പ്രതിരോധമന്ത്രി രാജ്‌നാഥ് സിംഗ് ഈജിപ്ത്യൻ പ്രതിരോധമന്ത്രി ജനറൽ മുഹമ്മദ് സാക്കിയുമായി കൂടിക്കാഴ്ച നടത്തി. ഇരു രാജ്യങ്ങളും തമ്മിലുള്ള പ്രതിരോധ സഹകരണം സംബന്ധിച്ച ധാരണാപത്രത്തിലും ഒപ്പ് വെച്ചു. ഇരുമന്ത്രിമാരും ഉഭയകക്ഷി പ്രതിരോധ ബന്ധം അവലോകനം ചെയ്തു.

മൂന്ന് ദിവസത്തെ സന്ദർശനത്തിനായി ഇന്നലെയാണ് രാജ്‌നാഥ് സിംഗ് ഈജിപ്തിൽ എത്തിയത്. രണ്ടു രാജ്യങ്ങളും തമ്മിലുള്ള ഉഭയകക്ഷി-പ്രതിരോധ ഇടപെടലുകളും സൗഹൃദവും വികസിപ്പിക്കുകയാണ് സന്ദർശനത്തിന്റെ ലക്ഷ്യം. ഈജിപ്ത് പ്രതിരോധമന്ത്രി ജനറൽ മുഹമ്മദ് സാക്കിയുമായി കെയ്‌റോയിൽ വെച്ച് ഒരു മികച്ച കൂടിക്കാഴ്ച നടത്തി.

ഉഭയകക്ഷി പ്രതിരോധ ഇടപെടലുകൾ കൂടുതൽ വിപുലീകരിക്കുന്നതിനുള്ള നിരവധി സംരംഭങ്ങളെക്കുറിച്ച് ഞങ്ങൾ വിപുലമായ ചർച്ചകൾ നടത്തി. പ്രതിരോധ സഹകരണം സംബന്ധിച്ച ധാരണാപത്രം ഒപ്പിടുന്നത് നമ്മുടെ ബന്ധങ്ങൾക്ക് പുതിയ ഊർജവും ആവശവും നൽകുന്നുവെന്ന് സന്ദർശനത്തിന് ശേഷം രാജ്‌നാഥ് സിംഗ് ട്വിറ്ററിൽ കുറിച്ചു.

ഈജിപ്ഷ്യൻ പ്രസിഡന്റ് അബ്ദുൽ ഫത്താ അൽ-സിസിനെയും രാജ്‌നാഥ് സിംഗ് സന്ദർശിച്ചിരുന്നു. സൈനിക സഹകരണം കൂടുതൽ വിപുലമാക്കാനും സംയുക്ത പരിശീലനം, പ്രതിരോധ സഹ-നിർമ്മാണം സംബന്ധിച്ച വിഷയങ്ങളിൽ ശ്രദ്ധ കേന്ദ്രീകരിക്കാനും ഇരു നേതാക്കളും സമ്മതിച്ചിരുന്നു.

സൈനിക-സൈനിക ഇടപെടലുകൾ തീവ്രമാക്കുന്നതിനുള്ള പുതിയ സംരംഭങ്ങൾ പര്യവേക്ഷണം ചെയ്യും, ഇരു രാജ്യങ്ങളിലെയും പ്രതിരോധ വ്യവസായങ്ങൾ തമ്മിലുള്ള സഹകരണം ആഴത്തിലാക്കുന്നതിൽ ശ്രദ്ധ കേന്ദ്രീകരിക്കും. ഇന്ത്യയും ഈജിപ്തും തമ്മിലുള്ള പ്രതിരോധ സഹകരണം മെച്ചപ്പെടുത്തുന്നതിനുള്ള ധാരണാപത്രവും ഒപ്പുവെക്കും.

കഴിഞ്ഞ കുറച്ച് വർഷങ്ങളായി ഇന്ത്യയും ഈജിപ്തും തമ്മിലുള്ള പ്രതിരോധ-സുരക്ഷാ ബന്ധം ഉയർച്ചയിലാണ്. ജൂൺ 24 മുതൽ മൂന്ന് Su-30 MKI ജെറ്റുകളും രണ്ട് C-17 ട്രാൻസ്പോർട്ട് എയർക്രാഫ്റ്റുകളുമായി ഇന്ത്യൻ എയർഫോഴ്സ് ഈജിപ്തിൽ ഒരു മാസത്തെ 'Tactical Leadership Programme'ൽ പങ്കെടുത്തു.

ഇന്ത്യയുടെ തേജസ് വിമാനങ്ങളിൽ താൽപര്യം പ്രകടിപ്പിച്ച ആറ് രാജ്യങ്ങളിൽ ഈജിപ്തും ഉൾപ്പെട്ടിട്ടുണ്ടെന്ന് കഴിഞ്ഞ മാസം സർക്കാർ പാർലമെന്റിൽ പറഞ്ഞിരുന്നു. ഹിന്ദുസ്ഥാൻ എയ്‌റോനോട്ടിക്‌സ് ലിമിറ്റഡ് നിർമ്മിക്കുന്ന തേജസ്, ഉയർന്ന ഭീഷണിയുള്ള അന്തരീക്ഷത്തിൽ പ്രവർത്തിക്കാൻ കഴിവുള്ള ഒരു എഞ്ചിൻ മൾട്ടി-റോൾ യുദ്ധവിമാനമാണ്.

ഈജിപ്തിൽ ഇതുവരെ 3.15 ബില്യൺ ഡോളറിന്റെ നിക്ഷേപം ഇന്ത്യ നടത്തിയിട്ടുണ്ട്. ആകാശ് മിസൈൽ സംവിധാനം ഉൾപ്പെടെ ഇന്ത്യ നിർമ്മിക്കുന്ന ആയുധങ്ങൾ വാങ്ങാൻ നേരത്തെ ഈജിപ്ത് താല്പര്യം പ്രകടിപ്പിച്ചിരുന്നു. 1960 മുതൽ 1984 വരെ ഇന്ത്യൻ വൈമാനികരാണ് ജനറൽ മുഹമ്മദ് സാക്കിയുടെ ഈജിപ്തിലെ വ്യോമസേനാ അംഗങ്ങളെ പരിശീലിപ്പിച്ചിരുന്നത്.