പ്രഭാഷണ പരിപാടിക്കിടെ കുത്തേറ്റ സല്‍മാന്‍ റുഷ്ദിയുടെ ആരോഗ്യനിലയില്‍ പുരോഗതി. വെന്റിലേറ്ററില്‍നിന്ന് മാറ്റി. ഡോക്ടര്‍മാരോട് സംസാരിച്ചു. തീവ്രപരിചരണ വിഭാഗത്തില്‍ തുടരും.

കഴുത്തിലും കൈഞരമ്പിനും സാരമായ മുറിവുണ്ട്. സംസാരിക്കാന്‍ ബുദ്ധിമുട്ടുണ്ടെന്നും ഒരു കണ്ണിന്റെ കാഴ്ച നഷ്ടപ്പെടാനായി സാധ്യതയുണ്ടെന്നുമാണ് റിപ്പോര്‍ട്ടുകള്‍. . പെന്‍സില്‍വാനിയ പെറിയിലെ ആശുപത്രിയില്‍ കഴിയുന്ന റുഷ്ദിക്ക് മികച്ച ചികിത്സ ലഭ്യമാക്കുന്നതായി ന്യൂയോര്‍ക്ക് ഗവര്‍ണര്‍ കാത്തി ഹൊക്കല്‍ പറഞ്ഞു.

അതേസമയം വെള്ളിയാഴ്ച ഇന്ത്യന്‍ സമയം രാത്രി എട്ടരയോടെ ഷതാക്വ ഇന്‍സ്റ്റിറ്റ്യൂട്ടില്‍ പ്രഭാഷണത്തിന് എത്തിയപ്പോഴാണ് റുഷ്ദിക്ക് കുത്തേറ്റത്. പിടിയിലായ അക്രമി ന്യൂജഴ്സി ഫെയര്‍വ്യൂ സ്വദേശി ഹാദി മറ്റര്‍ (24)പൊലീസ് കസ്റ്റഡിയിലാണ്.

കൊലക്കുറ്റത്തിന്‌കേസെടുത്തു. ഇറാനോടും തീവ്രവാദ ആശയങ്ങളോടും ആഭിമുഖ്യമുള്ളയാളാണെന്ന് തെളിയിക്കുന്ന ചില പോസ്റ്റുകള്‍ ഹാദി മറ്റര്‍ സമൂഹ മാധ്യമങ്ങളില്‍ പങ്കുവച്ചിട്ടുണ്ടായിരുന്നു. 1988ല്‍ പ്രസിദ്ധീകരിച്ച റുഷ്ദിയുടെ ദ സാത്താനിക് വേഴ്സസ് എന്ന നോവലാണ് ഏറെ വിവാദമായത്.

1989ല്‍ മതനിന്ദ ആരോപിച്ച് ഇറാന്‍ റുഷ്ദിയെ വധിക്കുന്നവര്‍ക്ക് പാരിതോഷികം പ്രഖ്യാപിച്ചിരുന്നു. മുമ്പ് ചില വധശ്രമങ്ങളില്‍നിന്ന് റുഷ്ദി രക്ഷപ്പെട്ടിരുന്നു.