പാകിസ്ഥാന്‍ തീര്‍ന്നു ചൈനയുടെ കെണിയില്‍ പൂര്‍ണ്ണമായും അമരുകയാണാ രാജ്യം? ഇന്ത്യക്ക് തെക്ക് ശ്രീലങ്കയ്ക്കുണ്ടായ ദുരന്തം പാകിസ്താനിലും ആവര്‍ത്തിക്കാന്‍ ഇനി എത്ര നാള്‍? ഇമ്രാന്‍ മാറി സര്‍ഫറാസ് വന്നാലും രക്ഷപെടാനാകില്ലെന്ന് തെളിയിക്കുകയാണ് പാകിസ്താന്‍.

അന്താരാഷ്ട്ര സാമ്പത്തിക നിയന്ത്രണ സമിതി ഇളവുകള്‍ നല്‍കാനിരിക്കേ ഒരുമുഴം മുന്നേ കൂടുതല്‍ സാമ്പത്തിക സഹായം നല്‍കി സഹായിക്കാന്‍ തീരുമാനിച്ച ചൈന കൃത്യമായ അജണ്ടയോടെ നീങ്ങുകയാണ്. ഇന്ത്യയ്‌ക്കെന്നും ഭീകരതയാല്‍ തലവേദനയാകുന്ന പാകിസ്താനെ സഹായിക്കുക വഴി ഒരുവെടിക്ക് രണ്ടു പക്ഷി എന്ന നിലയില്‍ ചൈനയുടെ ബോര്‍ഡര്‍ റോഡ് സഹായം ഇന്ത്യയെ വളഞ്ഞു പിടിക്കല്‍ തന്നെയെന്ന് വീണ്ടും തെളിയുകയാണ്.

പാകിസ്താന്‍ രൂപീകരിക്കപ്പെട്ട നാള്‍ മുതല്‍ മതഭീകരത മുഖമുദ്രയാക്കിയ രാജ്യമാണ്. അവരെന്നും എന്നും വിദേശ സാമ്പത്തികം കൈകാര്യം ചെയ്തിരുന്നത് ഭീകരരില്‍ക്കൂടിയായിരുന്നുവെന്നതിന് തെളിവുകള്‍ അനവധി. അല്‍ഖ്വയ്ദയുടേയും ജയ്‌ഷേ മുഹമ്മദിന്റേയും ലഷ്‌ക്കറിന്റേയും യൂറോപ്പുമായുള്ള ബന്ധം എന്നും പാകിസ്താന്‍ കേന്ദ്രീകരിച്ചായിരുന്നു. ലണ്ടനിലും ക്യാനഡയിലും ഫ്രാന്‍സിലുമൊക്കെ ഭീകരരുടെ ദല്ലാളുകള്‍ വിലസുന്നു.

ലോകശക്തികള്‍ക്ക് പാകിസ്താനെന്നും ആയുധകച്ചവട കേന്ദ്രവുമാണെന്നതാണ് മറ്റൊരു സത്യം. ഗള്‍ഫ് യുദ്ധമായാലും ഏഷ്യയിലെ ഭീകരതയായാലും അമേരിക്കയുടെ കുതന്ത്രം ഒരു വശത്ത് പാകിസ്താനെ തല്ലുകയും മറുവശത്ത് തലോടുകയുമാണ്. ഇന്ത്യയുടെ വിദേശകാര്യമന്ത്രി ജയശങ്കര്‍ മുഖത്തടിച്ചപോലെ അമേരിക്കയ്ക്ക് ഉത്തരം കൊടുത്തിട്ട് ഒരാഴ്ച തികഞ്ഞിട്ടില്ല. അതിന് പിന്നാലെയാണ് അന്താരാഷ്ട്ര സാമ്പത്തിക നിയന്ത്രണങ്ങളില്‍ നിന്നും പാകിസ്താനെ ഒഴിവാക്കാന്‍ അമേരിക്കയും ഫ്രാന്‍സും ജര്‍മ്മനിയും ബ്രിട്ടണും നേതൃത്വം കൊടുക്കുന്ന സമിതി ശ്രമിക്കുന്നത്.

എല്ലാ മേഖലയിലും പാകിസ്താന്‍ പ്രതിസന്ധിയിലാകുന്നതിന്റെ വിവിധ തെളിവുകളാണ് ഒരോ ദിവസവും പുറത്തുവരുന്നത്. ഭക്ഷ്യധാന്യപ്രതിസന്ധിയും വൈദ്യുത പ്രതിസന്ധിയും തുടരുന്ന പാകിസ്താനില്‍ കടലാസും ഇല്ലെന്ന വാര്‍ത്തയാണ് പുറത്തുവരുന്നത്. പൗരന്മാര്‍ക്ക് അടിസ്ഥാന സൗകര്യങ്ങളൊന്നും നല്‍കാന്‍ ശ്രദ്ധിക്കാത്ത രാഷ്ട്രീയ നേതൃത്വം പക്ഷെ വിദേശ രാജ്യങ്ങളിലടക്കം വന്‍ സ്വത്തുള്ള ധാരാളികളാണ്.