യുദ്ധംചെയ്യാന് 12,664 കോടി വീണ്ടും ഇറക്കി അമേരിക്ക റഷ്യ പരാജയപ്പെടുന്നു; തെളിവുകള് നിരത്തി ആന്റണി ബ്ലിങ്കന് ലക്ഷ്യങ്ങള് കൈവിട്ട് പുടിന്
യുക്രൈന്റെ പലഭാഗങ്ങളിലും റഷ്യന് ക്രൂരതകള് അരങ്ങേറുന്നതായി അമേരിക്കന് വിദേശകാര്യ സെക്രട്ടറി ആന്റണി ബ്ലിങ്കന്. എന്നാല്, യുദ്ധത്തിന്റെ ലക്ഷ്യങ്ങള് നിറവേറ്റുന്നതില്നിന്ന് റഷ്യ പരാജയപ്പെടുന്നതായി ബ്ലിങ്കന് പറഞ്ഞു.
യുക്രൈന് പ്രസിഡന്റ് വൊളോദിമിര് സെലെന്സ്കിയുമായി യുക്രൈന്പോളണ്ട് അതിര്ത്തിയില് കൂടിക്കാഴ്ച നടത്തിയശേഷം പ്രതികരിക്കുകയായിരുന്നു അദ്ദേഹം. യുക്രൈനിലെ റഷ്യന് അധിനിവേശത്തിനുശേഷം നടക്കുന്ന ആദ്യ അമേരിക്കന് ഉന്നതതല യോഗമാണ് ഞായറാഴ്ച നടന്നത്. പ്രതിരോധ സെക്രട്ടറി ലോയിഡ് ഓസ്റ്റിനൊപ്പമാണ് ബ്ലിങ്കന് യുക്രൈനിലെത്തിയത്.
യുക്രൈന് 12,664 കോടി രൂപയുടെ യുദ്ധോപകരണങ്ങള് അമേരിക്ക നല്കുമെന്ന് നേതാക്കള് യോഗത്തില് വാക്കുനല്കി. സൈനിക രംഗത്ത് 23,024 കോടി രൂപയുടെ സഹായവും യു.എസ്. വാഗ്ദാനം ചെയ്തു. സഹായ സഹകരണങ്ങള്ക്ക് അമേരിക്കയോടും പ്രസിഡന്റ് ജോ ബൈഡനോടും സെലെന്സ്കി നന്ദി പറഞ്ഞു..
മരിച്ച റഷ്യന് സൈനികരുടെയും തകര്ത്ത ടാങ്കുകളുടെയും വിമാനങ്ങളുടെയും കണക്ക് പുറത്തുവിട്ട് യുക്രൈന്. റഷ്യയ്ക്ക് 21,200 സൈനികരെ നഷ്ടപ്പെട്ടതായി യുക്രൈന്. അധിനിവേശം തുടങ്ങിയ ഫെബ്രുവരി 24നുശേഷം 838 ടാങ്കുകളും 176 വിമാനങ്ങളും 153 ഹെലിക്കോപ്റ്ററുകളും റഷ്യയ്ക്ക് നഷ്ടപ്പെട്ടതായും യുക്രൈന് സൈന്യം അവകാശപ്പെട്ടു. മോസ്കോയ്ക്ക് കനത്ത നാശനഷ്ടമാണ് അധിനിവേശത്തെ തുടര്ന്ന് നേരിടേണ്ടിവന്നതെന്ന് യുക്രൈന് വിദേശകാര്യ മന്ത്രാലയം ട്വിറ്ററിലൂടെ അവകാശപ്പെട്ടു. റഷ്യയും യുക്രൈനും തമ്മിലുള്ള യുദ്ധം 58 ദിവസം പിന്നിടുമ്പോഴാണ് റഷ്യയ്ക്ക് നേരിടേണ്ടിവന്ന ആള്നാശത്തിന്റെയടക്കം കണക്കുകള് യുക്രൈന് പുറത്തുവിട്ടിട്ടുള്ളത്. 2162 കവചിത വാഹനങ്ങള്, 397 പീരങ്കികള്, 1523 വാഹനങ്ങള്, എട്ട് ബോട്ടുകള്, 76 ഇന്ധന ടാങ്കുകള് തുടങ്ങിയവയും റഷ്യന് സേനയ്ക്ക് നഷ്ടപ്പെട്ടുവെന്നാണ് യുക്രൈന് പറയുന്നത്.
മരിയോപോള് നഗരത്തിന്റെ നിയന്ത്രണം ഏറ്റെടുത്തതായി റഷ്യ കഴിഞ്ഞ ദിവസം അവകാശപ്പെട്ടിരുന്നു. തൊട്ടുപിന്നാലെ നഗരത്തില്നിന്ന് ഒരു ഈച്ചപോലും രക്ഷപ്പെടരുതെന്ന് റഷ്യന് പ്രസിഡന്റ് വഌദിമിര് പുതിന് സൈന്യത്തോട് നിര്ദ്ദേശിച്ചിരുന്നു. അതിനിടെ മരിയോപോള് നഗരത്തിലെ സ്റ്റീല് പ്ലാന്റിലുള്ള യുക്രൈന് സൈനികര് കീഴടങ്ങാന് തയ്യാറായാല് താത്കാലിക വെടിനിര്ത്തല് പ്രഖ്യാപിക്കാന് ഒരുക്കമാണെന്ന് റഷ്യ വെള്ളിയാഴ്ച വ്യക്തമാക്കിയിരുന്നു. സ്റ്റീല്പ്ലാന്റില് യുക്രൈന് സൈനികര്ക്കൊപ്പം നൂറുകണക്കിന് സാധാരണക്കാരും അഭയം തേടിയിട്ടുണ്ടെന്നാണ് വിവരം.
https://www.facebook.com/Malayalivartha