വെള്ളപ്പൊക്കത്തില്‍ പെട്ട് കിടക്കുന്ന പാകിസ്താന് കരകയറാന്‍ കൈത്താങ്ങാവാന്‍ ഒരുങ്ങി ഇന്ത്യ. അയല്‍ രാജ്യത്തേക്ക് സഹായം അയയ്ക്കുന്നത് ഇന്ത്യയുടെ പരിഗണനയിലുണ്ടെന്ന് ഉന്നത വൃത്തങ്ങള്‍ അറിയിച്ചു. ദുരിതം അനുഭവിക്കുന്ന രാജ്യങ്ങള്‍ക്ക് ഇന്ത്യ സഹായം എത്തിക്കുക പതിവാണ്. ഇത്തവണയും അത് തുടരുമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

പാകിസ്താനുള്ള സഹായം സംബന്ധിച്ച് ഒന്നോ രണ്ടോ ദിവസത്തിനുള്ളില്‍ തീരുമാനമുണ്ടാകുമെന്ന് ഉദ്യോഗസ്ഥര്‍ ചൂണ്ടിക്കാട്ടുന്നു. ഇന്ത്യയില്‍ നിന്ന് പച്ചക്കറി ഇറക്കുമതി ചെയ്യാന്‍ ലാഹോര്‍ ചേംബര്‍ ഓഫ് കൊമേഴ്‌സ് പാക് സര്‍ക്കാരിനോട് അനുമതി തേടിയിരുന്നു. വെള്ളപ്പൊക്കത്തില്‍ ആയിരക്കണക്കിന് ഏക്കര്‍ കൃഷി നശിച്ച സാഹചര്യത്തിലാണ് സഹായം എത്തിക്കാന്‍ അപേക്ഷ നല്‍കിയത്. അതേസമയം ഇന്ത്യയില്‍ നിന്ന് ഭക്ഷ്യവസ്തുക്കള്‍ ഇറക്കുമതി ചെയ്യുന്നതുമായി ബന്ധപ്പെട്ട് കൂടിയാലോചനകള്‍ നടക്കുകയാണെന്നും ഉടന്‍ നടപടി സ്വീകരിക്കുമെന്നും പാകിസ്താന്‍ ധനമന്ത്രി മിഫ്താ ഇസ്മായില്‍ പറഞ്ഞു.

കനത്ത മഴയും വെള്ളപ്പൊക്കവും മൂലം 1000 ത്തിലധികം ജീവനാണ് പാകിസ്താനില്‍ പൊലിഞ്ഞത്. നൂറ് കണക്കിന് വീടുകളും ഏക്കര്‍ കണക്കിന് കൃഷിയും നശിച്ചു. പാകിസ്താനില്‍ നടന്ന ദുതിരത്തില്‍ പ്രധാനമന്ത്രി നരേന്ദ്ര മോദി ദുഖം രേഖപ്പെടുത്തിയിരുന്നു. പാകിസ്താനില്‍ വെള്ളപ്പൊക്കം ഉണ്ടാക്കിയ നാശം കാണുമ്പോള്‍ സങ്കടമുണ്ട്. ഈ പ്രകൃതിദുരന്തത്തില്‍ ഇരയായവരുടെയും പരിക്കേറ്റവരുടെയും കുടുംബങ്ങള്‍ക്ക് ഞങ്ങള്‍ ഹൃദയംഗമമായ അനുശോചനം അറിയിക്കുന്നു. ഉടന്‍ സാധാരണ നിലയിലേക്ക് രാജ്യം മടങ്ങിയെത്തുമെന്ന് പ്രതീക്ഷിക്കുന്നു' എന്നാണ് പ്രധാനമന്ത്രി ട്വീറ്റ് ചെയ്തത്.