ലോകം അറിയപ്പെടുന്ന എഴുത്തുകാരനാണ് സല്‍മാന്‍ റുഷ്ദി. മുംബൈയിലാണു റുഷ്ദി ജനിച്ചത്. 1981 ല്‍ ഇറങ്ങിയ 'മിഡ്‌നൈറ്റ്‌സ് ചില്‍ഡ്രന്‍' ബുക്കര്‍ സമ്മാനം നേടി. യുകെയില്‍ മാത്രം ഈ നോവല്‍ 10 ലക്ഷം കോപ്പികളാണു വിറ്റഴിഞ്ഞത്. 1988 ല്‍ ഇറങ്ങിയ നാലാമത്തെ നോവലായ 'സേറ്റാനിക് വേഴ്‌സസ്' വിവാദമായി. പ്രവാചകനിന്ദ ആരോപിച്ച് ഇറാനില്‍ നിരോധിച്ചു.

പിറ്റേവര്‍ഷം റുഷ്ദിയെ വധിക്കാന്‍ ഇറാന്‍ പരമോന്നത നേതാവായിരുന്ന ആയത്തുല്ല ഖുമൈനി മതശാസന പുറപ്പെടുവിച്ചു. വധഭീഷണി ഉയര്‍ന്നതോടെ റുഷ്ദി 9 വര്‍ഷമാണു ബ്രിട്ടനില്‍ ഒളിവില്‍ കഴിഞ്ഞത്. ഖുമൈനിയുടെ ശാസനയില്‍നിന്നു പിന്നീട് ഇറാന്‍ അകലം പാലിച്ചെങ്കിലും റുഷ്ദിക്കെതിരായ ഭീഷണി നിലനിന്നു. കഴിഞ്ഞ 20 വര്‍ഷമായി ന്യൂയോര്‍ക്കിലാണു താമസം. 2016ല്‍ യുഎസ് പൗരത്വവും സ്വീകരിച്ചു.

സല്‍മാന്‍ റുഷ്ദിക്കുനേരെ യുഎസില്‍ വച്ചാണ് ആക്രമണം ഉണ്ടായത്. വെള്ളിയാഴ്ച ന്യൂയോര്‍ക്കില്‍ നടന്ന പരിപാടിയില്‍ പ്രഭാഷണം നടത്തുന്നതിനു മുന്‍പാണ് സല്‍മാന്‍ റുഷ്ദിക്കു കുത്തേറ്റത്. ഷതൗക്വാ ഇന്‍സ്റ്റിറ്റിയൂട്ടിലെ പരിപാടിയില്‍ പ്രഭാഷണത്തിനായി അവതാരകന്‍ ക്ഷണിച്ചതിനു തൊട്ടുപിന്നാലെ ഒരാള്‍ സ്‌റ്റേജില്‍ കയറി റുഷ്ദിയെ കഴുത്തില്‍ കുത്തുകയായിരുന്നെന്നു ന്യൂയോര്‍ക്ക് പൊലീസ് അറിയിച്ചു. സ്‌റ്റേജില്‍ വീണ റുഷ്ദിയെ പ്രഥമശുശ്രൂഷകള്‍ക്കു ശേഷം ആശുപത്രിയിലേക്കു ഹെലികോപ്റ്ററില്‍ എത്തിച്ചു. ആരോഗ്യനില സംബന്ധിച്ച് കൃത്യമായ വിവരം പുറത്തുവന്നിട്ടില്ല.

അക്രമിയെ സംഭവസ്ഥലത്തുവച്ച് കാണികള്‍ പിടികൂടി പൊലീസില്‍ എല്‍പ്പിച്ചു. ഇന്ത്യന്‍ വംശജനായ ബ്രിട്ടിഷ് പൗരനാണ് എഴുപത്തഞ്ചുകാരനായ സല്‍മാന്‍ റുഷ്ദി.

