നൂറ്റാണ്ടിന്റെ രാജപ്രതീകമായ എലിസബത്ത് രാജ്ഞിക്ക് വിട...... ലണ്ടനിലെ സെന്റ് ജോര്‍ജസ് ചാപ്പലിലെ രാജകീയ നിലവറയില്‍ ഭര്‍ത്താവ് ഫിലിപ്പ് രാജകുമാരനൊപ്പം രാജ്ഞിക്ക് അന്ത്യവിശ്രമം....


ഏഴ് പതിറ്റാണ്ടോളം രാജസിംഹാസനത്തിലിരുന്ന രാജ്ഞിയുടെ സംസ്‌കാരച്ചടങ്ങില്‍ രാജകുടുംബാംഗങ്ങള്‍, ബോറിസ് ജോണ്‍സണ്‍ ഉള്‍പ്പെടെ മുന്‍ ബ്രിട്ടീഷ് പ്രധാനമന്ത്രിമാര്‍, ഇന്ത്യയുടെ രാഷ്ട്രപതി ദ്രൗപദി മുര്‍മു, അമേരിക്കന്‍ പ്രസിഡന്റ് ജോ ബൈഡന്‍, ഫ്രഞ്ച് പ്രസിഡന്റ് മാക്രോണ്‍ തുടങ്ങിയവരടക്കം ലോകരാജ്യങ്ങളില്‍ നിന്നുള്ള പ്രമുഖര്‍ പങ്കെടുത്തു.


ബ്രിട്ടീഷ് പ്രധാനമന്ത്രി ലിസ് ട്രസ് അനുശോചനപ്രസംഗം നടത്തി.സെന്റ് ജോര്‍ജ് ചാപ്പലിലെ ചടങ്ങുകളില്‍ 800 അതിഥികള്‍ക്ക് മാത്രമായിരുന്നു ക്ഷണമുണ്ടായിരുന്നത്. രാജകീയ നിലവറയിലേക്ക് ഭൗതിക ശരീരം മാറ്റിയപ്പോള്‍ അടുത്ത കുടുംബാംഗങ്ങള്‍ ഉള്‍പ്പെടെ കുറച്ചുപേര്‍ക്കുമാത്രമായിരുന്നു പ്രവേശനം അനുവദിച്ചത്.

സെപ്തംബര്‍ 8ന് അന്തരിച്ച രാജ്ഞിയുടെ ഭൗതിക ശരീരം ബക്കിംഗ്ഹാം കൊട്ടാരത്തില്‍ നിന്ന് വിലാപയാത്രയായി എത്തിച്ച് ഇന്നലെവരെ വെസ്റ്റ്മിന്‍സ്റ്റര്‍ ഹാളില്‍ പൊതുദര്‍ശനത്തിന് വച്ചിരുന്നു. അവിടെ നിന്ന് ലോകനേതാക്കളും മറ്റും സന്നിഹിതരായിരുന്ന വെസ്റ്റ്മിന്‍സ്റ്റര്‍ ആബിയിലേക്ക് വിലാപയാത്രയായി എത്തിച്ചു. 142 റോയല്‍ നേവി അംഗങ്ങള്‍ ചേര്‍ന്ന് യാത്ര നിയന്ത്രിച്ചു.

8 കിലോമീറ്റര്‍ യാത്രയില്‍ 1600 സൈനികരും രാജകുമാരന്‍മാരായ വില്യവും ഹാരിയും അടക്കമുള്ള രാജകുടുംബാംഗങ്ങളും അനുഗമിച്ചു.ബ്രിട്ടീഷ് സമയം രാവിലെ പതിനൊന്നോടെ രാജ്ഞിയുടെ അന്ത്യാഭിലാഷപ്രകാരം പൈപ്പറില്‍ വിലാപഗാനം ആലപിച്ചുകൊണ്ടാണ് സംസ്‌കാരച്ചടങ്ങുകള്‍ തുടങ്ങിയത്. പ്രശസ്തമായ ബിഗ് ബെന്‍ ഓരോ മിനിട്ടിലും മുഴങ്ങിക്കൊണ്ടിരുന്നു.



രാജ്ഞിയുടെ വിവാഹത്തില്‍ ആലപിച്ച സ്തുതിഗീതങ്ങളും ചൊല്ലി. വെസ്റ്റ്മിന്‍സ്റ്റര്‍ ആബിയിലെ അന്ത്യശുശ്രൂഷകള്‍ക്കു ശേഷം വിലാപയാത്ര വെല്ലിംഗ്ടണ്‍ ആര്‍ച്ചിലെത്തി.ഭൗതിക ശരീരം അടങ്ങിയ പേടകം രാജകീയ നിലവറയിലേക്ക് മാറ്റുമ്പോഴുള്ള പ്രാര്‍ത്ഥനകള്‍ക്കും സമാപന ആശീര്‍വാദത്തിനും വെസ്റ്റ്മിന്‍സ്റ്റര്‍ ഡീന്‍, കാന്റര്‍ബറി ആര്‍ച്ച് ബിഷപ്പ് ഡോ. ജസ്റ്റിന്‍ വെല്‍ബി എന്നിവര്‍ മുഖ്യകാര്‍മ്മികത്വം വഹിച്ചു. പൊതുദര്‍ശനം അനുവദിച്ച കേന്ദ്രങ്ങളില്‍ ആയിരങ്ങളാണ് മണിക്കൂറുകളോളം കാത്തുനിന്ന് രാജ്ഞിക്ക് വിടചൊല്ലിയത്.