ലഡാക്കിലെ നിയന്ത്രണ രേഖയ്ക്ക് സമീപത്ത് നിന്ന് ചൈനീസ് സൈന്യം പിന്‍വാങ്ങിയെന്ന് വ്യക്തമാക്കുന്ന ഉപഗ്രഹ ചിത്രങ്ങള്‍ പുറത്ത്. ചൈനീസ് സൈന്യം അവരുടെ സ്ഥാനങ്ങളില്‍ നിന്ന് മൂന്ന് കിലോമീറ്റര്‍ പിന്നോട്ട് പോയതായി മാക്‌സര്‍ ടെക്‌നോളജീസിന്റെ ഉപഗ്രഹ ചിത്രങ്ങള്‍ വ്യക്തമാക്കുന്നു. 2020 മെയ് മാസത്തില്‍, ഇരു രാജ്യങ്ങളുടെയും സൈന്യങ്ങള്‍ തമ്മിലുള്ള സംഘര്‍ഷം വര്‍ദ്ധിച്ചപ്പോള്‍, ഇന്ത്യയും ചൈനയും തങ്ങളുടെ സൈനികരെ പട്രോളിംഗ് പോയിന്റ് 15 ന് സമീപം വിന്യസിച്ചിരുന്നു.

ഈ വര്‍ഷം ജൂലൈ 17 ന് ഇന്ത്യയും ചൈനയും തമ്മില്‍ നടന്ന കമാന്‍ഡര്‍ തല ചര്‍ച്ചകളില്‍ മേഖലയില്‍ നിന്ന് ഇരുവിഭാഗവും സൈന്യത്തെ പിന്‍വലിക്കാന്‍ തീരുമാനിച്ചിരുന്നു. ഇതനുസരിച്ച് സെപ്റ്റംബര്‍ 8 മുതല്‍ സൈന്യത്തെ പിന്‍വലിക്കല്‍ പ്രക്രിയ ആരംഭിച്ചു. സെപ്തംബര്‍ 13 ഓടെ അത് പൂര്‍ത്തിയായി. ഇനി ഇരു സൈന്യങ്ങളും ഈ പ്രദേശത്ത് പട്രോളിംഗ് നടത്തില്ല. 2020 ലെ ചൈനീസ് കടന്നുകയറ്റത്തിന് മുമ്ബ് ഇന്ത്യന്‍ സൈന്യം പട്രോളിംഗ് നടത്തിയിരുന്ന പ്രദേശമാണിത്.

2021 ഓഗസ്റ്റ് 12ന് ഗോഗ്രഹോട്ട് സ്പ്രിംഗ്‌സ് ഏരിയയില്‍ ഒരു ചൈനീസ് പോസ്റ്റ് ഉണ്ടായിരുന്നതായി ഉപഗ്രഹ ചിത്രങ്ങളില്‍ കാണാം. എന്നാല്‍ ഏറ്റവും പുതിയ ഉപഗ്രഹ ചിത്രത്തില്‍ ഈ പോസ്റ്റ് പൊളിച്ച് നീക്കിയത് വ്യക്തമാണ്. കെട്ടിടം പൊളിച്ചതിന്റെ അവശിഷ്ടങ്ങളും ഇവിടെ നിന്ന് നീക്കം ചെയ്തതായി ചിത്രങ്ങളില്‍ കാണാം. ഇവിടെ നിന്നും മൂന്ന് കിലോമീറ്റര്‍ ഉള്ളിലായി ചൈനയുടെ പോസ്റ്റ് കാണിക്കുന്ന ഉപഗ്രഹ ചിത്രങ്ങളും പുറത്തുവന്നിട്ടുണ്ട്.

കരാറിന്റെ ഭാഗമായി പട്രോള്‍ പോയിന്റ് 15ല്‍ നിന്നും 16ല്‍ നിന്നും ഇന്ത്യന്‍ സൈന്യം തങ്ങളുടെ പോസ്റ്റുകള്‍ നീക്കം ചെയ്തതായി ലഡാക്കിലെ പ്രാദേശിക കൗണ്‍സിലര്‍മാര്‍ പറയുന്നു. എന്നാല്‍ ഡല്‍ഹിയിലെ സൈനിക ഉദ്യോഗസ്ഥര്‍ ഇക്കാര്യം സ്ഥിരീകരിച്ചിട്ടില്ല.

2020 ഏപ്രില്‍മെയ് മാസങ്ങളില്‍ കിഴക്കന്‍ ലഡാക്കിന്റെ അതിര്‍ത്തി പ്രദേശങ്ങളില്‍ അഭ്യാസത്തിന്റെ പേരില്‍ ചൈന സൈന്യത്തെ വിന്യസിച്ചിരുന്നു. ഇതിന് പിന്നാലെ പലയിടത്തും നുഴഞ്ഞുകയറ്റ സംഭവങ്ങളുണ്ടായി. ഇന്ത്യയും ചൈനയ്ക്ക് തുല്യമായ സൈനികരെ ഈ മേഖലയില്‍ വിന്യസിച്ചു. ജൂണ്‍ 15ന് ഗാല്‍വാന്‍ താഴ്‌വരയില്‍ ചൈനീസ് സൈന്യവുമായുള്ള ഏറ്റുമുട്ടലില്‍ 20 ഇന്ത്യന്‍ സൈനികര്‍ വീരമൃത്യു വരിച്ചിരുന്നു.