റഷ്യ ഉക്രൈനെ അധിനിവേശിച്ചത് 2022 ഫെബ്രുവരി 24ന് ആണ്. 101ാം ദിവസത്തിലേക്ക് യുദ്ധം കടന്നിരിക്കുന്നു. ഇന്ന് എല്ലാ പേര്‍ക്കും ചോദിക്കാനുള്ളത് ഒരൊറ്റ ചോദ്യം മാത്രം ഹൂ ഈസ് വിന്നിംഗ് ദിസ് വാര്‍ ഈ യുദ്ധത്തില്‍ ആര് ജയിക്കും എന്ന്.

പക്ഷേ ഈ യുദ്ധം പ്രവചനങ്ങള്‍ക്ക് അതീതമാണ് എന്നത് ആണ് യാഥാര്‍ത്ഥ്യം. ഇന്ന് ഉക്രൈന്റെ 20 ശതമാനം പ്രദേശങ്ങള്‍ റഷ്യയുടെ അധീനതയില്‍ ആണ്. അതായത്, ഏകദേശം 58,000 സ്‌ക്വയര്‍ കിലോമീറ്റര്‍. നമ്മുടെ ഹിമാചല്‍ പ്രദേശിന്റെ അല്ലെങ്കില്‍ ഉത്തരാഖണ്ഡിന്റെ വലുപ്പം വരും ഇത്. 20 ശതമാനം എന്ന് പറയുന്നത് വളരെ ചെറുതല്ല, വലിയൊരു ഭൂപ്രദേശം തന്നെ ആണ്.

കിഴക്കന്‍ മേഖലയായ ലുഹാന്‍സ്‌കിലെ സിവീയറോഡോണെസ്റ്റ്‌സ്‌ക് നഗരത്തില്‍ റഷ്യ കയ്യേറിയതിന്റെ 20% യുക്രെയ്ന്‍ തിരിച്ചുപിടിച്ചു. പ്രധാന യുദ്ധമുഖമായി മാറിയ ഈ നഗരത്തില്‍ യുക്രെയ്ന്‍ സേനയ്ക്ക് കൂടുതല്‍ ആയുധവും മറ്റു സന്നാഹങ്ങളും എത്താതിരിക്കാനായി സെവെര്‍സ്‌കി ഡോണെറ്റ്‌സ് നദിയിലെ പാലങ്ങള്‍ ഒന്നൊന്നായി റഷ്യ തകര്‍ക്കുകയാണ്. റഷ്യന്‍ സേനയ്ക്കു കനത്ത നഷ്ടമാണു സംഭവിച്ചിരിക്കുന്നതെന്നു ലുഹാന്‍സ്‌ക് ഗവര്‍ണര്‍ സെര്‍ഹെയ് ഗയ്ദായ് പറഞ്ഞു.

നദിക്കരയിലെ സ്വിയത്തോഗാര്‍സ്‌കി ക്രിസ്തീയ ആശ്രമത്തിന്റെ ഭാഗമായുള്ള തടിയില്‍ തീര്‍ത്ത പുരാതന ഓര്‍ത്തഡോക്‌സ് പള്ളി തീപിടിത്തത്തില്‍ നശിച്ചു. ആശ്രമ സമുച്ചയത്തില്‍ മുന്നൂറോളം പേര്‍ക്ക് അഭയം നല്‍കിയിട്ടുണ്ടായിരുന്നെന്ന് സാംസ്‌കാരിക മന്ത്രി ഒലെക്‌സാണ്ടര്‍ തകാചെന്‍കോ പറഞ്ഞു. സിവീയറോഡോണെസ്റ്റ്‌സ്‌ക് റഷ്യ പിടിച്ചെടുത്താല്‍ പിന്നെ ലിസിചാന്‍സ്‌ക് നഗരം കൂടിയേ ലുഹാന്‍സ്‌കില്‍ യുക്രെയ്ന്‍ നിയന്ത്രണത്തില്‍ ശേഷിക്കുന്നുള്ളൂ.

യുക്രെയ്ന്‍ സേനയില്‍ ചേര്‍ന്നു പോരാടിയ 4 വിദേശികള്‍ കൊല്ലപ്പെട്ടു. ജര്‍മനി, നെതര്‍ലന്‍ഡ്‌സ്, ഓസ്‌ട്രേലിയ, ഫ്രാന്‍സ് എന്നീ രാജ്യങ്ങളില്‍നിന്നുള്ളവരാണു കൊല്ലപ്പെട്ടത്. യുദ്ധത്തിന് നയതന്ത്ര പരിഹാരം സാധ്യമാകുമോ എന്നതിലും ആശങ്ക കനക്കുന്നു. റഷ്യന്‍ സേന അതിര്‍ത്തിയോളം പിന്മാറാതെ ചര്‍ച്ചയ്ക്കില്ലെന്ന നിലപാട് യുക്രെയ്ന്‍ ആവര്‍ത്തിച്ചു.