ടെക്‌സാസിലെ സ്‌കൂളില്‍ ഉണ്ടായ വെടിവെപ്പില്‍ 18 കുട്ടികള്‍ ഉള്‍പ്പെടെ 21 പേര്‍ കൊല്ലപ്പെട്ടു. വേനലവധിക്കാലം ആരംഭിക്കാന്‍ മണിക്കൂറുകള്‍ മാത്രം ബാക്കി നില്‍ക്കെയാണ് ആ കുരുന്നുകള്‍ മരണത്തിന് കീഴടങ്ങിയത്.

യു.എസ് പൗരനായ 18 കാരന്‍ സാല്‍വദോര്‍ റമോസാണ് കളിചിരികള്‍ നിറഞ്ഞ പ്രൈമറി സ്‌കൂള്‍ അങ്കണം കുരുതിക്കളമാക്കി മാറ്റിയത്. സൗത്ത് ടെക്‌സാസിലെ ഉവാള്‍ഡെയിലെ റോബ് എലമെന്ററി സ്‌കൂളില്‍ ചൊവ്വാഴ്ച വെടിവെയ്പ്പ് ഉണ്ടായത്. സ്‌കൂളില്‍ അതിക്രമിച്ച് കയറിയ 18കാരന്‍ കുഞ്ഞുങ്ങള്‍ക്ക് നേരേ നിര്‍ത്താതെ വെടിയുതിര്‍ക്കുകയാണ് ചെയ്തത് എന്നാണ വിവരം. മരിച്ച കുട്ടികള്‍ ഏഴിനും 10നും ഇടക്ക് പ്രായമുള്ളവരാണ്.

ആദ്യം വീട്ടിലെത്തി മുത്തശ്ശിയെ വെടിവെച്ചിട്ടു. ശേഷമാണ് 18കാരന്‍ സ്‌കൂളിലെത്തിയത്. തുടര്‍ന്ന് കുട്ടികള്‍ക്ക് നേരെ തോക്ക് നീട്ടി വെടിവെക്കുകയാണ് ഉണ്ടായത്. അതിനിടെ പോലീസ് എത്തി അക്രമിയെ വെടിവെച്ച് കൊന്നു എന്നാണ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.

2012ല്‍ സാന്‍ഡി ഹുക്ക് വെടിവെപ്പില്‍ 20 കുട്ടികളും ആറ് ജീവനക്കാരും മരിച്ച ശേഷം സ്‌കൂളില്‍ നടന്ന ഏറ്റവും ഭീകരമായ വെടിവെപ്പാണിത് എന്നാണ് വിവരം. പ്രാദേശിക സമയം ചൊവ്വാഴ്ച രാവിലെ 11.32ഓടെയാണ് തോക്കുമായെത്തിയ 18കാരന്‍ സ്‌കൂളില്‍ വെടിവെപ്പ് നടത്തിയത്. ഉവാള്‍ഡെയില്‍ താമസിക്കുന്ന റാമോസ് വീട്ടില്‍ മുത്തശ്ശിക്ക് നേരേ വെടിയുതിര്‍ത്ത് കൊലപ്പെടുത്തിയ ശേഷം വാഹനവുമായി സ്‌കൂളിലേക്ക് തിരിക്കുകയായിരുന്നു. സ്‌കൂളിന് പുറത്ത് വാഹനം ഉപേക്ഷിച്ച ശേഷം സ്‌കൂള്‍ കെട്ടിടത്തിനകത്തേക്ക് കയറി. ഇയാളെ തടയാന്‍ സ്‌കൂളിലെ സുരക്ഷാജീവനക്കാര്‍ ശ്രമിച്ചെങ്കിലും അക്രമി കെട്ടിടത്തിനകത്തേക്ക് പോവുകയും വിവിധ ക്ലാസ്മുറികളില്‍ കയറി വെടിയുതിര്‍ക്കുകയുമായിരുന്നു.

സംഭവത്തെ തുടര്‍ന്ന് വൈറ്റ് ഹൗസ് ദേശീയ പതാക താഴ്ത്തിക്കെട്ടി. ദിവസങ്ങള്‍ക്ക് മുമ്പ് ന്യൂയോര്‍ക്കിലെ ബഫലോയില്‍ 18 കാരന്‍ നടത്തിയ വെടിവെപ്പില്‍ 10 പേര്‍ മരിച്ചിരുന്നു. ബഫലോ നഗരത്തിലെ സൂപ്പര്‍മാര്‍ക്കറ്റിലാണ് വെടിവെപ്പ് ഉണ്ടായത്. കൊല്ലപ്പെട്ടവരില്‍ ഭൂരിഭാഗവും കറുത്ത വംശജരാണ്.

മൂന്നുപേര്‍ക്ക് പരിക്കേറ്റിരുന്നു. ആക്രമണത്തിനു പിന്നില്‍ വര്‍ണവെറിയാണെന്നാണ് അധികൃതര്‍ പറഞ്ഞത്. ആക്രമണത്തിന്റെ ദൃശ്യങ്ങള്‍ പ്രതി കാമറയിലൂടെ ലൈവ് സ്ട്രീം ചെയ്തിരുന്നെന്നും വിവരങ്ങള്‍ ലഭിച്ചിരുന്നു,. അതിന് പിന്നാലെയാണ് അമേരിക്കയെ ഞെട്ടിച്ച് വീണ്ടും വെടിവെപ്പ് നടന്നത്.