റഷ്യയുടെ മുന്നേറ്റം..... ഏകദേശം ആയിരത്തോളം യുക്രെയിന്‍ സൈനികര്‍ കീഴടങ്ങിയതോടെ മരിയുപോള്‍ നഗരം ഏതാണ്ട് റഷ്യന്‍ നിയന്ത്രണത്തിലായി.... ഇതോടെ രണ്ടുമാസത്തോളമായി നീളുന്ന യുദ്ധത്തില്‍ അവസാനം റഷ്യയ്ക്ക് ഒരു സുപ്രധാന വിജയം കൈവന്നിരിക്കുകയാണ്.

തന്ത്രപ്രധാനമായ മരിയുപോള്‍ നഗരത്തില്‍ യുക്രെയിന്‍ പട്ടാളം കീഴടങ്ങുന്ന കാഴ്ച്ച റഷ്യന്‍ സര്‍ക്കാര്‍ ഉടമസ്ഥതയിലുള്ള ടെലിവിഷന്‍ ചാനലില്‍ സംപ്രേഷണം ചെയ്തിരുന്നു. ഒരു ബങ്കറില്‍ നിന്നും ഇറങ്ങി വരുന്ന സൈനികര്‍ കൈകള്‍ ഉയര്‍ത്തിപ്പിടിച്ച് നടന്നെത്തിയാണ് കീഴടങ്ങുന്നത്. നഗരത്തിന്റെ വ്യവസായ ജില്ലയില്‍ 1026 യുക്രെയിന്‍ സൈനികര്‍ കുടുങ്ങിപ്പോയെന്നും അവര്‍ പൂര്‍ണ്ണമായും കീഴടങ്ങി എന്നുമാണ് റഷ്യ അവകാശപ്പെടുന്നത്.

ഇതില്‍ 162 മുതിര്‍ന്ന ഉദ്യോഗസ്ഥരും ഉണ്ട് എന്നും റഷ്യ പറയുന്നു. എന്നാല്‍, ഇക്കാര്യം നിഷേധിച്ച് കീവ് . നിബന്ധനകള്‍ ഒന്നുമില്ലാതെ സ്വമേധയാ യുക്രെയിന്‍ സൈനികര്‍ കീഴടങ്ങുകയായിരുന്നു എന്നാണ് റഷ്യന്‍ പ്രതിരോധമന്ത്രാലയത്തിന്റെ സമൂഹമാധ്യമ പോസ്റ്റുകളില്‍ പറയുന്നത്. മരിയുപോള്‍ നഗരത്തിന്റെ നിയന്ത്രണം തങ്ങള്‍ ഏറ്റെടുത്തതായും പോസ്റ്റില്‍ പറയുന്നു

അമ്പതോളം ദിവസങ്ങളായി നീണ്ടു നില്‍ക്കുന്ന യുദ്ധത്തില്‍ ഏറിയ സമയത്തും ഈ നഗരം റഷ്യന്‍ സൈന്യത്താല്‍ ചുറ്റപ്പെട്ടിരിക്കുകയായിരുന്നു. നഗരത്തിന്റെ മിക്ക ഭാഗങ്ങളും ബോംബിംഗിലും ഷെല്‍ ആക്രമണത്തിലും തകര്‍ന്നടിഞ്ഞു. ഈ നഗരത്തിലെ ഒരു പ്രസവാശുപത്രിക്ക് നേരെ ബോംബാക്രമണം നടത്തിയതിന് റഷ്യക്കെതിരെ യുദ്ധക്കുറ്റം ചുമത്തണമെന്ന ആവശ്യവുമേറെയാണ് .

അതേസമയം, നഗരം പൂര്‍ണ്ണമായും കീഴടങ്ങിയിട്ടില്ലെന്നും പല ഭാഗങ്ങളും ഇപ്പോഴും തങ്ങളുടെ നിയന്ത്രണത്തിലാണെന്നും മേയറുടെ ഉപദേഷ്ടാവ് അറിയിച്ചു. ഉരുക്കു നിര്‍മ്മാണ ശാലകളുള്ള അസോവ്‌സ്താലും തുറമുഖവും ഇപ്പോഴും യുക്രെയിന്റെ നിയന്ത്രണത്തിലാണെന്നാണ് യുക്രെയിന്‍ വൃത്തങ്ങള്‍ അവകാശപ്പെടുന്നത്. എന്നാല്‍ അസോവ്‌സ്താല്‍ കീഴടക്കി എന്നാണ് റഷ്യ അവകാശപ്പെടുന്നത്. അങ്ങനെയെങ്കില്‍ അസോവ് തുറമുഖവും റഷ്യയുടെ നിയന്ത്രണത്തിലാകും.

എന്നാല്‍ തങ്ങളുടെ പരാജയം മറച്ചുവയ്ക്കാന്‍ രാജ്യത്തിന്റെ തെക്കന്‍ മേഖലയിലും കിഴക്കന്‍ മേഖലയിലും റഷ്യ ആക്രമണം കടുപ്പിക്കുകയാണെന്ന് സെലെന്‍സ്‌കി ആരോപിച്ചു.