കണക്കുകൂട്ടലുകള്‍ പിഴച്ചതിന്റെ നിരാശയില്‍ ഇരിക്കുന്ന റഷ്യന്‍ ഭരണാധികാരി വ്‌ളാഡിമിര്‍ പുടിന് കൂടുതല്‍ നാണക്കേടുണ്ടാക്കി യുക്രെയിന്‍ മിസൈലുകളെ പേടിച്ച് ട്രഞ്ചിനകത്ത് കൂടി ഓടുന്ന റഷ്യന്‍ സൈനികരുടെ ദൃശ്യങ്ങള്‍ പുറത്തുവന്നു. ട്രഞ്ചിനകത്ത് സുരക്ഷിത സ്ഥാനങ്ങളില്‍ ഒളിക്കാന്‍ ജീവനും കൊണ്ടുള്ള പരക്കം പാച്ചിലായിരുന്നു അത്. രാജ്യത്തിന്റെ തെക്കന്‍ മേഖലയില്‍ റഷ്യയ്‌ക്കെതിരെയുള്ള ആക്രമണത്തിന് യുക്രെയിന്‍ ശക്തി വര്‍ദ്ധിപ്പിച്ച സാഹചര്യത്തിലാണിത്.

കിഴക്കന്‍ യുക്രെയിനിലെ ഇപ്പോള്‍ റഷ്യന്‍ നിയന്ത്രണത്തിലുള്ള ഡോണ്ട്‌സ്‌ക് വിമാനത്താവളത്തിനടുത്തു നിന്നുള്ള ഈ ദൃശ്യം ഡ്രോണ്‍ കാമറകളാണ് പകര്‍ത്തിയിരിക്കുന്നത്. ഈ പരക്കം പാച്ചിലിനിടയില്‍ മിസൈല്‍ വന്ന് പതിക്കുന്നതും അന്തരീക്ഷം മുഴുവന്‍ പുക കൊണ്ട് മൂടുന്നതും കാണാം. എന്നാല്‍, ആരെങ്കിലും കൊല്ലപ്പെട്ടുവോ എന്ന കാര്യത്തില്‍ വ്യക്തതയില്ല.

അതിനിടയില്‍, അവിടെ നിന്നും 300 മൈല്‍ ദൂരെയുള്ള ഖേര്‍സണില്‍ പാലങ്ങളും ആയുധ സംഭേണ ശാലകളും തങ്ങള്‍ നശിപ്പിച്ചതായി യുക്രെയിന്‍ അവകാശപ്പെട്ടു. കനത്ത പ്രത്യാക്രമണത്തിലൂടെ റഷ്യന്‍ കമാന്‍ഡ് പോസ്റ്റുകള്‍ തകര്‍ത്തതായും അവര്‍ അവകാശപ്പെടുന്നുണ്ട്. അതേസമയം ഖേര്‍സണില്‍ തങ്ങള്‍ തിരിച്ചടിച്ചതായും യുക്രെയിന്‍ സേനക്ക് കനത്ത നഷ്ടം വരുത്തിയതായും റഷ്യയും അവകാശപ്പെടുന്നുണ്ട്.

യുദ്ധത്തിനു മുന്‍പായി ഏകദേശം 3 ലക്ഷത്തോളം ജനസംഖ്യ ഉണ്ടായിരുന്ന ഖൃസണ്‍ കരിങ്കടല്‍ തീരത്തെ ഒരു സാമ്പത്തിക മേഖലയാണ്. കരിങ്കടലിലേക്ക് പ്രവേശിക്കുന്നതിനു യുക്രെയിനുള്ള ഒരു പ്രധാന മാര്‍ഗ്ഗം കൂടിയാണിത്. അതേസമയം റഷ്യന്‍ അതിര്‍ത്തിയില്‍ നിന്നും, 2014ല്‍ റഷ്യ പിടിച്ചടക്കിയ ക്രീമിയന്‍ മേഖലയിലേക്കുള്ള പ്രധാന വഴി ആയതിനാല്‍ റഷ്യയ്ക്കും ഏറെ പ്രാധാന്യമുള്ളതാണ് ഈ നഗരം. നിലവില്‍ റഷ്യന്‍ ആധിപത്യത്തിലുള്ള ഇവിടത്തെ പൗരന്മാരോട് റഷ്യന്‍ പൗരത്വം എടുക്കാന്‍ റഷ്യന്‍ സൈനികര്‍ ആവശ്യപ്പെട്ടതായി പാശ്ചാത്യ മാധ്യമങ്ങള്‍ റിപ്പോര്‍ട്ട് ചെയ്യുന്നു. യുക്രെയിന്‍ കറന്‍സി ഉപയോഗിക്കുന്നത് അവസാനിപ്പിക്കുവാനും സൈന്യം നിര്‍ബന്ധിക്കുകയാണത്രെ.

കഴിഞ്ഞ ഏതാനും ദിവസങ്ങളായി ഈ നഗരത്തില്‍ കനത്ത യുദ്ധമാണ് നടക്കുന്നത്. ഇരു കൂട്ടരും വിജയം അവകാശപ്പെടുന്നുണ്ട്. അതേസമയം, ഇപ്പോള്‍ ഖേര്‍സണില്‍ ആവശ്യത്തിന് സൈനികര്‍ റഷ്യക്കില്ല എന്ന് ബ്രിട്ടീഷ് ഇന്റലിജന്‍സ് റിപ്പോര്‍ട്ട് ചെയ്യുന്നു. മാത്രമല്ല, ആഹാരവും മറ്റും ലഭിക്കുന്നതിനും ബുദ്ധിമുട്ടുകള്‍ അനുഭവപ്പെടുന്നുണ്ട്. അതുകൊണ്ടു തന്നെ റഷ്യന്‍ സേനയെ ഇവിടെ പുനഃക്രമീകരിക്കുകയാണെന്നും അവര്‍ പറയുന്നു.