ട്രംപ് ഭരണകൂടത്തിന്റെ ഏജൻസിയുടെ പുനഃസംഘടന ദുരന്ത പ്രതികരണത്തെ തളർത്തുമെന്ന് മുന്നറിയിപ്പ് നൽകി തുറന്ന കത്തിൽ ഒപ്പിട്ട 20 ലധികം ജീവനക്കാരെ ഫെഡറൽ എമർജൻസി മാനേജ്‌മെന്റ് ഏജൻസി (ഫെമ) ചൊവ്വാഴ്ച സസ്‌പെൻഡ് ചെയ്തു.

"കത്രീന പ്രഖ്യാപനം" എന്ന് പേരിട്ടിരിക്കുന്ന കത്തിൽ, ഫെമയിലെ നിലവിലുള്ളതും മുൻകാല ജീവനക്കാരുമായ 191 പേർ ഒപ്പുവച്ചു. 35 പേർ മാത്രമാണ് അവരുടെ പേരുകൾ വെളിപ്പെടുത്തിയത്, ബാക്കിയുള്ളവർ പ്രതികാര നടപടി ഭയന്ന് അജ്ഞാതരായി തുടർന്നു. പ്രസിഡന്റ് ഡൊണാൾഡ് ട്രംപും ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോയമും ഫെമയുടെ അധികാരം ദുർബലപ്പെടുത്തി, യോഗ്യതയില്ലാത്ത നേതാക്കളെ നിയമിച്ചു, ദുരന്തനിവാരണത്തിന് നിർണായകമായ വിഭവങ്ങൾ വെട്ടിക്കുറച്ചു എന്നൊക്കെ പ്രസ്താവനയിൽ ആരോപിച്ചു. രാഷ്ട്രീയ ഇടപെടലുകളിൽ നിന്ന് ഏജൻസിയെ സംരക്ഷിക്കണമെന്ന് കോൺഗ്രസിനോട് ആവശ്യപ്പെട്ടു.

ചൊവ്വാഴ്ച രാത്രി, സ്വന്തം പേരുകൾ ഒപ്പിട്ട ചില ജീവനക്കാർക്ക് "ഉടൻ പ്രാബല്യത്തിൽ" ശമ്പളത്തോടുകൂടിയ അഡ്മിനിസ്ട്രേറ്റീവ് അവധിയിൽ പ്രവേശിച്ചതായി അറിയിച്ചുകൊണ്ട് ഇമെയിലുകൾ ലഭിച്ചു. ഫെമ സൗകര്യങ്ങൾ, ഏജൻസി സംവിധാനങ്ങൾ അല്ലെങ്കിൽ ഔദ്യോഗിക ചുമതലകൾ എന്നിവയിൽ നിന്ന് ജീവനക്കാരെ വിലക്കിയിട്ടുണ്ടെന്നും എന്നാൽ ബിസിനസ്സ് സമയങ്ങളിൽ അവർ ഇപ്പോഴും ലഭ്യമാകുമെന്ന് പ്രതീക്ഷിക്കുന്നതായും സന്ദേശങ്ങളിൽ പറയുന്നു. ഈ നീക്കം "അച്ചടക്കലംഘനമല്ല" എന്ന് ഊന്നിപ്പറയുന്നെങ്കിലും ഈ ലീവ് എന്തിനു എന്ന് ഒരു കാരണം നൽകിയിട്ടില്ല.

യുഎസ് ചരിത്രത്തിലെ ഏറ്റവും മാരകവും ചെലവേറിയതുമായ ദുരന്തങ്ങളിലൊന്നായ കത്രീന ചുഴലിക്കാറ്റിന്റെ 20-ാം വാർഷികം ആഘോഷിക്കുന്നതിനിടയിലാണ് ഈ സസ്പെൻഷനുകൾ വരുന്നത്. ആ ദുരന്തത്തിൽ നിന്ന് പിറന്ന പല പരിഷ്കാരങ്ങളും ഇപ്പോൾ പൊളിച്ചുമാറ്റപ്പെടാനുള്ള സാധ്യതയുണ്ടെന്ന് കത്തിൽ മുന്നറിയിപ്പ് നൽകി.

ട്രംപ് ഭരണകൂടം ഫെമയിൽ സമൂലമായ മാറ്റങ്ങൾ നിർദ്ദേശിച്ചിട്ടുണ്ട്, ഉത്തരവാദിത്തങ്ങൾ സംസ്ഥാനങ്ങളിലേക്ക് മാറ്റുന്നതും "ഫെമയെ ഒഴിവാക്കുന്നതും" ഉൾപ്പെടെ. പിരിച്ചുവിടലുകളിലൂടെ ഈ വർഷം ഏജൻസിയുടെ മൂന്നിലൊന്ന് ജീവനക്കാരെയും ഇതിനകം നഷ്ടപ്പെട്ടു.