ലോക ടെന്നിസിന്റെ പോര്‍ക്കളങ്ങളെ ത്രസിപ്പിച്ച താരമാണ് യെലേന ഡോക്കിച്ച്. 1999ല്‍ ലോക ഒന്നാം നമ്പര്‍ താരം മാര്‍ട്ടിന ഹിന്‍ഗിസിനെ വിംബിള്‍ഡണ്‍ ഒന്നാംറൗണ്ടില്‍ കെട്ടുകെട്ടിച്ച് ടെന്നിസിന്റെ ഗ്രാന്‍ഡ്സ്ലാം വേദികളില്‍ വരവറിയിച്ച ഡോക്കിച്ച് മൂന്നു വര്‍ഷത്തിനകം ലോക റാങ്കിങ്ങില്‍ നാലാം സ്ഥാനത്തെത്തിയിരുന്നു.

2000ല്‍ വിംബിള്‍ഡണ്‍ സെമിയില്‍ പ്രവേശിക്കുകയും ചെയ്തു. കരിയറില്‍ ആറു ഡബ്ല്യു.ടി.എ കിരീടങ്ങള്‍ നേടിയിട്ടുണ്ട്. എന്നാല്‍ ഉയര്‍ച്ചകള്‍ക്ക് പിന്നാലെ താരത്തെ ഏറെ വേദനിപ്പിച്ച കാര്യങ്ങളാണ് പിന്നീടങ്ങോട്ട് താരത്തിന്റെ ജീവിതത്തില്‍ നടന്നത്.

കുറച്ചുനാളായി മാനസിക രോഗത്തിന്റെ പിടിയിലായിരുന്നുവെന്നും 39കാരി വെളിപ്പെടുത്തി. പ്രതീക്ഷാ നിര്‍ഭരമായ തുടക്കത്തിനുശേഷം പിന്നീട് പിതാവുമായുള്ള പിണക്കവും മറ്റും കരിയറില്‍ തിരിച്ചടികളായപ്പോള്‍ റാങ്കിങ്ങില്‍ 600ല്‍ താഴേക്ക് പിന്തള്ളപ്പെട്ടു. പ്രൊഫഷനല്‍ ടെന്നിസിനോട് വിടപറഞ്ഞ ശേഷം കമന്റേറ്ററുടെ റോളില്‍ യെലേന സജീവമായിരുന്നു.

കണ്ണീരൊലിപ്പിക്കുന്ന തന്റെ ചിത്രത്തിനൊപ്പമാണ് ഡോക്കിച്ച് ഇന്‍സ്റ്റാഗ്രാമില്‍ കുറിപ്പ് പോസ്റ്റ് ചെയ്തിരിക്കുന്നത്. 'ആ ദിവസങ്ങളിലെല്ലാം നിരന്തരം കരയുകയായിരുന്നു ഞാന്‍. ജോലിയിലായിരിക്കുമ്പോള്‍ ബാത്ത്‌റൂമില്‍ ഒളിച്ചിരുന്ന് ഒരുപാട് കണ്ണീരൊഴുക്കിയിട്ടുണ്ട്. എന്റെ ഫ്‌ലാറ്റിലെ നാലു ചുവരുകള്‍ക്കുള്ളില്‍ ആരും കാണാനില്ലാത്തപ്പോള്‍ നിര്‍ത്താതെ കരഞ്ഞിരുന്നു. ദുഃഖവും വേദനയും വിട്ടുമാറാതിരുന്നപ്പോള്‍ ജീവിതം തകര്‍ന്ന പോലെയായിരുന്നു.' യെലേന കുറിച്ചു.

എല്ലാം മങ്ങിയ പോലായിരുന്നു..വര്‍ണങ്ങളകന്നുപോയി..കണ്ണീരും ദുഃഖവും വിഷാദവും ആകാംക്ഷയും വേദനകളും മാത്രമായിരുന്നു കൂട്ട്...കഴിഞ്ഞ അഞ്ചാറു മാസങ്ങള്‍ കടുപ്പമേറിയതായിരുന്നു. എല്ലായിടത്തും കരച്ചിലും നൊമ്പരവും നിറഞ്ഞുനിന്നു. ആ ദിവസം ഞാനൊരിക്കലും മറക്കില്ല.

വേദനാനുഭവങ്ങളുടെ അന്ത്യമായിരുന്നു എന്റെ ഉന്നം. ഒടുവില്‍ അതിന്റെ അവസാന മുനമ്പില്‍നിന്നാണ് ഞാന്‍ അതിശയകരമായി പിന്‍വാങ്ങിയത്. അതെങ്ങനെ സംഭവിച്ചുവെന്ന് ഇപ്പോഴും എനിക്കറിയില്ല...' പറയുന്നത്, ലോക ടെന്നിസിന്റെ പോര്‍ക്കളങ്ങളെ ത്രസിപ്പിച്ച യെലേന ഡോക്കിച്ച് എന്ന ആസ്‌ട്രേലിയയുടെ വിഖ്യാതതാരം. ഇക്കഴിഞ്ഞ ഏപ്രില്‍ 28ന് 26ാം നിലയിലെ ഫ്‌ലാറ്റിലെ ബാല്‍ക്കണിയില്‍നിന്ന് ചാടി ജീവന്‍ വെടിയാന്‍ തീരുമാനിച്ചതടക്കം ആത്മഹത്യയുടെ വക്കിലെത്തിയ തന്റെ മാനസിക പിരുമുറുക്കങ്ങളെക്കുറിച്ച് യെലേന ഇന്‍സ്റ്റാഗ്രാം കുറിപ്പില്‍ വിശദീകരിച്ചു.