കോവിഡ് സ്ഥിരീകരിച്ചുവെന്ന് ഔദ്യോഗികമായി അംഗീകരിക്കുന്നതിനു മാസങ്ങള്‍ക്കു മുന്‍പേ തന്നെ ഉത്തര കൊറിയ, കോവിഡ് നിയന്ത്രണ വിധേയമാക്കാന്‍ ചൈനയുടെ സഹായം തേടിയെന്ന് സ്ഥിരീകരണം. ചൈന പുറത്തുവിട്ട കണക്കനുസരിച്ച് കഴിഞ്ഞ ജനുവരി മുതല്‍ ഏപ്രില്‍ വരെ 1.60 കോടി മാസ്‌ക്കുകളാണ് ചൈനയില്‍നിന്ന് ഉത്തര കൊറിയ ഇറക്കുമതി ചെയ്തത്. ഇതിനു പുറമേ ആയിരത്തോളം വെന്റിലേറ്ററുകളും ഇറക്കുമതി ചെയ്തു എന്നും ചൈന സ്ഥിരീകരിക്കുന്നു.

ആദ്യം തദ്ദേശീയ വാക്‌സീനുകള്‍ നല്‍കാമെന്ന ചൈനയുടെ വാഗ്ദാനം ഉത്തര കൊറിയ നിഷേധിച്ചതായി വാര്‍ത്തകള്‍ പ്രചരിച്ചുവെങ്കിലും, ചൈന പുറത്തുവിട്ട കണക്കനുസരിച്ച് രണ്ടരക്കോടിയോളം രൂപയുടെ വാക്‌സീനാണ് ഇതുവരെ ഉത്തര കൊറിയയ്ക്ക് നല്‍കിയതെന്നാണ് റിപ്പോര്‍ട്ടില്‍ പറയുന്നത്. കഴിഞ്ഞ ജനുവരി മുതല്‍ ഏപ്രില്‍ വരെ 95,000 തെര്‍മോമീറ്ററുകളും ചൈന നല്‍കി. രണ്ടു കോടിയിലധികം വില വരുന്ന വെന്റിലേറ്ററുകളും ചൈനയില്‍നിന്ന് ഉത്തര കൊറിയ ഇറക്കുമതി ചെയ്തതായും കണക്കുകള്‍.

രാജ്യത്ത് ആദ്യമായി കോവിഡ് സ്ഥിരീകരിച്ചുവെന്ന് ഔദ്യോഗികമായി പ്രഖ്യാപിച്ചതിനു തൊട്ടുപിന്നാലെ ഉത്തര കൊറിയന്‍ ഭരണാധികാരി കിം ജോങ് ഉന്‍ മാസ്‌ക് ധരിച്ച് പൊതുവേദിയില്‍ പ്രത്യക്ഷപ്പെട്ടിരുന്നു. കിം ജോങ് ഉന്‍ നേരിട്ടാണ് കോവിഡ് പ്രതിരോധ പ്രവര്‍ത്തനങ്ങള്‍ ഏകോപിപ്പിക്കുന്നത്. 2.5 കോടി ആളുകളുള്ള രാജ്യത്ത് ഒരാള്‍ക്കുപോലും നേരത്തെ കോവിഡ് വാക്‌സീന്‍ നല്‍കിയിരുന്നില്ല. എന്നാല്‍ നിലവില്‍ 33 ലക്ഷം പേര്‍ രോഗബാധിതരാകുകയും 60 പേര്‍ മരിക്കുകയും ചെയ്‌തെങ്കിലും അതെല്ലാം 'അജ്ഞാത പനി' മൂലമെന്നായിരുന്നു വിശദീകരണം. ഈ പനിക്കേസുകളില്‍ എത്ര കോവിഡ് കേസുകള്‍ ഉണ്ടെന്ന് ഇതുവരെ ഉത്തര കൊറിയ വ്യക്തമാക്കിയിട്ടില്ല. കോവിഡ് മൂലമുള്ള മരണങ്ങള്‍ എത്രയാണ് എന്നതിലും വിശദീകരണമില്ല.

കോവിഡിന്റെ തുടക്കത്തില്‍, 2020 ജനുവരിയില്‍ത്തന്നെ അതിര്‍ത്തികള്‍ അടച്ച് കോവിഡിനെ നിയന്ത്രിച്ചുവെന്ന് അവകാശപ്പട്ട രാജ്യമാണ് ഉത്തര കൊറിയ. തലസ്ഥാന നഗരമായ പ്യോങ്യാങ്ങില്‍ ഉള്‍പ്പെടെ ലോക്ഡൗണ്‍ ഏര്‍പ്പെടുത്തി. ലോക്ഡൗണ്‍ എന്നാണ് അവസാനിപ്പിക്കുക എന്ന് വിവരമില്ല. ഏപ്രില്‍ അവസാനത്തോടെ മൂന്നര ലക്ഷത്തോളം പേരെ ഒരുതരം 'പനി' ബാധിച്ചിരിക്കുന്നതായി ഉത്തര കൊറിയ വെളിപ്പെടുത്തിയിരുന്നുവെങ്കിലും തലസ്ഥാനമായ പ്യോങ്യാങ്ങില്‍ ഒമിക്രോണ്‍ വകഭേദത്തിന്റെ സാന്നിധ്യം തിരിച്ചറിഞ്ഞതായി കഴിഞ്ഞ മേയ് എട്ടിനാണ് ഉത്തര കൊറിയ പ്രഖ്യാപിച്ചത്.