ഓരോ ദിവസം കഴിയുന്തോറും, സാമ്പത്തികായി തകര്‍ന്നുകൊണ്ടിരിക്കുകയാണ് പാകിസ്ഥാന്‍. ലോകരാഷ്ട്രങ്ങള്‍ക്ക് കോടാനുകോടികളാണ് പാകിസ്ഥാന്‍ നല്‍കാനുള്ളത്. ഇതില്‍ വലിയ പങ്ക് ചൈനയുടേതാണ്. രാജ്യത്തിന്റെ വിദേശകരുതല്‍ ശേഖരം 7.8 ബില്യണ്‍ മാത്രമായാണ് നിലവില്‍ ചുരുങ്ങിയിരിക്കുന്നത്. ആണവ ശക്തിയായ ലോകത്തെ ഏക മുസ്ലീം രാജ്യമായതിനാല്‍ ഖത്തര്‍, യുഎഇ, സൗദി അറേബ്യ എന്നീ ഗള്‍ഫ് രജ്യങ്ങള്‍ ഇപ്പോള്‍ പാകിസ്ഥാനെ സഹായിക്കാന്‍ രംഗത്ത് വന്നിട്ടുണ്ട്. ചൈന രണ്ടടി പിന്നോട്ട് വച്ച സാഹചര്യത്തിലാണ് ഈ നീക്കം. മൂന്ന് ബില്യണ്‍ ഡോളറിന്റെ നിക്ഷേപമാണ് ഖത്തര്‍, പാകിസ്ഥാനില്‍ നടത്താന്‍ പോകുന്നത്. ഖത്തര്‍ ഇന്‍വസ്റ്റ്‌മെന്റ് അതോറിറ്റിയാണ് ഇക്കാര്യം പ്രഖ്യാപിച്ചിരിക്കുന്നത്. പാകിസ്ഥാന്‍ പ്രധാനമന്ത്രി ഷെഹബാസ് ഷെരീഫിന്റെ ദോഹ സന്ദര്‍ശനത്തിന് പിന്നാലെയയിരുന്നു ഖത്തറിന്റെ ഈ സഹായഹസ്തം. പാകിസ്ഥാനില്‍ ചില പ്രത്യേക നിക്ഷേപങ്ങള്‍ നടത്തുന്നതിന് ഖത്തര്‍ അമീറിനു താല്‍പര്യമുണ്ടെന്നാണ് അല്‍ ജസീറ പോലുള്ള മാദ്ധ്യമങ്ങളും റിപ്പോര്‍ട്ട് ചെയ്തിരിക്കുന്നത്. ഖത്തര്‍ പൗരന്മാര്‍ക്ക് പാകിസ്ഥാനില്‍ വസ്തുവകകള്‍ വാങ്ങുന്നതിനും വ്യവസായങ്ങള്‍ ആരംഭിക്കുന്നതിനും ഉള്ള സഹായങ്ങള്‍ ഒരുക്കാമെന്ന് പാക് ഭരണകൂടവും സമ്മതിച്ചിട്ടുണ്ട്. ഖത്തറിനു പുറമെ പാകിസ്ഥാനില്‍ വന്‍ നിക്ഷേപത്തിനൊരുങ്ങുന്ന മറ്റൊരു രാജ്യം യുഎഇ ആണ്. ഒരു ബില്യണ്‍ ഡോളറിന്റെ നിക്ഷേപത്തിനാണ് യുഎഇ തയ്യാറെടുക്കുന്നത്. വാതകം, ഊര്‍ജം, ആരോഗ്യം എന്നീ മേഖലകളിലാണ് യു.എ.ഇ നോട്ടമിട്ടിരിക്കുന്നത്.

