യുദ്ധ ഭീതിക്കിടെ തായ്വാനെ തകര്‍ത്ത് മറ്റൊരു ദുരന്തം. തായ്വാന്റെ കിഴക്കന്‍ തീരത്ത് 6.6 തീവ്രത രേഖപ്പെടുത്തിയ ഭൂചലനമുണ്ടായി. യുഎസ് ജിയോളജിക്കല്‍ സര്‍വേയാണ് ഇക്കാര്യം അറിയിച്ചത്. രാത്രി 9:30 ന് ശേഷം തീരദേശ നഗരമായ ടൈറ്റുങ്ങില്‍ നിന്ന് 50 കിലോമീറ്റര്‍ വടക്ക് 10 കിലോമീറ്റര്‍ ആഴത്തിലാണ് ഭൂചലനം ഉണ്ടായതെന്ന് യുഎസ്ജിഎസ് പറയുന്നത്. ഇത് ജനവാസ മേഘലയിലല്ലെന്നുള്ളത് ആശ്വാസം നല്‍കുന്നു എങ്കിലും. മറ്റൊരു ദുരന്തം എപ്പോള്‍ വേണെങ്കിലും സംഭവിക്കാം എന്ന ഭയത്തിലാണ് ജനങ്ങള്‍. ചൈനയിലെ ഭൂകമ്പത്തിന്റെ കെട്ടടങ്ങും മുമ്പാണ് തായ്വാനെയും ഭൂകമ്പം വിറപ്പിക്കുന്നത്

രണ്ട് ടെക്‌റ്റോണിക് പ്ലേറ്റുകളുടെ ജംഗ്ഷനോട് ചേര്‍ന്ന് ദ്വീപ് സ്ഥിതി ചെയ്യുന്നതിനാല്‍ തായ്വാന്‍ പതിവായി ഭൂകമ്പങ്ങളാല്‍ ബാധിക്കപ്പെടുന്ന പ്രദേശമാണ്. റിക്ടര്‍ സ്‌കെയിലില്‍ 7.0 തീവ്രതയേക്കാള്‍ ശക്തമായ ഭൂകമ്പം ഉണ്ടായാല്‍ ദ്വീപില്‍ സുനാമി മുന്നറിയിപ്പും നല്‍കും. വളരെ അധികം ഭീതിയിയാണ് തായ്വാന്‍ ജനത ഇപ്പോള്‍. ഒരു ഭാഗത്ത് ചൈനയുടെ യുദ്ധ ഭീഷണി മറു ഭാഗത്ത് പ്രകൃതി ദുരന്തവും.

അതേസമയം പടിഞ്ഞാറന്‍ ചൈനയിലും കഴിഞ്ഞ ദിവസങ്ങളില്‍ ശക്തമായ ഭൂചലനം അനുഭവപ്പെട്ടിരുന്നു. ദുരന്തത്തില്‍ മരിച്ചവരുടെ എണ്ണം 93 എന്നാണ് ഏറ്റവും ഒടുവില്‍ റിപ്പോര്‍ട്ട് ചെയ്യപ്പെട്ടത്. എല്ലാ തരത്തിലും യുദ്ധത്തിനൊരുങ്ങി നിന്ന ചൈനയെ പിന്നോട്ട് വലിച്ചത് ഈ ദുരന്തമായിരുന്നു എന്ന റിപ്പോര്‍ട്ടും ഉണ്ട്. ശക്തമായ ചുഴലിക്കാറ്റും ചൈനയെ ഇപ്പോള്‍ വിടാതെ വേട്ടയാടുന്നുണ്ട്. എന്തായാലും ഭൂകമ്പമുണ്ടായാല്‍ എടുക്കേണ്ട മുന്‍ കരുതലുകളെ കുറിച്ച് കൃത്യമായ അവലോകനം സര്‍ക്കാര്‍ ജനങ്ങള്‍ക്ക് നല്‍കിയിട്ടുണ്ട് അതുപോലെ തന്നെ. യുദ്ധമുണ്ടായാല്‍ വേണ്ട മുന്‍ കരുതലുകളും അമേരിക്കയുടെ സഹായത്തോടെ തായ്വാന്‍ നടത്തി വരുന്നുണ്ട്.

