സമാധാന ശ്രമങ്ങള്‍ക്കായി എത്തിയ ഐക്യരാഷ്ട്രസഭാ സെക്രട്ടറി ജനറല്‍ താമസിക്കുന്ന ഹോട്ടലിന് നേരെ റഷ്യയുടെ മിസൈല്‍ ആക്രമണം നടന്നതായാണ് റിപ്പോര്‍ട്ട്. ഹോട്ടലിന്റെ ഒരു ഭാഗത്തും കാര്‍ പാര്‍ക്കിംഗ് മേഖലയിലുമായി രണ്ട് മിസൈലുകളാണ് പതിച്ചത്. ആക്രമണ സമയത്ത് ഗുട്ടാറസ് ഹോട്ടലില്‍ ഉണ്ടായിരുന്നില്ല. റഷ്യയുടേത് തനി കാടത്തമെന്നും ലോകം അപലപിക്കണമെന്നും പ്രസിഡന്റ് സെലന്‍സ്‌കി പറഞ്ഞു.

ലോകരാഷ്ട്രങ്ങള്‍ ചേരിതിരിഞ്ഞ് റഷ്യക്കെതിരെ നില്‍ക്കുമ്പോഴാണ് യുക്രെയ്‌നെതിരായ ആക്രമണം നിര്‍ത്തണമെന്ന ആവശ്യവുമായി ഗുട്ടാറസ് രണ്ടു മേഖലയിലും സന്ദര്‍ശനം നടത്തുന്നത്. ആദ്യം മോസ്‌കോയിലെത്തി പുടിനുമായി സംസാരിച്ച ശേഷമാണ് ഗുട്ടാറസ് യുക്രെയ്‌നിലെത്തിയത്. ഇതിനിടെ യുക്രെയ്‌ന് നേരെയുള്ള റഷ്യയുടെ ആക്രമണം നടക്കാതിരിക്കാന്‍ ഐക്യരാഷ്ട്ര രക്ഷാ കൗണ്‍സില്‍ തീര്‍ത്തും പരാജയപ്പെട്ടെന്ന് ഗുട്ടാറസ് തുറന്നു സമ്മതിച്ചിരിക്കുകയാണ്.

യുക്രെയ്‌ന്റെ പോരാട്ടം റഷ്യ വിചാരിച്ചതിലും ശക്തമായി തുടുരുന്നതാണ് യുദ്ധം നീളാനുള്ള കാരണമെന്നാണ് ലോകരാഷ്ട്രങ്ങള്‍ വിലയിരുത്തുന്നത്.മൂന്ന് പ്രവിശ്യകള്‍ മാത്രമാണ് ഫെബ്രുവരി 24 മുതല്‍ തുടര്‍ച്ചയായി ആക്രമിക്കുന്ന റഷ്യയ്ക്ക് പിടിച്ചെടുക്കാനായത്. ഇതിനിടെ അമേരിക്കയും ബ്രിട്ടണും കാനഡയും ജര്‍മ്മനിയും യുക്രെയ്‌ന് ആയുധം എത്തിക്കാന്‍ തുടങ്ങിയതോടെയാണ് റഷ്യ ആക്രമണം ശക്തമാക്കിയത്.

കിഴക്കന്‍ യുക്രെയ്‌നില്‍ റഷ്യ ആക്രമണം ശക്തമാക്കി. വ്യവസായ മേഖലയായ ഡോണ്‍ബാസിലും സമീപമുള്ള ഡോണെറ്റ്‌സ്‌ക്, ഹര്‍കീവ് എന്നിവിടങ്ങളിലും തുടരെ മിസൈല്‍ ആക്രമണമുണ്ടായി. മുങ്ങിക്കപ്പലുകള്‍ ഉള്‍പ്പെടെ റഷ്യയുടെ 20 പടക്കപ്പലുകള്‍ കരിങ്കടലില്‍ സജ്ജമായി നില്‍ക്കുന്നു. യുക്രെയ്ന്‍ തീരമേഖലയില്‍ കനത്ത ആക്രമണമുണ്ടാകുമെന്ന് മുന്നറിയിപ്പുണ്ട്. ഇതേസമയം, റഷ്യന്‍ സേന പിടിച്ച ഹഴ്‌സന്‍ നഗരത്തിലെ ടെലിവിഷന്‍ ടവറിനു സമീപം യുക്രെയ്ന്‍ കനത്ത പ്രത്യാക്രമണം നടത്തി.

