ഹര്‍കീവിലെ വിജയാവേശത്തില്‍ യുക്രെയ്ന്‍ സേന രാജ്യത്തിന്റെ തെക്കന്‍ മേഖലയില്‍ റഷ്യയ്‌ക്കെതിരെ തിരിച്ചടി ശക്തിപ്പെടുത്തിയതിനു പിന്നാലെ ജനവാസമേഖകളില്‍ റഷ്യ ആക്രമണം കടുപ്പിച്ചതായി യുക്രെയ്ന്‍. പ്രസിഡന്റ് വൊളോഡിമിര്‍ സെലെന്‍സ്‌കിയുടെ ജന്മനാടായ ക്രിവ്യി റി നഗരത്തിലെ കറാച്ചുന്‍ അണക്കെട്ട് ബുധനാഴ്ച വൈകിട്ട് റഷ്യ സൈന്യം തകര്‍ത്തെന്നും എട്ട് റഷ്യന്‍ ക്രൂസ് മിസൈലുകള്‍ ആക്രമണത്തിന് ഉപയോഗിച്ചെന്നും യുക്രെയ്ന്‍ വിദേശകാര്യ മന്ത്രാലയം അറിയിച്ചു.

അണക്കെട്ടും പമ്പിങ് സ്റ്റേഷനും തകര്‍ന്നതോടെ നഗരം വെള്ളത്തിലാണെന്നും സ്ഥിതി നിയന്ത്രണ വിധേയമാക്കാന്‍ കഠിന ശ്രമം തുടരുകയാണെന്നും യുക്രെയ്!ന്‍ പ്രസിഡന്റിന്റെ ഓഫിസ് ഡപ്യൂട്ടി മേധാവി കൈറിലോ ടിമോഷെങ്കോ അറിയിച്ചു. ''ആക്രമണത്തില്‍ അണക്കെട്ടിന് കാര്യമായ തകരാര്‍ ഉണ്ട്. സമീപപ്രദേശത്തെ പാലങ്ങളെല്ലാം ഒലിച്ചു പോയി. യുദ്ധത്തിനു മുന്‍പ് ,650,000 ആളുകള്‍ പാര്‍ത്തിരുന്ന നഗരത്തിലെ ഭൂരിഭാഗം കെട്ടിടങ്ങളിലും വെള്ളം കയറുകയാണ്''– ടിമോഷെങ്കോ പറഞ്ഞു.

ക്രിമിയയുടെ വടക്കുപടിഞ്ഞാറായി ഡൈനിപ്പര്‍ നദീമുഖത്തുള്ള നഗരമാണ് ക്രിവ്യി റി കരിങ്കടലിലേക്ക് തന്ത്രപരമായ പ്രവേശനം നല്‍കുന്ന ഖേഴ്‌സന്‍ നഗരത്തിന് ഏകദേശം 100 മൈല്‍ അകലെ വടക്കുകിഴക്കായാണ് സ്ഥിതി ചെയ്യുന്നത്.

തന്റെ ജന്‍മനാടിനെ കുറിച്ച് ഏറെ ആശങ്കയുണ്ടെന്ന് വ്യാഴാഴ്ച രാവിലെ പുറത്തുവിട്ട വിഡിയോയില്‍ സെലെന്‍സ്‌കി പറഞ്ഞു. ''ഖേഴ്‌സനിലെ യുക്രെയ്ന്‍ പ്രതിരോധത്തെ തകര്‍ക്കാനാണ് റഷ്യ അണക്കെട്ട് തകര്‍ത്തത്. ഹര്‍കീവിനു പിന്നാലെ ഖേഴ്‌സനിലും വന്‍ പ്രത്യാക്രമണം നേരിട്ടതോടെ പരിഭ്രാന്ത്രരായ റഷ്യന്‍ സൈന്യം ഖേഴ്‌സനിലെ യുക്രെയ്ന്‍ വിജയം വൈകിപ്പിക്കാന്‍ വേണ്ടിയാണ് കറാച്ചുന്‍ അണക്കെട്ട് ആക്രമിച്ചത്. അതി നീചമായ ആക്രമണമാണ് നടത്തിയത്. സാധാരണക്കാരെ കൂട്ടക്കൊല ചെയ്യുന്ന ഭീരുക്കളാണ് നിങ്ങള്‍. അതുകൊണ്ട് തന്നെയാണ് നിങ്ങള്‍ യുദ്ധത്തില്‍ പരാജയപ്പെടുന്നതും''– സെലെന്‍സ്‌കി പറഞ്ഞു.

യുദ്ധക്കളത്തില്‍നിന്ന് ഓടിയോളിക്കുന്ന ഭീരുക്കളായ റഷ്യന്‍ സൈനികര്‍ മറഞ്ഞിരുന്നു ജനവാസമേഖലകളില്‍ ക്രൂര ആക്രമണങ്ങള്‍ നടത്തുകയാണെന്നും സെലെന്‍സ്‌കി ആരോപിച്ചു. സെലെന്‍സ്‌കി സഞ്ചരിച്ച വാഹനം അപകടത്തില്‍പ്പെട്ടുവെന്ന വാര്‍ത്തകള്‍ക്കു പിന്നാലെയാണ് വിഡിയോ പുറത്തു വിട്ടത്. പ്രസിഡന്റിന്റെ പരുക്ക് ഗുരുതരമല്ലെന്ന് സെലെന്‍സ്‌കിയുടെ വക്താവ് സെര്‍ഗി നിക്കിഫോറോവ് ഫെയ്‌സ്ബുക്കിലൂടെ അറിയിച്ചു.

കൂടുതല്‍ സൈനികരെ എത്തിക്കാന്‍ കഴിയാതായതോടെ റഷ്യന്‍ സേന യുക്രെയ്‌നിന്റെ തെക്കന്‍ മേഖലയില്‍ നിന്ന് പിന്‍വാങ്ങിത്തുടങ്ങിയിരുന്നു, ടാങ്കുകളും കവചിത വാഹനങ്ങളും മറ്റു യുദ്ധസാമഗ്രികളും ഉപേക്ഷിച്ചു മടങ്ങുന്ന റഷ്യന്‍ സേന ചില സ്ഥലങ്ങളില്‍ നിഷ്‌കരുണം അവ പ്രയോഗിക്കുന്നതായി യുക്രെയ്ന്‍ ആരോപിക്കുന്നു. ക്രിവ്യി റിലെ വെള്ളപ്പൊക്കം ഖേഴ്‌സനിലെ പ്രത്യാക്രമണങ്ങളെ സാരമായി ബാധിക്കുമെന്നാണു യുക്രെയ്ന്‍ സൈന്യത്തിന്റെ വിലയിരുത്തല്‍. ഖേഴ്‌സനിന്റെ പ്രാന്തപ്രദേശങ്ങളിലും പ്രളയജലം എത്തിക്കഴിഞ്ഞു. റഷ്യന്‍ സൈന്യത്തെ പ്രതിരോധിക്കാന്‍ യുക്രെയ്ന്‍ സൈന്യം ഉപയോഗപ്പെടുത്തുന്ന തൂക്കുപാലങ്ങള്‍ക്ക് വെള്ളപ്പൊക്കത്തില്‍ വ്യാപകമായി നാശം സംഭവിക്കാന്‍ സാധ്യതയുണ്ടെന്നും വിലയിരുത്തപ്പെടുന്നു.