അത്യാധുനിക ആയുധങ്ങള്‍ ഏത് ഘട്ടത്തിലും യുക്രെയ്‌നില്‍ ഉപയോഗിക്കാന്‍ മടിക്കില്ലെന്ന് റഷ്യന്‍ പ്രസിഡന്റ് വഌഡിമിര്‍ പുട്ടിന്റെ ഭീഷണി. പാശ്ചാത്യ രാജ്യങ്ങളുടെ ഇടപെടലുകളാണ് യുക്രെയ്‌നിലെ സൈനിക നടപടിക്കു കാരണമായതെന്നാണ് പുട്ടിന്‍ പറയുന്നത്.റഷ്യയെ ഛിന്നഭിന്നമാക്കാനാണ് പാശ്ചാത്യ ശക്തികളുടെ ശ്രമം. യുക്രെയ്‌നിലെ സംഭവവികാസങ്ങളില്‍ ഇടപെടുന്നവര്‍ ആരായാലും തിരിച്ചടി ലഭിക്കുക തന്നെ ചെയ്യുമെന്നും വഌഡിമിര്‍ പുട്ടിന്‍ മുന്നറിയിപ്പു നല്‍കി.

യുക്രെയ്‌നെ സംഘര്‍ഷത്തിലേക്ക് തള്ളിയിട്ടത് അവരാണ്. യുക്രെയ്‌നില്‍ ഇടപെടുന്നവര്‍ ആരായാലും മിന്നല്‍ വേഗത്തിലുള്ള തിരിച്ചടി ലഭിക്കുമെന്നും പുട്ടിന്‍ പറഞ്ഞു. സെന്റ് പീറ്റേഴ്‌സ്ബര്‍ഗില്‍ റഷ്യന്‍ നിയമനിര്‍മാണ സഭയിലെ അംഗങ്ങളോട് സംസാരിക്കുകയായിരുന്നു അദ്ദേഹം. യുക്രെയ്‌ന് വിദേശശക്തികള്‍ വന്‍തോതില്‍ ആയുധവും പണവും നല്‍കണമെന്നും ബ്രിട്ടന്‍ നല്‍കിയ ആയുധങ്ങള്‍ ഉപയോഗിച്ചാണ് റഷ്യന്‍ അധിനിവേശത്തെ യുക്രെയ്ന്‍ പ്രതിരോധിച്ചതെന്നും യുകെ വിദേശകാര്യ സെക്രട്ടറി ലിസ് ട്രസ് പറഞ്ഞതിനു തൊട്ടുപിന്നാലെയാണ് ബ്രിട്ടനെയും നാറ്റോ രാജ്യങ്ങളെയും ഉന്നമിട്ട് വഌഡിമിര്‍ പുട്ടിന്‍ രംഗത്തെത്തിയത്. പാശ്ചാത്യ ശക്തികള്‍ ടാങ്കുകളും യുദ്ധവിമാനങ്ങളും യുക്രെയ്‌നിലേക്ക് അയയ്ക്കണമെന്നും ലിസ് ട്രസ് ആവശ്യപ്പെട്ടിരുന്നു. റഷ്യയ്‌ക്കെതിരെ യുക്രെയ്!ന്‍ നടത്തുന്ന വ്യോമാക്രമണത്തെ ബ്രിട്ടന്‍ പിന്തുണയ്ക്കുന്നുവെന്ന് സായുധസേനാ മന്ത്രി ജയിംസ് ഹീപ്പി പറഞ്ഞതും റഷ്യന്‍ പ്രകോപനത്തിന് കാരണമായെന്നാണു വിലയിരുത്തല്‍. യുക്രെയ്‌ന്റെ പ്രത്യാക്രമണം നിയമാനുസൃതമാണെന്നും ഹീപ്പി അഭിപ്രായപ്പെട്ടിരുന്നു.

