ഇറാന്‍ യുദ്ധം ഉടന്‍ അവസാനിക്കുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. ഇറാനില്‍ ലക്ഷ്യമിടാന്‍ ഇനി കാര്യമായതൊന്നും ബാക്കിയില്ലെന്നും ട്രംപ് അവകാശപ്പെട്ടു. അമേരിക്കന്‍ മാധ്യമത്തിന് നല്‍കിയ ഫോണ്‍ അഭിമുഖത്തിലാണ് ട്രംപ് ഇത്തരത്തിലുള്ള പ്രസ്താവന നടത്തിയത്.'എപ്പോള്‍ വേണമെങ്കിലും ഇത് അവസാനിപ്പിക്കാന്‍ എനിക്ക് കഴിയും, അത് അവസാനിക്കും' അദ്ദേഹം അഭിമുഖത്തില്‍ പറഞ്ഞു.

'യുദ്ധം വളരെ നല്ല രീതിയില്‍ മുന്നോട്ട് പോകുന്നു. നിശ്ചയിച്ച സമയപരിധിയേക്കാള്‍ ഞങ്ങള്‍ മുന്നിലാണ്. ആറു ആഴ്ചത്തേക്കാണ് യുദ്ധം നീണ്ടുപോകുമെന്ന് കരുതിയത്. ഈ യഥാര്‍ത്ഥ കാലയളവിലുണ്ടാകുമെന്ന് വിചാരിച്ചതിലും കൂടുതല്‍ നാശനഷ്ടങ്ങള്‍ ഇപ്പോള്‍ വരുത്തിയിട്ടുണ്ട്' ട്രംപ് പറഞ്ഞു.

ഇറാന്‍ ഇസ്രായേലിനെയും യുഎസിനെയും ഭീഷണിപ്പെടുത്തുക മാത്രമല്ല, മറ്റ് പശ്ചിമേഷ്യന്‍ രാജ്യങ്ങളെയും ലക്ഷ്യമിടുകയായിരുന്നുവെന്നും ട്രംപ് പറഞ്ഞു. 47 വര്‍ഷത്തെ ചെയ്തികള്‍ക്ക് അവര്‍ വില നല്‍കുകയാണ്. ഇത് തിരിച്ചടിയാണ്. അവര്‍ക്ക് അത്ര എളുപ്പത്തില്‍ രക്ഷപ്പെടാന്‍ കഴിയില്ലെന്നും ട്രംപ് വ്യക്തമാക്കി.

ഇറാന്റെ സൈനിക ശേഷിയും ആണവ പദ്ധതിയും തകര്‍ക്കുക എന്ന ലക്ഷ്യത്തോടെ അമേരിക്കയും ഇസ്രായേലും ഇറാനില്‍ നടത്തിയ ആക്രമണത്തോടെയാണ് യുദ്ധം ആരംഭിച്ചത്. രണ്ടാഴ്ച പിന്നിടുമ്പോഴാണ് യുദ്ധം അവസാനിക്കാന്‍ പോകുന്നുവെന്ന ട്രംപിന്റെ പ്രസ്താവന. എപ്പോള്‍ വേണമെങ്കിലും അവസാനിപ്പിക്കാന്‍ കഴിയുമെന്ന് ട്രംപ് നേരത്തെയും പറഞ്ഞിട്ടുണ്ട്.