റഷ്യന്‍ സേന പിന്‍വാങ്ങിയ മരിയുപോളില്‍ പകര്‍ച്ചവ്യാധി ഭീഷണിയുണ്ട്. റഷ്യന്‍ പ്രസിഡന്റ് വ്‌ലാഡിമിര്‍ പുട്ടിനും യുക്രെയ്ന്‍ പ്രസിഡന്റ് വൊളോഡിമിര്‍ സെലെന്‍സ്‌കിയുമായി കൂടിക്കാഴ്ച നടത്തിയ യുഎന്‍ സെക്രട്ടറി ജനറല്‍ അന്റോണിയോ ഗുട്ടെറസ് റഷ്യന്‍ സേന കനത്ത നാശമുണ്ടാക്കിയ പട്ടണങ്ങള്‍ സന്ദര്‍ശിച്ചു. കൂട്ടക്കുഴിമാടങ്ങള്‍ കണ്ടെത്തിയ ബുച്ചയില്‍ രാജ്യാന്തര ഏജന്‍സിയുടെ അന്വേഷണം ആവശ്യമാണെന്ന് അദ്ദേഹം പറഞ്ഞു. മരിയുപോളിലെ അസോവാസ്റ്റല്‍ സ്റ്റീല്‍ പ്ലാന്റില്‍ യുക്രെയ്ന്‍ പോരാളികള്‍ക്കൊപ്പം കുടുങ്ങിയ ആയിരത്തോളം പേരെ രക്ഷപ്പെടുത്തുന്നതിനുള്ള യുഎന്‍ പദ്ധതിക്ക് പുട്ടിന്‍ സമ്മതം നല്‍കിയതായും പറഞ്ഞു.

നാറ്റോ രാജ്യങ്ങളായ പോളണ്ടിനും ബള്‍ഗേറിയയ്ക്കും പ്രകൃതിവാതകം നല്‍കുന്നതു നിര്‍ത്തിയ റഷ്യന്‍ നടപടിയെ പ്രതിരോധിക്കാന്‍ യൂറോപ്യന്‍ രാജ്യങ്ങള്‍ സംയുക്തശ്രമം തുടങ്ങി. വില റൂബിളില്‍ നല്‍കണമെന്ന പുട്ടിന്റെ ആവശ്യം അംഗീകരിക്കില്ലെന്ന് തീരുമാനിച്ചിട്ടുണ്ട്. ബള്‍ഗേറിയന്‍ തുറമുഖമായ വര്‍നയിലൂടെ യുക്രെയ്‌നില്‍ നിന്നുള്ള ഭക്ഷ്യധാന്യങ്ങള്‍ കയറ്റുമതി ചെയ്യാന്‍ ഇരുരാജ്യങ്ങളും ധാരണയായി.

പിടിച്ചെടുത്ത യുക്രെയ്ന്‍ പ്രദേശങ്ങളില്‍ വ്യാജ ഹിതപരിശോധന നടത്താന്‍ റഷ്യ നീക്കം നടത്തുന്നതായി യുഎസ് ആരോപിച്ചു. റഷ്യ സൈനിക നടപടി അവസാനിപ്പിക്കുംവരെ യുഎസും നാറ്റോയും യുക്രെയ്‌നിനു സഹായം തുടരുമെന്ന് പ്രസിഡന്റ് ജോ ബൈഡന്‍ വ്യക്തമാക്കി.