തോക്ക് നിയന്ത്രണങ്ങളെക്കുറിച്ചുള്ള ചര്‍ച്ചകള്‍ രാജ്യത്ത് വീണ്ടും സജീവമാകുന്നു... രക്ഷിതാക്കള്‍ അശ്രദ്ധമായി ഉപേക്ഷിച്ച തോക്കെടുത്ത് രണ്ടുവയസുകാരന്‍ നിറയൊഴിച്ചു, പിതാവിന് ദാരുണാന്ത്യം


തോക്ക് നിയന്ത്രണങ്ങളെക്കുറിച്ചുള്ള ചര്‍ച്ചകള്‍ രാജ്യത്ത് വീണ്ടും സജീവമാകുന്നു... രക്ഷിതാക്കള്‍ അശ്രദ്ധമായി ഉപേക്ഷിച്ച തോക്കെടുത്ത് രണ്ടുവയസുകാരന്‍ നിറയൊഴിച്ചു, പിതാവിന് ദാരുണാന്ത്യം.

അമേരിക്കയിലെ ഫ്ളോറിഡയിലാണ് സംഭവം. തോക്ക് ഉപയോഗിച്ചുള്ള ആള്‍ക്കൂട്ട ആക്രമണങ്ങളെകുറിച്ച് ചര്‍ച്ചകള്‍ രാജ്യത്ത് കത്തിപ്പടരുന്നതിനിടെയാണ് ഏറ്റവും പുതിയ അപകടം നടന്നത്. മേയ് 26നാണ് ദാരുണ സംഭവം ഉണ്ടായത്. റെജി മാബ്രിക്ക് എന്നയാളാണ് മകന്റെ കൈയാല്‍ മരിച്ചത്.

ഇരുപത്തിയാറുകാരനായ യുവാവ് തോക്ക് ഉപയോഗിച്ച് ആത്മഹത്യ ചെയ്തതാണെന്നാണ് പൊലീസ് ആദ്യം കരുതിയത്. എന്നാല്‍ ദമ്പതികളുടെ മൂന്ന് മക്കളില്‍ മൂത്ത മകനാണ് രണ്ട് വയസുള്ള സഹോദരനാണ് തോക്കിന്റെ കാഞ്ചി വലിച്ചതെന്ന് അന്വേഷണ ഉദ്യോഗസ്ഥരോട് പറഞ്ഞു.

നിലത്ത് കിടന്ന ബാഗില്‍ നിന്നുമാണ് കുട്ടിക്ക് തോക്ക് കിട്ടിയത്. അഞ്ച് മാസം പ്രായമുള്ള മകള്‍ ഉള്‍പ്പടെ കുടുംബത്തിലെ അഞ്ച് പേര്‍ സംഭവസമയം മുറിയിലുണ്ടായിരുന്നു.

അതേസമയം കഴിഞ്ഞ വര്‍ഷവും രണ്ട് വയസുള്ള കുട്ടി അശ്രദ്ധമായി ഇട്ട തോക്ക് ഉപയോഗിച്ച് മാതാവിനെ വെടിവച്ചിരുന്നു. അടുത്തിടെ അമേരിക്കയില്‍ സൂപ്പര്‍മാര്‍ക്കറ്റിലും, സ്‌കൂളിലും, ആശുപത്രിയിലും തോക്കുധാരികള്‍ വെടിയുതിര്‍ത്തിരുന്നു. നിരവധി പേരാണ് ഈ ആക്രമണങ്ങളില്‍ മരണപ്പെട്ടത്.