യുദ്ധത്തിന്റെ പശ്ചാത്തലച്ചില്‍ ബില്യണ്‍ കണക്കിന് ഡോളര്‍ സൈനിക സഹായം തായ്വാന് നേരിട്ട് നല്‍കാന്‍ അമേരിക്കയും തീരുമാനിച്ചു കഴിഞ്ഞു. നേരിട്ട് സൈനിക സഹായം നല്‍കാന്‍ യുഎസ് സെനറ്റ് കമ്മറ്റി ആദ്യ നടപടി എടുത്തു കഴിഞ്ഞു. പതിറ്റാണ്ടുകളായി യുഎസ് തായ്‌വാന് ആയുധങ്ങള്‍ വിറ്റിട്ടുണ്ട്. എന്നാല്‍ പുതിയ നിയമനിര്‍മ്മാണത്തിന്റെ അടിസ്ഥാനത്തില്‍ നാല് വര്‍ഷത്തിനുള്ളില്‍ തായ്വാന് 4.5 ബില്യണ്‍ ഡോളര്‍ സുരക്ഷാ സഹായം നല്‍കികൊണ്ട് ഇരു രാജ്യങ്ങളും തമ്മിലുള്ള ബന്ധം മുന്നോട്ട് കൊണ്ടു പോകുമെന്ന് യുഎസ് വ്യക്തമാക്കി. തായ്വാന് സുരക്ഷ വര്‍ദ്ധിപ്പിക്കുന്ന അമേരിക്കയുടെ നിലപാട് ചൈനയെ വലിയ രീതിയില്‍ പ്രകോപിപ്പിക്കും.

ദ്വീപ് പിടിച്ചെടുക്കാന്‍ ശ്രമിച്ചാല്‍ ചൈനയ്‌ക്കെതിരെ ശക്തമായ ഉപരോധം തീര്‍ക്കാന്‍ തായ്വാന് അമേരിക്ക പിന്തുണ നല്‍കുന്നു. റഷ്യയുക്രെയ്ന്‍ സംഘര്‍ഷത്തിന് പിന്നാലെ യുഎസ് സ്പീക്കര്‍ നാന്‍സി പെലോസി തായ്വാന്‍ സന്ദര്‍ശിച്ചിരുന്നു. ചൈനയുടെ പ്രകോപനവും ഭീഷണിയും തുടരുന്നതിനിടെയാണ് നാന്‍സി പെലോസിയുടെ തായ്വാന്‍ സന്ദര്‍ശനം നടന്നത്. യുഎസ് സ്പീക്കറുടെ സന്ദര്‍ശനവും അമേരിക്കയുടെ പിന്തുണയും ചൈനയെ വളരെയധികം പ്രകോപിപ്പിച്ചിരുന്നു. പിന്നാലെ, തായ്വാന്‍ കടലിടുക്കില്‍ യുദ്ധവിമാനങ്ങള്‍ പറത്തി ചൈന ഭീഷണി മുഴക്കുന്നത് തുടരുകയാണ്. ഇതിനിടെയാണ് വീണ്ടും സുരക്ഷാ സഹായം നല്‍കാനുള്ള യുഎസ് തീരുമാനം.

തായ്വാന് സഹായം നല്‍കുന്നതിനുള്ള കമ്മറ്റിയെ നയിക്കുന്നത് ജോ ബൈഡന്റെ ഡെമോക്രാറ്റിക് പാര്‍ട്ടി അംഗമായ സെനറ്റര്‍ ബോബ് മെനെന്‍ഡസ് ആണ്. ചൈനയുമായി യുദ്ധത്തിനോ സംഘര്‍ഷങ്ങള്‍ വര്‍ദ്ധിപ്പിക്കാനോ തങ്ങള്‍ ശ്രമിക്കുന്നില്ല, എന്നാല്‍ ചൈനയുടെ കടന്നു കയറ്റങ്ങള്‍ നിരീക്ഷിക്കാന്‍ വ്യക്തമായ കണ്ണുകള്‍ ആവശ്യമാണെന്ന് സെനറ്റര്‍ ബോബ് പറഞ്ഞു. തായ്‌വാന്‍ നേരിടുന്ന ഭീഷണികളെ ശ്രദ്ധയോടെ വീക്ഷിക്കുകയും തന്ത്രപരമായി അതില്‍ ഇടപെടുകയും ചെയ്യും. ചൈനയ്ക്ക് ദ്വീപ് പിടിച്ചെടുക്കാന്‍ കഴിയാത്ത വിധം സുരക്ഷാം സംവിധാനങ്ങള്‍ തങ്ങള്‍ ഒരുക്കുമെന്നും അദ്ദേഹം പറയുന്നു.