ഭൂമിക്ക് പുറത്തുള്ള ലോകത്തെ കുറിച്ച് അറിയാന്‍ എല്ലാവര്‍ക്കും ആഗ്രഹമുണ്ട്. അതിന്റെ ഭാഗമായി മറ്റുള്ള ഗ്രഹങ്ങളെ കുറിച്ചുള്ള പഠനങ്ങളും ഭൂമിക്കപ്പുറം മനുഷ്യന് ജീവിക്കാന്‍ കഴിയുമോ എന്നൊക്കെയുള്ള പരീക്ഷണങ്ങളും നടത്തുന്നുണ്ട്. മാത്രമല്ല ഇന്ത്യയടക്കമുള്ള നിരവധി രാജ്യങ്ങള്‍ ഇത്തരത്തില്‍ പര്യവേഷണങ്ങളും ഗവേഷണങ്ങളും നടത്തുന്നുണ്ട്.

ചൊവ്വയേയും ചന്ദ്രനേയും കേന്ദ്രീകരിച്ചാണ് കൂടുതല്‍ പര്യവേഷണങ്ങള്‍ നടത്തുന്നത്. അവിടെ വെള്ളമുണ്ടോ, വായുവുണ്ടോ ചെടികള്‍ വളരുമോ എന്നെല്ലാമാണ് അന്വേഷണത്തിലെ പ്രധാന ഘടകങ്ങള്‍. വര്‍ഷങ്ങളായുള്ള പരീക്ഷണത്തില്‍ ചില നിര്‍ണായക ഘടകളും കണ്ടെത്തിയിരുന്നു.

എന്നാല്‍ പലപ്പോഴും കൗതുകകരമായതും ഭയപ്പെടുത്തുന്നതുമായ പല ചിത്രങ്ങളും ഇത്തരം ഗ്രഹങ്ങളില്‍ നിന്ന് ലഭിക്കാറുണ്ട്. അതുപൊലെ നാസ ചോവ്വയിലേക്ക് അയച്ച ക്യൂരിയോസിറ്റി റോവര്‍ അയച്ച ചിത്രമാണ് ഇപ്പോള്‍ ചര്‍ച്ചാ വിഷയമായിരിക്കുന്നത്.

ക്യൂരിയോസിറ്റി റോവര്‍ ഭൂമിയിലേക്ക് അയച്ച ഹൈ റസല്യൂഷന്‍ ചിത്രങ്ങളിലാണ് ചൊവ്വയുടെ പ്രതലത്തില്‍ ഫണം വിരിച്ചാടുന്ന പാമ്പുകള്‍ പ്രത്യക്ഷപ്പെട്ടത്. എന്നാല്‍ ഇത് പാമ്പല്ല എന്ന് ഉറപ്പിച്ച സോഷ്യല്‍മീഡിയ പക്ഷേ അതിലും ആശങ്ക ജനിപ്പിക്കുന്ന കാര്യമായിരുന്നു പറഞ്ഞത്. അതായത്, ചൊവ്വയില്‍ അന്യഗ്രഹ ജീവികള്‍ ഉണ്ടെന്ന് ഉറപ്പിച്ചിരിക്കുകയാണ് സോഷ്യല്‍ മീഡിയ.

ചൊവ്വയുടെ പ്രതലത്തിലെ ഗേല്‍ ക്രേറ്ററിലുള്ള ഗ്രീന്‍ഹ്യു പെഡിമെന്റിനു സമീപത്ത് നിന്നാണ് ക്യൂരിയോസിറ്റി റോവര്‍ ഈ ചിത്രമെടുത്തത്. ചിത്രം സമൂഹമാധ്യമങ്ങളില്‍ വൈറലായതോടെ ഇത് അന്യഗ്രഹജീവിസങ്കേതത്തിലേക്കുള്ള കവാടമാണെന്ന തരത്തിലുള്ള പതിവ് ഊഹാപോഹങ്ങളും ദുരൂഹതാ സിദ്ധാന്തങ്ങളും ഉയര്‍ന്നു. എന്നാല്‍ ശാസ്ത്രജ്ഞര്‍ ഈ വാദങ്ങളെ തള്ളുകയാണ് ചെയ്തത്.

ഒരുകാലത്ത് പാറകളായിരുന്ന ചില കട്ടിയേറിയ ഭാഗങ്ങളുടെ അവശേഷിപ്പുകളാണ് ഇവയെന്നാണ് ശാസ്ത്രജ്ഞര്‍ അഭിപ്രായപ്പടുന്നത്. ഇതിന്റെ ബാക്കി പാറഭാഗങ്ങള്‍ ചൊവ്വയുടെ അന്തരീക്ഷവുമായുണ്ടായ പ്രവര്‍ത്തനങ്ങള്‍ മൂലം നശിച്ചുപോയി. അതിനാലാണ് ഇവ ഉപരിതലത്തില്‍ നിന്ന് ഉയര്‍ന്നു നില്‍ക്കുന്ന തരത്തില്‍ സ്ഥിതി ചെയ്യുന്നത്. ഫെയറി ചിമ്മിനി, എര്‍ത്ത് പിരമിഡ്, ടെന്റ് റോക് തുടങ്ങിയ പേരുകളിലും ഇവ അറിയപ്പെടാറുണ്ടെന്നാണ് ശാസ്ത്രജ്ഞരെ ഉദ്ദരിച്ച് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നത്. മാത്രമല്ല ഇത്തരം ഭാഗങ്ങള്‍ ഭൂമിയിലും കാണപ്പെടാറുണ്ട്. യുഎസിലെ യൂട്ടായിലുള്ള ബ്രൈസ് കാന്യന്‍, കൊളറാഡോ പ്ലാച്യു ജപ്പാനിലെ തോകുഷിമ എന്നിവിടങ്ങളില്‍ ഇത്തരം ഘടനകള്‍ ഉണ്ടെന്നാണ് പറയപ്പെടുന്നത്.

ഭൂമിക്കുവെളിയിലുള്ള ഗ്രഹങ്ങളിലെ ബുദ്ധിയുള്ള അന്യഗ്രഹജീവികളെ കുറിച്ച പഠിക്കുന്ന സെര്‍ച്ച് ഫോര്‍ എക്‌സ്ട്രാ ടെറസ്ട്രിയല്‍ ലൈഫ് ഇന്‍സ്റ്റിറ്റ്യൂട്ട് അതായത് സേറ്റി ഈ ചിത്രം ഷെയര്‍ ചെയ്തിരുന്നു. കൂള്‍ റോക്ക് എന്ന ക്യാപ്ഷനോടുകൂടിയാണ് ഈ ഘടനകളുടെ ചിത്രം സേറ്റി പോസ്റ്റ് ചെയ്തത്. നാസയും തങ്ങളുടെ ട്വിറ്ററില്‍ ഈ ചിത്രം ട്വീറ്റ് ചെയ്തിട്ടുണ്ട്.

രണ്ടു വര്‍ഷത്തെ ദൗത്യത്തിനായി ചൊവ്വയിലേക്ക് നാസ അയച്ച ക്യൂരിയോസിറ്റി റോവര്‍ പത്താം വര്‍ഷവും അതിന്റെ ദൗത്യം തുടരുകയാണ്. അതിനിടയിലാണ് റോവര്‍ ഭൂമിയിലേക്കയച്ച ചിത്രം ശാസ്ത്രലോകത്തും സമൂഹ മാധ്യമങ്ങളിലും വലിയ ചര്‍ച്ചയായിരിക്കുന്നത്.