അടിസ്ഥാന സൗകര്യവികസനത്തിനും മറ്റുമായി പണം കടം കൊടുത്ത് അവസാനം തിരികെ നല്‍കാനാകാതെ വരുമ്പോള്‍ കടം വാങ്ങിയ രാജ്യങ്ങളുടെ ഓരോ മേഖലകളായി കൈക്കലാക്കുക എന്ന തന്ത്രം. ഇതിന്റെ ദുരിന്തഫലം അനുഭവിക്കുന്ന ഒരു രാജ്യമാണ് നമ്മുടെ അയല്‍വക്കത്തുള്ള ശ്രീലങ്ക. ഇപ്പോഴിതാ ചൈനയുടെ ബ്ലേഡ് കമ്പനി പൂട്ടാനുള്ള തന്ത്രമൊരുക്കുകയാണ് ജി 7 രാജ്യങ്ങളുടെ കൂട്ടായ്മ. ജര്‍മ്മനിയില്‍ നടക്കുന്ന ജി 7 ഉച്ചകോടിയുടെ ആദ്യ ദിവസമാണ് ഇത് സംബന്ധിച്ച പ്രഖ്യാപനം ഉണ്ടായിരിക്കുന്നത്.

അടുത്ത അഞ്ച് വര്‍ഷത്തേക്ക് വികസ്വര രാജ്യങ്ങളിലെ വിവിധ അടിസ്ഥാന വികസന പദ്ധതികള്‍ക്ക് സഹായമായി600 ബില്യണ്‍ ഡോളര്‍ നീക്കിവയ്ക്കാനാണ് ജി 7 രാജ്യങ്ങളുടെ ഉച്ചകോടി തീരുമാനിച്ചിരിക്കുന്നത്. മാനവികതയുടെ സ്പര്‍ശനത്തോടൊപ്പം സാമ്പത്തിക മേഖലയിലും സുരക്ഷാ കാര്യങ്ങളിലുമുള്ള ആശങ്ക പരിഹരിക്കുക എന്നതാന് ഇതിന്റെ ഉദ്ദേശമെന്ന് പദ്ധതി പ്രഖ്യാപിച്ചുകൊണ്ട് അമേരിക്കന്‍ പ്രസിഡണ്ട് ജോ ബൈഡന്‍ വ്യക്തമാക്കി.

വികസ്വര രാജ്യങ്ങളില്‍ ആവശ്യത്തിന് അടിസ്ഥാന വികസനം ഇല്ലാത്തതിനാല്‍, പലപ്പോഴും ആഗോള തലത്തില്‍ തന്നെ സംഭവിക്കുന്ന കോവിഡ് പോലുള്ള ദുരന്തങ്ങളുടെ തീവ്രത വളരെ വലുതായി മാറുമെന്ന് യോഗം നിരീക്ഷിച്ചു. സഹായ പ്രവര്‍ത്തനങ്ങള്‍ ഉള്‍പ്പടെയുള്ളവയ്ക്ക് ഇത് പ്രതിസന്ധി സൃഷ്ടിക്കുന്നു.ഇതിനെയെല്ലാം മറികടക്കുക എന്നതാണ് പുതിയ പദ്ധതികൊണ്ട് ലക്ഷ്യം വയ്ക്കുന്നത്, ആരോഗ്യം, കാലാവസ്ഥ, ഊര്‍ജ്ജം, ലിംഗ സമത്വം എന്നിങ്ങനെ നിരവധി മേഖലകളെ സ്പര്‍ശിക്കുന്നതാണ് ഈ പദ്ധതി.

എന്നാല്‍, ഇതൊരു ധന സഹായമല്ലെന്നും മറിച്ച് ഒരു നിക്ഷേപമാണെന്നും ബൈഡന്‍ വ്യക്തമാക്കി. ഇത് അമേരിക്കന്‍ സമ്പദ്ഘടനയേയും ആഗോള സമ്പദ്ഘടനയേയും പുഷ്ടിപ്പെടുത്തുമെന്നും അദ്ദേഹം പറഞ്ഞു. ഇത് ഒരു തുടക്കം മാത്രമാണെന്നും വികസന ബാങ്കുകള്‍, സോവറിന്‍ ഫണ്ടുകള്‍, മറ്റ് ധനകാര്യ സ്ഥാപനങ്ങള്‍ എന്നിവയുമായി ചേര്‍ന്ന് നിക്ഷേപത്തിന്റെ വ്യാപ്തി വര്‍ദ്ധിപ്പിക്കുമെന്നും അദ്ദേഹം പറഞ്ഞു.