റഷ്യന്‍ പട്ടാളത്തിന്റെ പിടിയിലായ ഒരു യുവതിയുടെ ദാരുണാന്ത്യത്തെ കുറിച്ചുള്ള വാര്‍ത്ത ഹൃദയഭേദകമാകുകയാണ്. രക്ഷപെടുന്നതിന് തൊട്ടു മുമ്പ് റഷ്യന്‍ സൈനികര്‍ തടവിലാക്കിയ യുവതി ദിവസങ്ങളോളം അതിക്രൂരമായ പീഡനത്തിന് ഇരയായി. രണ്ടു കുട്ടികളുടെ അമ്മയായ ടെറ്റിയാന എന്ന യുവതി കീവിന് സമീപമുള്ള മകരിവിലാണ് താമസിച്ചിരുന്നത്. ഈ പ്രദേശം റഷ്യയുടെ അധീനതയിലായതോടെ അവിടെ നിന്നും രക്ഷപ്പെടാന്‍ ഒരുങ്ങുകയായിരുന്നു ഇവര്‍. നാടുവിടാനായി സുഹൃത്തിനെ കാത്തു നില്‍ക്കുന്നതിനിടെയാണ് ടെറ്റിയാന റഷ്യന്‍സൈനികരുടെ പിടിയിലായത്. മാര്‍ച്ചില്‍ നടന്ന സംഭവം ഇപ്പോഴാണ് പുറംലോകം അറിയുന്നത്.

ടെറ്റിയാനയെ പിടികൂടിയ റഷ്യന്‍ സൈന്യം മകരിവ് നഗരത്തില്‍ തന്നെയുള്ള മറ്റൊരു വീട്ടിലാണ് ബന്ദിയാക്കി താമസിപ്പിച്ചത്. യുദ്ധം കഴിഞ്ഞെത്തുന്ന റഷ്യന്‍ സൈനീകര്‍ അവളെ എന്നു കൂട്ട ബലാത്സംഗത്തിന് ഇരയാക്കി. അങ്ങനെ ദിവസങ്ങളോളം അതിക്രൂരമായി പീഡിപ്പിച്ചശേഷം ടെറ്റിയാനയെ കഴുത്തറുത്ത് കൊലപ്പെടുത്തുകയായിരുന്നു. യുക്രൈന്റെ തിരിച്ചടിയില്‍ കീവ് മേഘല വിടുന്നതിന് തൊട്ടു മുമ്പാണ് ഇത്തരത്തിലൊരു ക്രൂരത റഷ്യന്‍ സൈന്യം ചെയ്തത്.

ഇത് ശരിവയ്ക്കുന്ന തരത്തിലുള്ള ദൃശ്യങ്ങളും ടെറ്റിയാനയെ തടവില്‍ പാര്‍പ്പിച്ചിരുന്ന സ്ഥലത്തുനിന്നും നിന്നും ലഭിച്ചിട്ടുണ്ട്. കൊലപ്പെടുത്തിയശേഷം യുവതിയുടെ ശരീരം വീടിനു പിന്നില്‍ തന്നെ കുഴിച്ചിടുകയും ചെയ്തു. വീടിനുള്ളിലെ കിടക്കയും വിരികളും എല്ലാം രക്തത്തില്‍ കുതിര്‍ന്ന നിലയിലാണുള്ളത്. യുവതിയുടെ ദയനീയാവസ്ഥയില്‍ സമീപ വാസികള്‍ക്കും സഹായിക്കാനായിരുന്നില്ല. കാരണം അവരെയും റഷ്യന്‍ സൈന്യം ബന്ദികളാക്കിയിരുന്നു.

വീടുകള്‍ക്കുള്ളില്‍ തന്നെ കഴിഞ്ഞ ജനങ്ങള്‍ ജനലുകള്‍ക്കു സമീപത്തേക്ക് നീങ്ങിയാല്‍ പോലും അവരെ സൈന്യം വെടിവച്ച് ഭയപ്പെടുത്തുകയായിരുന്നു. യുക്രെയ്‌നിന്റെ ആഭ്യന്തരവകുപ്പിലെ ഉദ്യോഗസ്ഥനായ ആന്റോണ്‍ ഗരാഷ്‌ചെങ്കോയാണ് ടെറ്റിയാനയുടെ ദാരുണമായ കൊലയെക്കുറിച്ചുള്ള വാര്‍ത്ത പുറത്തുവിട്ടത്. കഴിഞ്ഞവര്‍ഷമാണ് ടെറ്റിയാനയുടെ ഭര്‍ത്താവ് കോവിഡ് ബാധിച്ചു മരിച്ചത്

അതേസമയം ടെറ്റിയാന മരിച്ചതറിയാതെ അവരുടെ വളര്‍ത്തുനായ റീനി വീടിന്റെ മുറ്റത്ത് തന്നെ കാത്തിരിക്കുന്നതിന്റെ ചിത്രങ്ങളും പുറത്തുവന്നിട്ടുണ്ട്. റഷ്യന്‍ സൈന്യം ഏറ്റവുമധികം ആക്രമണം അഴിച്ചുവിട്ട മേഖലകളിലൊന്നാണ് മകരിവ്. 130ന് മുകളില്‍ യുക്രെയ്ന്‍ സ്വദേശികളെ വെടിവച്ചു കൊന്നശേഷം കൂട്ടമായി അടക്കം ചെയ്ത നിലയില്‍ ഇവിടെനിന്നും കണ്ടെത്തിയിരുന്നു. നഗരത്തിലെ കെട്ടിടങ്ങളില്‍ പകുതിയിലേറെയും ആക്രമണത്തില്‍ പൂര്‍ണമായും നശിപ്പിക്കപ്പെടുകയും ചെയ്തു.