പാക്കിസ്ഥാന്‍ രാഷ്ട്രീയം വീണ്ടുമൊരു മാറ്റത്തിലേക്കു കടക്കുകയാണ്. സൈന്യത്തിന്റെ പിന്തുണയോടെ അധികാരത്തിലേറിയ ഇമ്രാന്‍ ഖാന്‍ പ്രധാനമന്ത്രിസ്ഥാനം ഒഴിഞ്ഞിരിക്കുന്നു. പകരം പ്രതിപക്ഷ സ്ഥാനാര്‍ഥി ഷഹബാസ് ഷരീഫാണ് അധികാരത്തിലേറിയിരിക്കുന്നത്.


മുന്‍ പ്രധാനമന്ത്രി നവാസ് ഷരീഫിന്റെ ഇളയ സഹോദരനും പാക്കിസ്ഥാന്‍ മുസ്ലിം ലീഗ്നവാസ് അധ്യക്ഷനുമാണ് ഷഹബാസ്.ഷഹബാസ് ഷരീഫ് പ്രധാനമന്ത്രി സ്ഥാനത്തെത്തിയതു സ്വാഭാവികമെന്നു പറയുന്നു സെന്‍ട്രല്‍ യൂണിവേഴ്സിറ്റി ഓഫ് ഗുജറാത്തിലെ പ്രഫസറും ഡീനുമായ ഡോ. മനീഷ്.

'യുഎസിനെയും ചൈനയെയും തങ്ങള്‍ക്കൊപ്പം ഒന്നിച്ചു നിര്‍ത്തുകയെന്ന പരമ്പരാഗത നയതന്ത്രത്തിലേക്കു പാക്കിസ്ഥാന്‍ തിരിച്ചുപോകും. കനത്ത ധനകാര്യ തകര്‍ച്ചയില്‍നിന്ന് ആ രാജ്യം എങ്ങനെയാണു കരകയറുക, ഇന്ത്യയുമായുള്ള ബന്ധം എങ്ങനെ മുന്നോട്ടു കൊണ്ടുപോകും തുടങ്ങിയ കാര്യങ്ങളൊക്കെ കാത്തിരുന്നു കാണണം.



എന്തായാലും മികച്ച ഭരണാധികാരിയാണെന്നു തെളിയിച്ചിട്ടുള്ളയാളാണ് ഷഹബാസ് ഷരീഫ്. തന്നെ പുറത്താക്കാന്‍ യുഎസ് ഗൂഢാലോചന നടത്തിയെന്ന ഇമ്രാന്‍ ഖാന്റെ വാദത്തില്‍ കഴമ്പില്ല. അതു ജനപിന്തുണ ആര്‍ജിക്കാന്‍ അദ്ദേഹം നടത്തിയ ഒരു കുറുക്കുവഴി മാത്രമായിരുന്നു. യഥാര്‍ഥത്തില്‍ പാക്കിസ്ഥാന്‍ രൂപീകരിക്കപ്പെട്ട കാലം മുതല്‍ അവര്‍ യുഎസിന്റെ സഖ്യകക്ഷിയായിരുന്നു. ഇസ്ലാമാബാദും പെന്റഗണും തമ്മില്‍ വളരെ നല്ല ബന്ധത്തിലായിരുന്നു.


അഫ്ഗാനിസ്ഥാനിലെ സോവിയറ്റ് ഇടപെടലിനെതിരെയും തീവ്രവാദത്തിനെതിരായ യുഎസ് പോരാട്ടങ്ങളിലും പാക്കിസ്ഥാന്‍ ഒപ്പമുണ്ടായിരുന്നു എന്നാല്‍, ചോര്‍ന്നുകിട്ടിയ ചില രേഖകളിലെ വിവരങ്ങളെ ഇമ്രാന്‍ സ്വന്തം നിലയില്‍ വ്യാഖ്യാനിക്കുകയായിരുന്നു. എല്ലാ രാഷ്ട്രീയ പാര്‍ട്ടികളും സര്‍ക്കാരുകളും രാജ്യത്തിനകത്തു പിന്തുണ നഷ്ടമാകുമ്പോള്‍ പുറത്തുനിന്നു ഗൂഢാലോചന നടക്കുന്നുവെന്ന ആരോപണം ഉന്നയിക്കാറുണ്ട്.


പാക്കിസ്ഥാന്റെ പരമ്പരാഗത വിദേശനയം യുഎസും ചൈനയുമായുള്ള സൗഹൃദത്തില്‍ ഊന്നിയുള്ളതാണ്. പാക്കിസ്ഥാനില്‍ നിന്നുള്ള ധാരാളം ബുദ്ധിജീവികള്‍ യുഎസില്‍ താമസിക്കുന്നുണ്ട്. യുഎസും പാക്കിസ്ഥാനുമായി നല്ല ബന്ധം പുലര്‍ന്നു കാണണമെന്നാണ് അവര്‍ ആഗ്രഹിക്കുന്നത്. അതിനായി പരിശ്രമിക്കുന്നവരുമുണ്ട്.


ശീതസമരത്തിന്റെ കാലത്തും ഇതായിരുന്നു പാക്കിസ്ഥാന്റെ നയം. എന്നാല്‍, റഷ്യയോടു ചാഞ്ഞുനില്‍ക്കാനുള്ള ഇമ്രാന്റെ പരിശ്രമങ്ങള്‍ വലിയ ആശയക്കുഴപ്പം ഉണ്ടാക്കിയിരുന്നു.

