ഇറാനിൽ സംഘർഷം രൂക്ഷമായിക്കൊണ്ടിരിക്കുകയാണ്, മരണസംഖ്യ 2,000 കവിഞ്ഞതായി ആക്ടിവിസ്റ്റുകൾ റിപ്പോർട്ട് ചെയ്യുന്നു. പ്രതിഷേധക്കാരുടെ കൊലപാതകത്തെക്കുറിച്ച് യുഎസ് പ്രസിഡന്റ് ഡൊണാൾഡ് ട്രംപ് ഇറാൻ ഭരണകൂടത്തിന് മുന്നറിയിപ്പ് നൽകി, പ്രതിഷേധങ്ങൾ തുടരാൻ ജനങ്ങളോട് ആഹ്വാനം ചെയ്തുകൊണ്ട് "സഹായം ലഭിക്കുമെന്ന്" അദ്ദേഹം ഉറപ്പുനൽകി. പ്രതിഷേധക്കാരെ വധിക്കുന്നതിനെതിരെ ടെഹ്‌റാനിലെ ദിവ്യാധിപത്യ ഭരണകൂടത്തിന് യുഎസ് നേതാവ് മുന്നറിയിപ്പ് നൽകി, ഇറാന്റെ അധികാരികൾ ഭീഷണിപ്പെടുത്തിയ തൂക്കിക്കൊല്ലലുമായി മുന്നോട്ട് പോയാൽ യുഎസ് "വളരെ ശക്തമായ നടപടി" സ്വീകരിക്കുമെന്ന് പറഞ്ഞു.

വ്യാപകമായ ഭരണവിരുദ്ധ പ്രകടനങ്ങളുമായി ബന്ധപ്പെട്ട് കൂട്ട അറസ്റ്റുകൾ ഉണ്ടായതിനെത്തുടർന്ന് ഇറാൻ ഇന്ന് ആദ്യ പ്രതിഷേധക്കാരനെ വധശിക്ഷയ്ക്ക് വിധേയനാക്കുമെന്ന് റിപ്പോർട്ട്. തലസ്ഥാനമായ ടെഹ്‌റാനിനടുത്തുള്ള കരാജിൽ കഴിഞ്ഞയാഴ്ച നടന്ന പ്രതിഷേധത്തിനിടെ അറസ്റ്റിലായ 26 കാരനായ എർഫാൻ സോൾട്ടാനിയെ (Erfan Soltani) ശരിയായ വിചാരണ ലഭിക്കാതെ തൂക്കിലേറ്റാൻ പോകുകയാണെന്ന് മനുഷ്യാവകാശ സംഘടനകൾ പറയുന്നു.

അതേസമയം, ഇറാനിയൻ സർക്കാർ ചില നിയന്ത്രണങ്ങളിൽ ഇളവ് വരുത്തി, ദിവസങ്ങൾക്ക് ശേഷം ആദ്യമായി വിദേശത്തേക്ക് ഫോൺ വിളിക്കാൻ ആളുകളെ അനുവദിച്ചു. വിദേശത്ത് ഫോൺ വിളിക്കാൻ അവർക്ക് കഴിഞ്ഞെങ്കിലും, രാജ്യത്തിന് പുറത്തുള്ള ആളുകൾക്ക് അവരെ വിളിക്കാൻ കഴിഞ്ഞില്ല എന്നാണ് റിപ്പോർട്ട്.

ഇറാനിലെ ആശയവിനിമയ തടസ്സങ്ങൾക്കിടയിൽ, എലോൺ മസ്‌കിന്റെ സ്‌പേസ് എക്‌സ് രാജ്യത്ത് സൗജന്യ സ്റ്റാർലിങ്ക് സാറ്റലൈറ്റ് സേവനം വാഗ്ദാനം ചെയ്തതായി റിപ്പോർട്ട്. ഇറാനിൽ സ്റ്റാർലിങ്ക് സബ്‌സ്‌ക്രിപ്‌ഷൻ ഫീസ് സ്‌പേസ് എക്‌സ് ഒഴിവാക്കിയതിനാൽ, രാജ്യത്ത് റിസീവറുകളുള്ള ആളുകൾക്ക് പണം നൽകാതെ തന്നെ സേവനം ആക്‌സസ് ചെയ്യാൻ കഴിയുമെന്ന് ഇറാനികളുമായി ചേർന്ന് പ്രവർത്തിക്കുന്ന യുഎസ് ഗ്രൂപ്പായ ഹോളിസ്റ്റിക് റെസിലിയൻസിന്റെ എക്‌സിക്യൂട്ടീവ് ഡയറക്ടർ അഹമ്മദ് അഹ്മദിയൻ പറഞ്ഞു.

അതേസമയം, ഇറാനിൽ പൊട്ടിപ്പുറപ്പെടുന്ന പ്രതിഷേധങ്ങളെക്കുറിച്ച് ചർച്ച ചെയ്യാൻ വൈറ്റ് ഹൗസ് പ്രതിനിധി സ്റ്റീവ് വിറ്റ്കോഫ് ഇറാന്റെ നാടുകടത്തപ്പെട്ട മുൻ കിരീടാവകാശി റെസ പഹ്‌ലവിയുമായി വാരാന്ത്യത്തിൽ രഹസ്യമായി കൂടിക്കാഴ്ച നടത്തിയതായി ഒരു മുതിർന്ന യുഎസ് ഉദ്യോഗസ്ഥനെ ഉദ്ധരിച്ച് റിപോർട്ടുകൾ ഉണ്ട്.