു. പാക്കിസ്ഥാന്റെ ചരിത്രത്തില് അവിശ്വാസ വോട്ടെടുപ്പിലൂടെ പുറത്തായ ആദ്യ പ്രധാനമന്ത്രിയാണ് ഇമ്രാന് ഖാന്. 2018 ഓഗസ്റ്റ് 18നാണ് ഇമ്രാന് ഖാന് (69) അധികാരമേറ്റത്. മൂന്നു വര്ഷവും ഏഴു മാസവും അധികാരത്തിലിരുന്നു.
സുപ്രീം കോടതി ഇടപെടലിനു ശേഷവും അവിശ്വാസ പ്രമേയത്തില് വോട്ടെടുപ്പു നടത്താതെ നീട്ടിക്കൊണ്ടുപോകാനാണു ശ്രമമെന്നു വ്യക്തമായതോടെ, ശനിയാഴ്ച രാത്രി വൈകി സേനാമേധാവി ജനറല് ഖമര് ജാവേദ് ബജ്വ ഇമ്രാനുമായി കൂടിക്കാഴ്ച നടത്തിയെന്ന് അഭ്യൂഹമുയര്ന്നു.
സുപ്രീം കോടതി അടിയന്തര സിറ്റിങ് നടത്താനും തീരുമാനിച്ചു. ഇതോടെ അര്ധരാത്രി വീണ്ടും സഭ ചേര്ന്നപ്പോള് സ്പീക്കറും ഡപ്യൂട്ടി സ്പീക്കറും രാജി നല്കി ഭരണപക്ഷം സഭ വിട്ടു. മുതിര്ന്ന പ്രതിപക്ഷാംഗം ഇടക്കാല സ്പീക്കറായി ചുമതലയേറ്റാണു വോട്ടെടുപ്പു നടത്തിയത്.
അവിശ്വാസത്തിലൂടെ പുറത്താക്കപ്പെട്ട ഇമ്രാന് ഖാന്റെ പാര്ട്ടിയില് നിന്ന് വൈസ് ചെയര്മാന് ഷാ മഹമ്മൂദ് ഖുറേഷിയും പ്രധാനമന്ത്രി സ്ഥാനത്തേക്ക് പത്രിക സമര്പ്പിച്ചെങ്കിലും തെരഞ്ഞെടുപ്പില് നിന്ന് പിന്മാറുകയാണെന്ന് അറിയിച്ചതോടെ ഷഹബാസ് ഷെരീഫ് തന്നെ പ്രധാനമന്ത്രിയാകുമെന്ന് ഉറപ്പായിരുന്നു.
https://www.facebook.com/Malayalivartha