ആക്രമണത്തിന് പിന്നാലെ അമേരിക്കയില്‍ ദേശീയ പതാക താഴ്ത്തിക്കെട്ടി.... ദേശീയ ദുഃഖാചരണം പ്രഖ്യാപിച്ച് യുഎസ് ഭരണകൂടം , തോക്ക് നയത്തില്‍ കാര്യമായ മാറ്റം വേണമെന്ന് വൈസ് പ്രസിഡന്റ് കമല ഹാരിസ്

അമേരിക്കയിലെ സ്‌കൂളില്‍ നടന്ന വെടിവെയ്പ്പില്‍ കൊല്ലപ്പെട്ടത് 18 പേര്‍ കുട്ടികളും മറ്റ് സ്‌കൂള്‍ ജീവനക്കാരുമാണ്. അമേരിക്കയിലെ ടെക്സാസിലുള്ള സ്‌കൂളിലാണ് വെടിവെയ്പ്പുണ്ടായത്.

അക്രമിയെ പോലീസ് വെടിവെച്ചു കൊലപ്പെടുത്തിയെന്നാണ് റിപ്പോര്‍ട്ട്. ഇയാള്‍ 18-കാരനായ സാല്‍വദോര്‍ റാമോസാണെന്ന് തിരിച്ചറിഞ്ഞു. സ്വന്തം മുത്തശ്ശിയെ കൊലപ്പെടുത്തിയ ശേഷമാണ് അക്രമി സ്‌കൂളിലെത്തി വെടിവെയ്പ്പ് നടത്തിയത്. അക്രമിയുടെ കൈയ്യില്‍ ഒരു ഹാന്‍ഡ് ഗണ്ണും റൈഫിളുമുണ്ടായിരുന്നു. ടെക്സാസ് ഗവര്‍ണര്‍ ഗ്രഗ് അബോട്ടാണ് ഇക്കാര്യം സ്ഥിരീകരിച്ച് പ്രസ്താവന പുറത്തിറക്കിയത്.

ഏകദേശം 600-ഓളം കുട്ടികള്‍ പഠിക്കുന്ന ടെക്സാസിലെ റോബ് എലമെന്ററി സ്‌കൂളിലാണ് ആക്രമണമുണ്ടായത്. സ്‌കൂള്‍ ക്യാമ്പസില്‍ ഉച്ചയോടെയെത്തിയ തോക്കുധാരി വെടിയുതിര്‍ക്കുകയായിരുന്നു.

അക്രമിയെ കീഴ്പ്പെടുത്തുന്നതിനിടയില്‍ രണ്ട് പോലീസുകാര്‍ക്കും വെടിയേറ്റിട്ടുണ്ട്. ഇവര്‍ ആശുപത്രിയിലാണ്. കൂടാതെ സ്‌കൂളിലെ നിരവധിയാളുകള്‍ക്ക് പരിക്കേറ്റിട്ടുണ്ടെന്നാണ് വിവരം. ടെക്സാസിന്റെ ചരിത്രത്തില്‍ തന്നെ ഏറ്റവും അപലപനീയമായ ആക്രമണമാണ് നടന്നതെന്ന് അമേരിക്കന്‍ മാദ്ധ്യമങ്ങള്‍ റിപ്പോര്‍ട്ട് ചെയ്യുന്നു.

ആക്രമണത്തിന് പിന്നാലെ അമേരിക്കയില്‍ ദേശീയ പതാക താഴ്ത്തിക്കെട്ടി. സൂര്യാസ്തമയം വരെ ദേശീയ പതാക താഴ്ത്തിക്കെട്ടണമെന്നും ശനിയാഴ്ച വരെ തുടരണമെന്നുമാണ് അമേരിക്കന്‍ പ്രസിഡന്റ് ജോ ബൈഡന്റെ നിര്‍ദേശം. യുഎസ് ഭരണകൂടം ദേശീയ ദുഃഖാചരണം പ്രഖ്യാപിച്ചു.

തോക്ക് നയത്തില്‍ കാര്യമായ മാറ്റം വേണമെന്ന് വൈസ് പ്രസിഡന്റ് കമല ഹാരിസ് പ്രതികരിച്ചു. അമേരിക്കന്‍ പ്രസിഡന്റ് അല്‍പ്പസമയത്തിനകം രാജ്യത്തെ അഭിസംബോധന ചെയ്യുമെന്നാണ് സൂചനകള്‍ .