ആഗോള ശക്തികള്‍ ചേരിതിരിയുന്ന സ്വാര്‍ത്ഥപരമായ സമീപനത്തെ തുറന്നു പറഞ്ഞ ഇന്ത്യയുടെ നിലപാടിനെ പ്രശംസിച്ച് ചൈന രംഗത്ത്. വിദേശകാര്യമന്ത്രി എസ്.ജയശങ്കര്‍ പാശ്ചാത്യരാജ്യങ്ങളുടെ ചേരിതിരിവിനെതിരെ നടത്തിയ പ്രസ്താവനയാണ് ചൈന പരാമര്‍ശിച്ചത്. ചൈനയുടെ ഔദ്യോഗിക മുഖപത്രമായ ഗ്ലോബല്‍ ടൈംസാണ് പ്രസ്താവന പുറത്തുവിട്ടത്.

ഓരോ ലോകരാജ്യങ്ങള്‍ മേഖലയില്‍ വേര്‍തിരിഞ്ഞ് നില്‍ക്കുന്നത് സ്വാര്‍ത്ഥപരമായ കാര്യങ്ങള്‍ക്കാണ്. മാനവസമൂഹം നേരിടുന്ന അടിസ്ഥാന പ്രശ്‌നങ്ങളെ പരിഹരിക്കാന്‍ ആരും മുന്‍കൈ എടുക്കുന്നില്ലെന്നതടക്കമുള്ള ജയശങ്കറിന്റെ പരാമര്‍ശത്തെയാണ് ചൈനീസ് വിദേശകാര്യമന്ത്രാലയം പ്രശംസിച്ചത്. യൂറോപ്പിനെതിരെ ഇന്ത്യ യുക്തി സഹ മായതും തെളിവോടുകൂടിയതുമായ കാര്യങ്ങളാണ് ഉന്നയിച്ചതെന്നും ചൈന പറഞ്ഞു.

ഇന്ത്യ ഒരു ചേരിയുടേയും ഭാഗമല്ലെന്നും നിലവിലെ വിവിധ സഖ്യങ്ങള്‍ക്കൊപ്പം നില്‍ക്കുന്നത് ഇന്ത്യയുടെ അഖണ്ഡതയ്ക്കും രാജ്യങ്ങള്‍ക്ക് സഹായം നല്‍കാനുമാണെന്നും ജയശങ്കര്‍ പറഞ്ഞിരുന്നു. കഴിഞ്ഞ ദിവസം ഗ്ലോബ്‌സെക് 2022 ബ്രാറ്റിസ്ലാവ ഫോറത്തിലാണ് ഇന്ത്യയുടെ വിദേശനയം വിദേശകാര്യമന്ത്രി എസ്.ജയശങ്കര്‍ വ്യക്തമാക്കിയത്.

അമേരിക്ക പസഫിക് മേഖലയില്‍ നടത്തിയ ക്വാഡ് സഖ്യ ഇടപെടലിനെതിരെ മൂന്ന് വര്‍ഷ മായി ചൈന പ്രതിഷേധിക്കുകയാണ്. ഇന്ത്യയുടെ പ്രസ്താവനയെ ഉപയോഗപ്പെടുത്തി ആഗോള തലത്തില്‍ കൊറിയയും റഷ്യയും പറയുന്ന വാദങ്ങള്‍ തന്നെയാണ് ചൈനയും ആവര്‍ത്തി ക്കുന്നത്.