രാജ്യത്ത് കൊവിഡ് വ്യാപനം രൂക്ഷമാവുകയാണെന്ന് ഉത്തരകൊറിയന്‍ ഏകാധിപതി കിം ജോങ് ഉന്‍. മൂന്നു ദിവസത്തിനുള്ളില്‍ രാജ്യത്ത് എട്ടുലക്ഷത്തിലധികം കേസുകള്‍ റിപ്പോര്‍ട്ട് ചെയ്തു. 42 പേര്‍ മരണത്തിന് കീഴടങ്ങി. രോഗം ബാധിച്ച 8,20,620 പേരില്‍ 3,24,550 പേര്‍ ചികിത്സയിലാണുള്ളത്. ഇതോടെ, രാജ്യത്താകെ അടച്ചുപൂട്ടല്‍ പ്രഖ്യാപിച്ചിരിക്കുകയാണ്.

വാക്‌സീന്‍ സ്വീകരിക്കാത്തവര്‍ വഴി രോഗം പടരുന്നത് ഒഴിവാക്കാന്‍ പരമാവധി ക്വാറന്റൈന്‍ ഏര്‍പ്പെടുത്തുകയാണ് ഉത്തര കൊറിയ. രാജ്യത്തെ എല്ലാ പ്രവിശ്യകളും നഗരങ്ങളും ലോക്ഡൗണിലാണെന്നും നിര്‍മ്മാണ യൂണിറ്റുകളും താമസകേന്ദ്രങ്ങളും അടച്ചിട്ടതായി മാധ്യമങ്ങള്‍ റിപ്പോര്‍ട്ട് ചെയ്തു.

അതേസമയം, ഉത്തരകൊറിയയിലെ ആരോഗ്യരംഗം ലോകത്തില്‍ തന്നെ ഏറ്റവും മോശം അവസ്ഥയിലാണെന്നാണ് വാര്‍ത്തകള്‍. കൊവിഡ് വാക്‌സിനേഷനോ ആന്റി വൈറല്‍ ചികിത്സയോ കൂട്ട പരിശോധനാ സംവിധാനങ്ങളോ രാജ്യത്തില്ല. നേരത്തെ, ചൈനയും ലോകാരോഗ്യ സംഘടനയും വാഗ്ദാനം ചെയ്ത കൊവിഡ് വാക്‌സീന്‍ ഉത്തരകൊറിയ സ്വീകരിച്ചിരുന്നില്ല എന്നും റിപ്പോര്‍ട്ടുകള്‍ പറയുന്നു.