ഹോര്‍മുസ് കടലിടുക്കു തുറക്കാന്‍ വ്യവസ്ഥ ചെയ്യുന്ന ധാരണാപത്രത്തിന് ഇറാനുമായി ഏതാണ്ടു കരാറായെന്ന് യുഎസ് പ്രസിഡന്റ് ഡോണള്‍ഡ് ട്രംപ് പറഞ്ഞു. ധാരണാപത്രം അവസാനഘട്ട ചര്‍ച്ചയിലാണെന്നും ഉടന്‍ പ്രഖ്യാപനമുണ്ടാകുമെന്നും ട്രംപ് സമൂഹമാധ്യമത്തിലൂടെ അറിയിച്ചു. കരാറിലെ മറ്റു കാര്യങ്ങള്‍ ട്രംപ് വെളിപ്പെടുത്തിയില്ലെങ്കിലും ഇറാനെതിരായ നാവിക ഉപരോധം അവസാനിപ്പിക്കാനും മുഖ്യതര്‍ക്കവിഷയമായ ഇറാന്റെ സമ്പുഷ്ടീകരിച്ച യുറേനിയം ശേഖരം സംബന്ധിച്ച് രണ്ടുമാസത്തിനകം ചര്‍ച്ച ചെയ്തു തീരുമാനിക്കാനും ധാരണയായെന്നു റിപ്പോര്‍ട്ടുണ്ട്.

ഹോര്‍മുസ് കടലിടുക്കില്‍ കപ്പലുകള്‍ക്ക് ചുങ്കം ഏര്‍പ്പെടുത്തില്ലെന്ന് ഇറാന്‍ സമ്മതിച്ചതായും സൂചനയുണ്ട്. പകരം ഇറാന്റെ എണ്ണവ്യാപാരത്തിനെതിരായ ചില ഉപരോധങ്ങള്‍ പിന്‍വലിക്കാന്‍ യുഎസും സമ്മതിച്ചു. ഇറാനുമേല്‍ വീണ്ടുമൊരാക്രമണം ഉണ്ടാവില്ലെന്നും കരടുധാരണാപത്രത്തില്‍ വ്യവസ്ഥ ചെയ്യുന്നു.

ഖത്തര്‍, യുഎഇ, സൗദി, ജോര്‍ദാന്‍, ഈജിപ്ത്, തുര്‍ക്കി, പാക്കിസ്ഥാന്‍ എന്നീ രാഷ്ട്രനേതാക്കളുമായി ശനിയാഴ്ച ട്രംപ് ഫോണില്‍ സംസാരിച്ചിരുന്നു. ധാരണാപത്രം അംഗീകരിക്കാന്‍ ട്രംപിനോട് അവര്‍ ആവശ്യപ്പെട്ടെന്നാണു വിവരം. ധാരണാപത്രം ഇരുപക്ഷവും ശരിവച്ചാല്‍ വിശദമായ സമാധാനക്കരാറിനുവേണ്ടിയുള്ള യുഎസ്–ഇറാന്‍ തുടര്‍ചര്‍ച്ചകളും പാക്ക് മധ്യസ്ഥതയില്‍ ഉടന്‍ നടത്താമെന്നു പ്രധാനമന്ത്രി ഷഹബാസ് ഷെരീഫ് പറഞ്ഞു.