സൗദി അറേബ്യയും ഒരു ബില്യണ്‍ ഡോളറിന്റെ വികസന പ്രവര്‍ത്തനങ്ങള്‍ പാകിസ്ഥാനില്‍ നടത്തുമെന്ന് ഇതിനകം തന്നെ പ്രഖ്യാപിച്ചു കഴിഞ്ഞിട്ടുണ്ട്. സൗദിപാക് വിദേശകാര്യമന്ത്രിമാര്‍ തമ്മിലുള്ള ചര്‍ച്ചയും ഇക്കാര്യത്തില്‍ നടന്നു കഴിഞ്ഞിട്ടുണ്ട്. ഇരു രാജ്യങ്ങള്‍ക്കും ഒരുപോലെ താല്‍പര്യമുള്ള ഒട്ടേറെ കാര്യങ്ങളില്‍ പരസ്പര സഹകരണത്തോടെ മുന്നോട്ടുപോകാനാണ് തീരുമാനം.

ഇപ്പോള്‍ പാക്കിസ്ഥാനെ സഹായിക്കാന്‍ രംഗത്തു വന്ന മൂന്ന് രാജ്യങ്ങളും ഇന്ത്യയുമായി ഏറെ അടുപ്പം പുലര്‍ത്തുന്ന രാജ്യങ്ങളാണ്. പാക്കിസ്ഥാനക്കാള്‍ അടുപ്പം ഇവര്‍ക്ക് ഇന്ത്യയോട് തന്നെയാണ്. ഇത്തരമൊരു സാഹചര്യത്തില്‍ ഇനി പാക്കിസ്ഥാന് ചൈന പറയുന്നത് മാത്രം കേട്ട് മുന്നോട്ട് പോകാന്‍ കഴിയുകയില്ല. ഇന്ത്യക്കെതിരായ ഏതൊരു പാക്ക് നീക്കത്തിലും ഇടപെടാനും പാക്കിസ്ഥാനെ സമ്മര്‍ദ്ദത്തിലാക്കാനും ഗള്‍ഫ് രാജ്യങ്ങള്‍ക്ക് കഴിയും. പുതിയ ഇടപാട് അതിനുള്ള 'ലൈസന്‍സ്' കൂടിയായി മാറുമെന്നാണ് നയതന്ത്ര വിദഗ്ദരും ചൂണ്ടിക്കാട്ടുന്നത്. ഗള്‍ഫ് രാജ്യങ്ങളുടെ ഇപ്പോഴത്തെ നീക്കത്തെ ചൈനയും സൂഷ്മം നിരീക്ഷിച്ചു വരികയാണ്. സാമ്പത്തിക സഹായത്തിന് നിയന്ത്രണം ഏര്‍പ്പെടുത്തിയെങ്കിലും ഇന്ത്യക്കെതിരായ നീക്കത്തിന് പാക്കിസ്ഥാനെ ചൈനയ്ക്ക് അനിവാര്യമാണ്. പാക്കിസ്ഥാനെ സംബന്ധിച്ചും ഒരു പ്രശ്‌നമുണ്ടായാല്‍ സൈനിക സഹായത്തിന് ചൈനയെ തന്നെയാണ് ആശ്രയിക്കേണ്ടിയും വരിക. പുതിയ സാഹചര്യത്തില്‍ അത് എത്രമാത്രം മുന്നോട്ട് പോകുമെന്നതാണ് ഇനി കണ്ടറിയേണ്ടത്.

പാക്കിസ്ഥാനില്‍ നിന്നും ഊറ്റാന്‍ ഇനി അധികം ബാക്കിയില്ലെന്ന യാഥാര്‍ത്ഥ്യം മനസ്സിലാക്കി കുടിയാണ് ചൈന തങ്ങളുടെ പാക് നിക്ഷേപം ഈ വര്‍ഷം 56 ശതമാനമായി വെട്ടിക്കുറച്ചിരിക്കുന്നത്. അപ്രതീക്ഷിതമായ ഈ നീക്കമാണ് ഗള്‍ഫ് രാജ്യങ്ങളുടെ സഹായം തേടാന്‍ പാക്കിസ്ഥാനെ പ്രേരിപ്പിച്ചിരിക്കുന്നത്. ഈ സഹായവും പാക്കിസ്ഥാനെ സംബന്ധിച്ച് വലിയ 'പാര' ആയാണ് ഇനി മാറാന്‍ പോകുന്നത്.