'ദ് സാറ്റാനിക് വെഴ്‌സസ്' എന്ന പുസ്തകത്തിന്റെ പേരില്‍ 1980കളുടെ അവസാനം മുതല്‍ റുഷ്ദിക്കു വധഭീഷണിയുണ്ട്. 1988ല്‍ പുസ്തകം ഇറാനില്‍ നിരോധിച്ചു. റുഷ്ദിയെ കൊല്ലുന്നവര്‍ക്കു മൂന്നു മില്യന്‍ യുഎസ് ഡോളര്‍ പാരിതോഷികം ഇറാന്റെ പരമോന്നത നേതാവ് 1989 ഫെബ്രുവരി 14ന് പ്രഖ്യാപിച്ചിരുന്നു. 30 സെക്കന്‍ഡ്. എന്താണു സംഭവിക്കുന്നതെന്ന് സദസ്സിലും വേദിയിലും ഉള്ളവര്‍ക്ക് മനസിലാകും മുന്‍പേ അതു സംഭവിച്ചു. തുടര്‍ച്ചയായ കുത്തുകളേറ്റ് സല്‍മാന്‍ റുഷ്ദി കുഴഞ്ഞുവീണു. സ്‌റ്റേജിലേക്ക് ഓടിയെത്തിയവര്‍ അക്രമിയെ കീഴ്‌പ്പെടുത്തുകയും ചെയ്തു.

നഗരത്തില്‍നിന്ന് 90 കിലോമീറ്റര്‍ അകലെയാണു ഷത്വക്വ ഇന്‍സ്റ്റിറ്റിയൂഷന്‍. വിദ്യാഭ്യാസ, സാംസ്‌കാരിക പരിപാടികള്‍ നടത്തുന്ന ഈ സ്ഥാപനത്തില്‍ പ്രസംഗിക്കാനാണു റുഷ്ദി എത്തിയത്. റുഷ്ദി വേദിയിലെത്തി കസേരയിലിരുന്നതിനു തൊട്ടുപിന്നാലെയാണ് ആക്രമണം. സദസ്സിലിരുന്ന കറുത്ത വസ്ത്രം ധരിച്ച ഒരാള്‍ മിന്നല്‍വേഗത്തില്‍ സ്‌റ്റേജിലേക്കു പാഞ്ഞുകയറുകയായിരുന്നു.

രക്തത്തില്‍ കുളിച്ചു നിലത്തുവീണ റുഷ്ദിക്കു സ്‌റ്റേജില്‍ വച്ചുതന്നെ പ്രഥമ ശ്രുശ്രൂഷ നല്‍കി. സദസിലുണ്ടായ ഒരു ഡോക്ടറാണു പരിചരിച്ചത്. കഴുത്തിന്റെ വലതുവശത്ത് അടക്കം ശരീരത്തില്‍ ഒന്നിലധികം കുത്തേറ്റിരുന്നതായി ഡോക്ടര്‍ പറഞ്ഞു. അഞ്ചു മിനിറ്റിനകം അടിയന്തരസേവന വിഭാഗം എത്തിച്ച ഹെലികോപ്റ്ററിലാണു റുഷ്ദിയെ ആശുപത്രിയിലേക്കു കൊണ്ടുപോയത്.

എഴുത്തുകാര്‍ക്കും കലാപ്രവര്‍ത്തകര്‍ക്കും അഭയം നല്‍കുന്ന രാജ്യമായി യുഎസിനെ മാറ്റുന്നതു സംബന്ധിച്ച കാര്യങ്ങള്‍ ചര്‍ച്ച ചെയ്യുന്ന പരിപാടിയില്‍ പ്രസംഗിക്കാനാണു റുഷ്ദി ഷട്ടോക്വയില്‍ എത്തിയത്. 4000 പേര്‍ക്കിരിക്കാവുന്ന ഓഡിറ്റോറിയത്തിലായിരുന്നു ചടങ്ങ്. സാഹിത്യരംഗത്തുള്ള ഒരാള്‍ അമേരിക്കയില്‍ പൊതുവേദിയില്‍ അക്രമിക്കപ്പെടുന്നത് ഇതാദ്യമാണ്. വാക്കുകളുടെ പേരില്‍ ദശകങ്ങളോളം വേട്ടയാടപ്പെട്ടിട്ടും സല്‍മാന്‍ റുഷ്ദി പതറാതെ നിന്നു. അവസാനം പൊതുപരിപാടിയില്‍ കുത്തേറ്റു വീണു.