അതിനിടെ, യുക്രെയ്‌നിലെ അധിനിവേശത്തെ എതിര്‍ക്കുന്ന അയല്‍രാജ്യങ്ങളായ ബള്‍ഗേറിയയ്ക്കും പോളണ്ടിനുമുള്ള പ്രകൃതിവാതക വിതരണം നിര്‍ത്തിവച്ച റഷ്യന്‍ നടപടി ബ്ലാക്‌മെയിലിങ് ആണെന്ന് യൂറോപ്യന്‍ കമ്മിഷന്‍ പ്രസിഡന്റ് ഉര്‍സുല വോണ്‍ ദേര്‍ ലെയ്ന്‍ ആരോപിച്ചു. യുഎസിന്റെയും യൂറോപ്യന്‍ രാജ്യങ്ങളുടെയും ഉപരോധങ്ങളെ മറികടക്കാന്‍ പ്രകൃതിവാതകത്തിന്റെ വില റൂബിളില്‍ വേണമെന്ന് റഷ്യ ആവശ്യപ്പെടുമ്പോള്‍ ഉപരോധങ്ങളൊന്നും ഏശിയിട്ടെല്ലെന്ന മട്ടില്‍ റൂബിള്‍ 2 വര്‍ഷത്തെ ഏറ്റവും മെച്ചപ്പെട്ട നിലയിലേക്കുയര്‍ന്നു. യുക്രെയ്ന്‍ യുദ്ധത്തെത്തുടര്‍ന്നുണ്ടായ ഉപരോധങ്ങളുടെ തുടര്‍ച്ചയായി മാര്‍ച്ച് ഏഴിന് ഒരു ഡോളറിന് 139 റൂബിള്‍ വരെ ഇടിഞ്ഞ കറന്‍സി റഷ്യന്‍ സെന്‍ട്രല്‍ ബാങ്കിന്റെ നടപടികളെത്തുടര്‍ന്ന് പഴയ നിലയിലേക്ക് തിരിച്ചെത്തുകയായിരുന്നു. ഇന്നലെ ഡോളറിന് 74 റൂബിള്‍ ആയിരുന്നു വിനിമയനിരക്ക്.

യുക്രെയ്‌ന് ആയുധം നല്‍കുന്ന ബ്രിട്ടന്റെ സൈനിക കേന്ദ്രങ്ങളില്‍ ബോംബാക്രമണം നടത്താന്‍ മടിക്കില്ലെന്ന് റഷ്യന്‍ പ്രതിരോധ മന്ത്രാലയം മുന്നറിയിപ്പ് നല്‍കിയിരുന്നു. റഷ്യന്‍ സൈനിക വിന്യാസത്തെ തടസ്സപ്പെടുത്തുകയും യുക്രെയ്‌ന് ആയുധം നല്‍കി എരിതീയില്‍ എണ്ണ ഒഴിക്കുകയും ചെയ്യുന്ന നാറ്റോ രാജ്യങ്ങളുടെ സൈനിക കേന്ദ്രങ്ങള്‍ ആക്രമിക്കാന്‍ റഷ്യയ്ക്ക് കഴിയുമെന്ന് നിങ്ങള്‍ മനസിലാക്കുന്നില്ലേ എന്നായിരുന്നു റഷ്യന്‍ വിദേശകാര്യ വക്താവ് മരിയ സഖരോവയുടെ ചോദ്യം.

ഇത് യുക്രെയ്ന്‍ നയിക്കുന്ന യുദ്ധമല്ലെന്നും ഈ യുദ്ധം നാം ഓരോരുത്തര്‍ക്കും വേണ്ടിയാണ് നടക്കുന്നതെന്നും ലിസ് ട്രസ് പറഞ്ഞതിനു പിന്നാലെയാണ് മരിയ സഖരോവയുടെ പ്രസ്താവന. റഷ്യയെ യുക്രെയ്ന്‍ മണ്ണില്‍നിന്ന് തുരുത്തുന്നതുവരെ സാധ്യമായ എല്ലാ സഹായവും ബ്രിട്ടന്‍ നല്‍കുമെന്നും ലിസ ട്രസ് ഉറപ്പുനല്‍കിയിരുന്നു. അതേസമയം, പടിഞ്ഞാറന്‍ രാജ്യങ്ങള്‍ റഷ്യയ്‌ക്കെതിരെ നിഴല്‍ യുദ്ധത്തില്‍ ഏര്‍പ്പെട്ടിരിക്കുകയാണെന്നും യുക്രെയ്‌ന് സൈനിക സഹായം നല്‍കുകയും സഹായ ഹസ്തം നീട്ടുകയും ചെയ്യുന്നവര്‍ക്കെതിരെ ഏത് നടപടിക്കും മടിക്കില്ലെന്നും റഷ്യന്‍ പ്രതിരോധ മന്ത്രാലയം മുന്നറിയിപ്പ് നല്‍കി.