റഷ്യയും 22ാമത്തെ സൈനിക ശക്തി മാത്രമായ യുക്രെയ്‌നും തമ്മില്‍ നടക്കുന്ന യുദ്ധം പഠന വിധേയമാക്കാന്‍ ഒരുങ്ങി ഇന്ത്യന്‍ സൈന്യം. യുദ്ധത്തിനായി റഷ്യ ചെലവഴിക്കുന്ന പണം, യുദ്ധ തന്ത്രങ്ങളും അതിലെ പാളിച്ചകളും റഷ്യന്‍ സൈനിക ഉപകരണങ്ങളുടെ പ്രകടനം തുടങ്ങി നിരവധി കാര്യങ്ങളില്‍ വിലയിരുത്തലുകള്‍ നടത്താനാണു സൈന്യം ലക്ഷ്യമിടുന്നത്. ദേശീയ സുരക്ഷാ ആസൂത്രകരുടെ ഉപദേശ പ്രകാരമാണ് നീക്കം. യുക്രെയ്ന്‍ അധിനിവേശത്തിലൂടെ റഷ്യന്‍ പ്രസിഡന്റ് വ്‌ലാഡിമിര്‍ പുട്ടിന്‍ നേടിയ നയതന്ത്ര നേട്ടങ്ങളും കോട്ടങ്ങളും സൈന്യം വിലയിരുത്തും.

ഫെബ്രുവരി 24ന് പുലര്‍ച്ചെ കീവിലും മരിയുപോളിലും ഒഡേസയിലും റഷ്യ ആക്രമണം തുടങ്ങുമ്പോള്‍ ഏറിയാല്‍ ഒരാഴ്ചയ്ക്കുള്ളില്‍ യുക്രെയ്‌നില്‍ റഷ്യന്‍ അനുകൂല സര്‍ക്കാരിനെ പ്രതിഷ്ഠിച്ച് മടങ്ങാമെന്നായിരുന്നു കണക്കുകൂട്ടല്‍. യുക്രെയ്‌നിലെ റഷ്യന്‍ അധിനിവേശം പുട്ടിന്റെ പദ്ധതിയായിരുന്നു. എന്നാല്‍ യുക്രെയ്!നില്‍ റഷ്യന്‍ ആക്രമണം ശക്തമായ നഗരങ്ങളിലെല്ലാം റഷ്യ പ്രതീക്ഷിച്ചതിലും ഏറെ ശക്തമായാണ് യുക്രെയ്ന്‍ പ്രതിരോധിച്ചത്. യുദ്ധം ആരംഭിച്ച ശേഷം സൈനിക നീക്കവുമായി ബന്ധപ്പെട്ട് പല ചോദ്യങ്ങള്‍ ഉയര്‍ന്നുവെന്നും യുദ്ധത്തില്‍ നിരവധി റഷ്യന്‍ സൈനിക കമാന്‍ഡര്‍മാരെ യുക്രെയ്ന്‍ വധിച്ചത് റഷ്യന്‍ സൈന്യത്തിന്റെ ഏകോപനത്തെയും മുന്നേറ്റത്തെയും പ്രതികൂലമായി ബാധിച്ചുവെന്നും 15 കോര്‍പ്‌സ് മുന്‍ കമാന്‍ഡര്‍ ലഫ്. ജനറല്‍ സുബ്രത സാഹ ഹിന്ദുസ്ഥാന്‍ ടൈംസിനോട് പറഞ്ഞു.

യുദ്ധത്തില്‍ റഷ്യയ്ക്ക് 476 ടാങ്കുകള്‍ നഷ്ടമായെന്നാണു പുറത്തുവന്ന കണക്കുകള്‍. ഇത് ഇന്ത്യയെ സംബന്ധിച്ച് നിര്‍ണായകമാണ്. റഷ്യയില്‍നിന്ന് ഇറക്കുമതി ചെയ്യുന്ന ടാങ്കുകളെയാണ് ഇന്ത്യ കൂടുതല്‍ ആശ്രയിക്കുന്നത്. ഇന്ത്യന്‍ വ്യോമസേനയുടെ നിര്‍ണായകമായ പല ആയുധശേഖരങ്ങളും റഷ്യയില്‍നിന്ന് ഇറക്കുമതി ചെയ്യുന്നതിനാല്‍ ഇന്ത്യയ്ക്ക് യുദ്ധതന്ത്രങ്ങള്‍ സംബന്ധിച്ച് പുനരാലോചന വേണ്ടിവരും. റഷ്യയ്ക്ക് മേല്‍ മറ്റ് വിദേശ രാജ്യങ്ങള്‍ ഏര്‍പ്പെടുത്തിയിരിക്കുന്ന ഉപരോധം രാജ്യത്തെ പ്രതികൂലമായി ബാധിക്കുമെന്നും ഇന്ത്യന്‍ സൈന്യം വിലയിരുത്തുന്നു. വരും നാളുകളില്‍ സമാനമായ യുദ്ധ സാഹചര്യങ്ങള്‍ മെച്ചപ്പെട്ട രീതിയില്‍ മറികടക്കുന്നതിനും ഇതിനുള്ള തയാറെടുപ്പുകള്‍ സജീവമാക്കാനുമാണ് ഇന്ത്യന്‍ സൈന്യം യുക്രെയ്!ന്‍ യുദ്ധം പഠനവിധേയമാക്കുന്നത്.

റഷ്യയുടെ ആക്രമണത്തില്‍ തന്ത്രപരമായ പിശകകുകളുണ്ടെന്നാണ് പേര് വെളിപ്പെടുത്താല്‍ ആഗ്രഹിക്കാത്ത മുന്‍ ഉന്നത സൈനിക ഉദ്യോഗസ്ഥന്റെ വിലയിരുത്തല്‍. തുടക്കത്തില്‍ ഗോലിയാത്തും ദാവീദും തമ്മിലുള്ള യുദ്ധമെന്നായിരുന്നു വിശേഷണമെങ്കിലും അധികം വൈകാതെ ആ സ്ഥിതി മാറി. ഏത് രാജ്യമാണ് ടാങ്ക് ഓപ്പറേഷനു പോകുമ്പോള്‍ ബാക്കപ്പ് ഇല്ലാതെ പോകുകയെന്ന് അദ്ദേഹം ചോദിക്കുന്നു. രാത്രി ആക്രമണങ്ങളിലെ റഷ്യന്‍ വ്യോമസേനയുടെ മേധാവിത്വത്തിന് നേരേയും ചോദ്യങ്ങള്‍ ഉയരുക തന്നെ ചെയ്യും. റഷ്യയുടെ പ്രഖ്യാപിത ലക്ഷ്യമായ കീവ് കീഴടക്കാന്‍ ഇതുവരെ സാധിച്ചില്ല. ഡോണ്‍ബാസ് മേഖല കേന്ദ്രീകരിച്ചാണ് ഇപ്പോള്‍ പ്രധാനമായും ആക്രമണം നടക്കുന്നത്.