യുദ്ധക്കെടുത്തിക്കിടെ ലോകത്തെ നടുക്കി അടുത്ത ദുരന്തം; നെട്ടോട്ടമോടി യൂറോപ്യന് രാജ്യങ്ങള് അടിയന്തര യോഗം വിളിച്ച് ഡബ്ല്യു.എച്ച്.ഒ
യൂറോപ്യന് രാജ്യങ്ങളില് കുരങ്ങുപനി സ്ഥിരീകരിച്ചതോടെ അടിയന്തര യോഗം വിളിച്ച് ലോകാരോഗ്യ സംഘന. ആഫ്രിക്കന് ഭാഗങ്ങളില് മാത്രം കണ്ടുവന്നിരുന്ന കുരങ്ങുപനി യൂറോപ്പ്, അമേരിക്ക തുടങ്ങിയ മേഖലകളിലേക്ക് വ്യാപിക്കുന്നതില് ലോകാരോഗ്യ സംഘടന ഉള്പ്പെടെയുള്ള ആരോഗ്യ ഏജന്സികള് ആശങ്കയിലാണ്. കോവിഡിന് പിന്നാലെ കുരങ്ങുപനി റിപ്പോര്ട്ട് ചെയ്തതോടെ പുതിയ പകര്ച്ചവ്യാധിയെ കുറിച്ചുള്ള ആശങ്കയിലാണ് ലോകരാജ്യങ്ങള്.
കാനഡ, ഓസ്ട്രേലിയ, അമേരിക്ക എന്നിവയ്ക്ക് പുറമേ ബെല്ജിയം, ഫ്രാന്സ്, ജര്മനി, നെതര്ലാന്ഡ്, സ്പെയിന്, ഇറ്റലി, യുകെ, സ്വീഡന്, പോളണ്ട് എന്നീ രാജ്യങ്ങളിലാണ് രോഗം റിപ്പോര്ട്ട് ചെയ്തത്. സ്പെയിനില് 24 പുതിയ കേസുകളാണ് വെള്ളിയാഴ്ച റിപ്പോര്ട്ട് ചെയ്തത്. മാഡ്രിഡ് നഗരത്തില് രോഗബാധയുമായി ബന്ധമുണ്ടെന്ന് കണ്ടെത്തിയതിനേ തുടര്ന്ന് ഒരു സ്നാനകേന്ദ്രം പ്രാദേശിക ഭരണകൂടം അടച്ചുപൂട്ടി. പടിഞ്ഞാറന് യൂറോപ്പില് നിന്നെത്തിയ ഓള്ക്ക് ഇസ്രായേലില് രോഗലക്ഷണങ്ങള് സ്ഥിരീകരിച്ചിട്ടുണ്ട്.
പുരുഷന്മാരുമായി ലൈംഗിക ബന്ധത്തില് ഏര്പ്പെടുന്ന പുരുഷന്മാര്, ത്വക്കില് അസാധാരണമായ വിധത്തിലുള്ള ചൊറിച്ചിലോ കുമിളകളോ ഉണ്ടെങ്കില് എത്രയും പെട്ടെന്ന് വൈദ്യസഹായം തേടണമെന്ന് യുകെ ഹെല്ത്ത് സെക്യൂരിറ്റി ഏജന്സി മുന്നറിയിപ്പ് നല്കി. സ്വവര്ഗാനുരാഗികളിലും പുരുഷന്മാരുമായി ലൈംഗിക ബന്ധത്തില് ഏര്പ്പെടുന്ന പുരുഷന്മാരിലും പ്രധാനമായും കുരങ്ങുപനി റിപ്പോര്ട്ട് ചെയ്ത സാഹചര്യത്തിലാണ് ഏജന്സിയുടെ മുന്നറിയിപ്പ്. രോഗം ഏളുപ്പത്തില് പടരില്ലെന്നും എന്നാല്, കുടുതല് കേസുകളും സ്വവര്ഗാനുരാഗികളിലാണെന്നും അവര് പറയുന്നു.
വൈറസ്ബാധയുള്ള മൃഗങ്ങളില് നിന്നോ മനുഷ്യരില് നിന്നോ ആണ് രോഗം പകരുന്നത്. പനി, പേശിവേദന, ക്ഷീണം, ലിംഫ് ഗ്രന്ഥികളിലെ വീക്കം എന്നിവയാണ് കുരങ്ങുപനിയുടെ പ്രാഥമിക ലക്ഷണങ്ങള്. പിന്നീട് ചിക്കന്പോക്സിലുണ്ടാകുന്നതു പോലെ കുമിളകള് മുഖത്തും ശരീരത്തിലും പ്രത്യക്ഷപ്പെടും. വൈറസ് മൂലമുണ്ടാകുന്ന കുരങ്ങുപനി ബാധിച്ചാല് ഏതാനും ആഴ്ചകള്ക്കുള്ളില് രോഗി സുഖം പ്രാപിക്കും. എങ്കിലും അപൂര്വ്വമായി മരണം സംഭവിക്കാറുണ്ട്. എന്നാല്, കുരങ്ങുപനിയില് മരണനിരക്ക് പൊതുവെ കുറവാണ്.
1958ലാണ് ആദ്യമായി കുരങ്ങുകളില് രോഗം സ്ഥിരീകരിച്ചത്. 1970ലാണ് ആദ്യമായി മനുഷ്യരില് രോഗബാധ കണ്ടെത്തിയത്.1970 മുതല് 11 ആഫ്രിക്കന് രാജ്യങ്ങളിലാണ് രോഗം സ്ഥിരീകരിച്ചത്. കഴിഞ്ഞ കൊല്ലങ്ങളില് മധ്യ, പടിഞ്ഞാറന് ആഫ്രിക്കന് ഭാഗങ്ങളില് ആയിരക്കണക്കിനാളുകള്ക്കാണ് കുരങ്ങുപനി ബാധിച്ചത്. 2017ന് ശേഷം നൈജീരിയയിലാണ് ഏറ്റവും വലിയ രോഗവ്യാപനമുണ്ടായത്. ഈ വര്ഷം മാത്രം കുരങ്ങുപനിയെന്ന് സംശയിക്കുന്ന 46 കേസുകളാണ് ലോകത്താകമാനം റിപ്പോര്ട്ട് ചെയ്തത്. മേയ് ഏഴിനാണ് യൂറോപ്പില് ആദ്യമായി രോഗം സ്ഥിരീകരിക്കുന്നത്. നൈജീരിയയില്നിന്ന് മടങ്ങിയ വ്യക്തിയിലാണ് ബ്രിട്ടണില് ആദ്യം വൈറസ്ബാധ സ്ഥിരീകരിച്ചത്.
https://www.facebook.com/Malayalivartha
