മരണക്കളിയുമായി റഷ്യ; ഏകാതിപത്യരാജ്യമായ ബലാറൂസിന് ആണവ മിസൈല്‍ നല്‍കി പുടിന്‍;
പശ്ചാത്യരാജ്യങ്ങളില്‍ നിന്നുള്ള പ്രകോപനങ്ങള്‍ ഉയരുന്ന പശ്ചാത്തലത്തില്‍ ആണവായുധങ്ങള്‍ വഹിക്കാന്‍ ശേഷിയുള്ള മിസൈല്‍ സംവിധാനങ്ങള്‍ സഖ്യരാജ്യമായ ബെലറൂസിന് നല്‍കാന്‍ റഷ്യന്‍ പ്രസിഡന്റ് വ്‌ലാഡിമിര്‍ പുട്ടിന്‍ തീരുമാനിച്ചതായി റഷ്യന്‍ വിദേശകാര്യ മന്ത്രാലയം അറിയിച്ചു.
അയല്‍രാജ്യങ്ങളായ ലിത്വാനിയയിലും പോളണ്ടില്‍ നിന്നും ഉയരുന്ന ഏറ്റുമുട്ടല്‍ നയങ്ങളോട് പ്രതികരിക്കാന്‍ സഹായിക്കണമെന്ന് ബെലറൂസ് പ്രസിഡന്റ് അലക്‌സാണ്ടര്‍ ലുകാഷെന്‍കോ പുട്ടിനോട് കഴിഞ്ഞ ദിവസം സെന്റ് പീറ്റേഴ്‌സ്ബര്‍ഗില്‍ നടന്ന കൂടിക്കാഴ്ചയ്ക്കിടെ സൂചിപ്പിച്ചിരുന്നു.
ആവശ്യമെങ്കില്‍ ബെലറൂസിന്റെ റഷ്യന്‍ നിര്‍മ്മിത എസ്.യു 25 ജെറ്റുകള്‍ നവീകരിച്ച് നല്‍കാമെന്ന് പുട്ടിന്‍ ലുകാഷെന്‍കോയ്ക്ക് ഉറപ്പ് നല്‍കി. ഇസ്‌കന്‍ഡര്‍ എം ഷോര്‍ട്ട് റേഞ്ച് ബാലിസ്റ്റിക് മിസൈല്‍ സിസ്റ്റമാണ് റഷ്യ ബെലറൂസില്‍ വിന്യസിക്കുക. ബാലിസ്റ്റിക്, ക്രൂസ് മിസൈലുകളുടെ പരമ്പരാഗത, ആണവ പതിപ്പുകളെ ഇസ്‌കന്‍ഡര്‍ എമ്മില്‍ ഉപയോഗിക്കാം. 500 കി. മീ വരെയാണ് ഇസ്‌കന്‍ഡര്‍ എം ഷോര്‍ട്ട് റേഞ്ച് ബാലിസ്റ്റിക് മിസൈലുകളുടെ പ്രഹരപരിധി.
ശത്രുക്കള്‍ക്ക് മുന്നറിയിപ്പ് നല്‍കാതെ ആക്രമിക്കാനായി റഷ്യ വികസിപ്പിച്ചെടുത്ത അത്യാധുനിക മിസൈലാണ് ഇസ്‌കന്‍ഡര്‍. ആണവ പോര്‍മുനകള്‍ ഘടിപ്പിച്ചാല്‍ 5 മുതല്‍ 50 കിലോടണ്‍ ടി.എന്‍.ടി ശക്തിയുള്ള സ്‌ഫോടനങ്ങള്‍ക്ക് ഇവ കാരണമാകുന്നു.
https://www.facebook.com/Malayalivartha
