അമേരിക്കന്‍ വ്യോമസേനയുടെ കുന്തമുനയെന്ന വിശേഷണമുള്ള ചിനൂക്ക് ഹെവി ലിഫ്റ്റിംഗ് ഹെലികോപ്ടറുകളെ താത്കാലികമായി വിലക്കി അമേരിക്ക. 1960 മുതല്‍ അമേരിക്കന്‍ വ്യോമസേനയുടെ കരുത്തിന്റെ ഭാഗമായ ഇരട്ട പങ്കായമുള്ള കരുത്തന്‍ ഹെലികോപ്ടറുകളെ നിരന്തരം അപകടമുണ്ടാക്കുന്നതിനാലാണ് താത്കാലിക വിലക്ക് ഏര്‍പ്പെടുത്തിയത്. ഇന്ധന ചോര്‍ച്ചമുതല്‍ എഞ്ചിന്‍ തീപിടത്തം അടക്കമുള്ള അപകടങ്ങളെ തുടര്‍ന്നാണ് ഈ നടപടി. അപകടങ്ങളില്‍ ജീവഹാനി ഉണ്ടായില്ലെങ്കിലും മുന്‍കരുതല്‍ എന്ന നിലയ്ക്കാണ് ഈ നടപടി. നാനൂറോളം ചിനൂക്കുകള്‍ അമേരിക്കന്‍ വ്യോമസേനയില്‍ ഉണ്ടെന്നാണ് കരുതുന്നത്.

ചിനൂക്ക് ഹെലികോപ്ടറുകളില്‍ എഞ്ചിന്‍ തീപിടുത്തത്തിന് കാരണമായ ഇന്ധന ചോര്‍ച്ചയുടെ മൂലകാരണം കണ്ടെത്തിയെന്നും, ഈ പ്രശ്‌നം പരിഹരിക്കുന്നതിന് വേണ്ടിയാണ് ഇപ്പോള്‍ നടപടി സ്വീകരിച്ചതെന്നും ഔദ്യോഗികമായി അമേരിക്കന്‍ സൈന്യം വിശദീകരണം നല്‍കി. ഹെവിലിഫ്റ്റ് യൂട്ടിലിറ്റി ഹെലികോപ്റ്ററുകളായ ചിനൂക്കിനെ അധികനാള്‍ അകറ്റി നിര്‍ത്താന്‍ അമേരിക്കന്‍ സേനയ്ക്ക് കഴിയില്ല. ആറ് പതിറ്റാണ്ടായി സൈന്യത്തിന്റെ കുന്തമുനയാണ് ഈ കരുത്തന്‍. എയ്‌റോസ്‌പേസ് കമ്പനിയായ ബോയിംഗാണ് ചിനൂക്ക് നിര്‍മ്മിച്ചിരിക്കുന്നത്.

സൈനികര്‍, പീരങ്കികള്‍, ഉപകരണങ്ങള്‍, ഇന്ധനം എന്നിവ അതിവേഗം ഒരിടത്ത് നിന്നും മറ്റൊരിടത്തേക്ക് എത്തിക്കുവാനാണ് ചിനൂക്ക് ഉപയോഗിക്കുന്നത്. 22 രാജ്യങ്ങളില്‍ ചിനൂക്ക് ഇപ്പോഴും സേവനം നടത്തുന്നുണ്ട്. ഇന്ത്യന്‍ സൈന്യവും ചിനൂക്ക് ഹെലികോപ്ടറുകള്‍ ഉപയോഗിക്കുന്നുണ്ട്. 15 ചിനൂക്ക് ഹെലികോപ്ടറുകളാണ് ഇന്ത്യ സ്വന്തമാക്കിയിട്ടുള്ളത്. ലഡാക്ക്, സിയാച്ചിന്‍ മേഖലകളില്‍ ഉയരങ്ങളിലേക്ക് സൈനികര്‍ക്ക് ആവശ്യമായ വസ്തുക്കള്‍ എത്തിക്കുവാനും, ടാങ്ക്, പീരങ്കി തുടങ്ങിയ ഭാരമേറിയ ആയുധങ്ങള്‍ എത്തിക്കുവാനും ചിനൂക്ക് ഉപയോഗിക്കുന്നുണ്ട്. എയര്‍ലിഫ്റ്റ് ഓപ്പറേഷനുകള്‍ക്കുള്ള പ്രധാന സൈനിക ഉപകരണങ്ങളില്‍ ചിനൂക്ക് ഇതിനകം മാറിയിട്ടുണ്ട്. ചിനൂക്കിന്റെ കരുത്തില്‍ ആകൃഷ്ടമായി കൂടുതല്‍ ഹെലികോപ്ടറുകള്‍ വാങ്ങണമെന്ന ശുപാര്‍ശയും വ്യോമസേന സര്‍ക്കാരിന് മുന്‍പില്‍ അടുത്തിടെ വച്ചിരുന്നു. 2019 ഫെബ്രുവരിയിലാണ് ചിനൂക്ക് ഹെലികോപ്റ്ററുകളുടെ ആദ്യ ബാച്ച് ഇന്ത്യക്ക് ലഭിച്ചത്.