ചൈനയും യുഎസുമായുള്ള നല്ല ബന്ധമെന്ന നയതന്ത്രത്തിലേക്ക് പാക്കിസ്ഥാനെ തിരികെയെത്തിക്കാന്‍ ഷഹബാസിനു കഴിയുമെന്നുതന്നെയാണു പ്രതീക്ഷിക്കുന്നത്. പഞ്ചാബ് മുഖ്യമന്ത്രി ആയിരുന്ന കാലത്ത് ചൈന പാക്ക് ബന്ധം മെച്ചപ്പെടുത്താന്‍ വളരെയേറെ പരിശ്രമിച്ചിട്ടുണ്ട് അദ്ദേഹം. യുഎസുമായും അദ്ദേഹത്തിനു നല്ല ബന്ധമുണ്ടായിരുന്നു. ഇതു പാക്കിസ്ഥാന്റെ അടിസ്ഥാന വിദേശനയത്തിലേക്കുള്ള തിരിച്ചുപോക്കിനെ സഹായിക്കുമെന്നാണ് നയതന്ത്രലോകം പ്രതീക്ഷിക്കുന്നത്.

സൈന്യവും അത് ആഗ്രഹിക്കുന്നു. പാക്കിസ്ഥാനോടുള്ള ചൈനയുടെ താല്‍പര്യം സാമ്പത്തികവും നയതന്ത്രപരവുമാണ്. ബലൂചിസ്ഥാന്‍ മുതല്‍ ഗ്വാദര്‍ തുറമുഖം വരെയുള്ള മേഖലയില്‍ ചൈന വന്‍തോതില്‍ നിക്ഷേപം നടത്തിയിട്ടുണ്ട്. പാക്കിസ്ഥാനിലൂടെ അഫ്ഗാനിലെ താലിബാന്‍ സര്‍ക്കാരിനെ നിയന്ത്രിക്കാനും ഇന്ത്യന്‍ മഹാസമുദ്രത്തില്‍ സ്വാധീനത്തിനുമാണ് അവര്‍ ആഗ്രഹിക്കുന്നത്. അഫ്ഗാനിസ്ഥാനിലെ ധാതുസമ്പത്തില്‍ അവര്‍ക്കു കണ്ണുണ്ട്. താലിബാന്‍ യഥാര്‍ഥത്തില്‍ പാക്കിസ്ഥാന്റെയും ഐഎസ്ഐയുടെയും സൃഷ്ടിയാണ്. അവരാണ് കാബൂള്‍ വിമാനത്താവളം നിയന്ത്രിക്കുന്നത്. ഇതൊക്കെ മനസ്സിലാക്കിയാണ് ചൈന നീങ്ങുന്നത്.


ഇന്ത്യപാക്കിസ്ഥാന്‍ ബന്ധം വ്യത്യസ്തമായ ഒന്നാണ്. നരേന്ദ്ര മോദി പ്രധാനമന്ത്രിയായി സത്യപ്രതിജ്ഞ ചെയ്തപ്പോള്‍ ആ ചടങ്ങിലേക്ക് അന്നത്തെ പാക്കിസ്ഥാന്‍ പ്രധാനമന്ത്രി നവാസ് ഷരീഫിനെ ക്ഷണിച്ചിരുന്നു. മാത്രമല്ല, പാക്കിസ്ഥാന്‍ സന്ദര്‍ശിച്ച് ചര്‍ച്ച നടത്താനുള്ള മോദിയുടെ പരിശ്രമങ്ങളും സൗഹൃദാന്തരീക്ഷത്തിനു കളമൊരുക്കാന്‍ സഹായിച്ചിട്ടുണ്ട്. ഇന്ത്യയുടെ ആവശ്യം അതിര്‍ത്തി കടന്നെത്തുന്ന ഭീകരരെ പാക്കിസ്ഥാന്‍ നിയന്ത്രിക്കണമെന്നതാണ്. ഭീകരരില്‍ കൂടുതല്‍പേരും എത്തുന്നത് പാക്കിസ്ഥാന്റെ തെക്കന്‍ മേഖലയില്‍ നിന്നാണ്. അതിനു തടയിടാന്‍ കഴിഞ്ഞാല്‍ ഇന്ത്യ പാക്ക് സമാധാന ചര്‍ച്ചകളില്‍ പുരോഗതിയുണ്ടാകും. അത് സംഭവിക്കുമോയെന്നു കാത്തിരുന്നു കാണണം.

എന്തായാലും പാക്കിസ്ഥാന്‍ മാധ്യമങ്ങള്‍ക്ക് ഇന്ത്യന്‍ ജനാധിപത്യത്തോടു വലിയ മതിപ്പുണ്ട്.

ഇന്ത്യ സ്വതന്ത്ര വിദേശനയം പിന്തുടരുന്ന രാജ്യമാണെന്നാണ് പാക്ക് മാധ്യമങ്ങള്‍ വിലയിരുത്തുന്നത്. പ്രത്യേകിച്ച് യുക്രെയ്ന്‍ വിഷയത്തിലെ ഇന്ത്യയുടെ സമീപനത്തെക്കുറിച്ചും അവിടുത്തെ മാധ്യമങ്ങള്‍ക്കു നല്ല അഭിപ്രായമാണ്. പക്ഷേ ഇതെല്ലാം ഇന്ത്യപാക്ക് ബന്ധത്തിലെ പുരോഗതിയില്‍ പെട്ടെന്നൊരു സ്വാധീനമുണ്ടാക്കുമെന്നു കരുതാനാവില്ല.