റഷ്യ യുക്രൈന്‍ യുദ്ധം ഇപ്പോഴും കൊടുമ്പിരി കൊള്ളുകയാണ്. ഈ സമയം യുദ്ധ മുഖം എന്നതുപോലെ തന്നെ ലോക ജനത ഉറ്റു നോക്കുന്ന ഒന്നാണ് രാജ്യത്തെ പ്രസിഡന്റിന്റെ നീക്കങ്ങളും ചെയ്തികളും. അവരുടെ ഏത് പ്രവര്‍ത്തിയും യുദ്ധമുഖത്ത് പ്രതിഭലിക്കും. അത് പോസിറ്റീവായും നെഗറ്റീവായും വന്നു ഭവിക്കാം. ഇപ്പോഴിതാ അക്ഷരാര്‍ത്ഥത്തില്‍ പണി കിട്ടിയത് യുക്രൈന്‍ പ്രസിഡന്റ് വ്‌ലാഡിമര്‍ സെലന്‍സ്‌കിയ്ക്കാണ്.

രാജ്യം യുദ്ധക്കെടുതിയില്‍ ഉഴറുന്നതിനിടെ, 'വോഗ്' മാഗസിനായി യുക്രെയ്ന്‍ പ്രസിഡന്റ് വൊളോഡിമര്‍ സെലെന്‍സ്‌കിയും ഭാര്യ ഒലേന സെലെന്‍സ്‌കയും നടത്തിയ ഫോട്ടോഷൂട്ടാണ് ഇപ്പോള്‍ വിവാദമായിക്കൊണ്ടിരിക്കുന്നത് . ഇരുവരുടെയും ഫോട്ടോഷൂട്ടും ചിത്രങ്ങളും സമൂഹമാധ്യമങ്ങളില്‍ വൈറലായതിനു പിന്നാലെ, 'ട്രോളു'കളും വ്യാപകമായി. പ്രശസ്ത സെലിബ്രിറ്റി ഫൊട്ടോഗ്രഫര്‍ ആനി ലെയ്‌ബോവിറ്റ്‌സാണ് ചിത്രങ്ങള്‍ പകര്‍ത്തിയത്. ഈ ചിത്രങ്ങള്‍ ഒലേന സെലെന്‍സ്‌ക സമൂഹമാധ്യമങ്ങളില്‍ പോസ്റ്റ് ചെയ്തു. ഇരുവരുടെയും കണ്ടുമുട്ടലും ജീവിതവും വിവരിക്കുന്ന അഭിമുഖം മാഗസിനിലുണ്ട്.

'യുക്രെയ്‌നിലെ യുദ്ധം നിര്‍ണായകമായ ഘട്ടത്തിലേക്കു കടക്കുമ്പോള്‍, രാജ്യത്തിന്റെ പ്രഥമ വനിത ഒലേന സെലെന്‍സ്‌ക മുഖ്യധാരയിലെ നയതന്ത്ര സാന്നിധ്യവും ആ രാജ്യത്തിന്റെ വൈകാരിക നിമിഷങ്ങളുടെ മുഖവുമെന്ന നിലയില്‍ നിര്‍ണായക വ്യക്തിത്വമായി മാറിയിരിക്കുന്നു' – ചിത്രങ്ങള്‍ പങ്കുവച്ച് വോഗ് കുറിച്ചു.

ഇരുവരും മേശയ്ക്കു സമീപമിരുന്ന് കൈകള്‍ കോര്‍ത്തുപിടിച്ചിരിക്കുന്നതാണ് ഒരു ചിത്രം. സെലെന്‍സ്‌കി ഒലേനയെ ചേര്‍ത്തുപിടിച്ചിരിക്കുന്നതാണ് മറ്റൊരു ചിത്രം. യുക്രെയ്ന്‍ യുദ്ധത്തിന്റെ പശ്ചാത്തലത്തില്‍ ഒലേന ടാങ്കറുകള്‍ക്കും സൈനികര്‍ക്കും സമീപത്തുനിന്ന് പകര്‍ത്തിയ ചിത്രങ്ങളുമുണ്ട്. 'ധീരതയുടെ ചിത്രം' എന്ന പേരിലാണ് വോഗ് ഒലേനയെ അവതരിപ്പിക്കുന്നത്.

ചിത്രങ്ങള്‍ സമൂഹമാധ്യമങ്ങളില്‍ വൈറലായെങ്കിലും, രാജ്യം യുദ്ധക്കെടുതികളിലൂടെ കടന്നുപോകുന്നതിനിടെ പ്രസിഡന്റും ഭാര്യയും നടത്തിയ ഫോട്ടോഷൂട്ടിനെ വിമര്‍ശിച്ചും പരിഹസിച്ചും ഒരു വിഭാഗം ആളുകള്‍ രംഗത്തെത്തി. റഷ്യ യുക്രെയ്‌നില്‍ ബോംബാക്രമണം തുടരുന്നതിനിടെ പ്രസിഡന്റും ഭാര്യയും ഫോട്ടോഷൂട്ട് നടത്തിയെന്ന് വിശ്വസിക്കാനാകുന്നില്ലെന്നാണ് ഇവരുടെ പ്രതികരണം.