പലസ്‌തീന്‍ വിമോചന നേതാവ്‌ യാസര്‍ അറാഫത്തിനെ മാരക വിഷം നല്‍കി കൊലപ്പെടുത്തുകയായിരുന്നു എന്ന്‌ പരിശോധനാ ഫലം. അറാഫത്തിന്റെ ഭൗതികാവശിഷ്ടങ്ങള്‍ പുറത്തെടുത്തു നടത്തിയ പരിശോധനയിലാണ് ഇക്കാര്യം തെളിഞ്ഞത്. പരിശോധനയില്‍ അണുവികിരണ മൂലകമായ പൊളോണിയത്തിന്റെ അംശം ഉയര്‍ന്ന അളവില്‍ കണ്ടെത്തി.

അറാഫത്തിന്റെ വിധവ സുഹ അറാഫത്താണ്‌ ഇക്കാര്യം വെളിപ്പെടുത്തി രംഗത്തുവന്നത്. സ്വിസ് ഗവേഷകരുടെ പഠനത്തെ അടിസ്ഥാനമാക്കിയാണ് സുഹ അറാഫത്ത് ഇത് സംബന്ധിച്ച് സ്ഥിരീകരണം നല്‍കിയത്. പരിശോധനയുടെ ഫലം ഉള്‍പ്പെട്ട 108 പേജുവരുന്ന റിപ്പോര്‍ട്ട് സുഹയ്ക്കു നല്‍കിയതായി അല്‍ജസീറ റിപ്പോര്‍ട്ട് ചെയ്യുന്നു. മരണം സ്വാഭാവികമല്ലെന്നും അദ്ദേഹത്തിനു നിരവധി ശത്രുക്കളുണ്ടായതായും സുഹ പറയുന്നു.

2004 നവംബര്‍ 11 ന്‌  തടവറയില്‍ കിടക്കുമ്പോഴാണ് അറാഫത്ത് മരിച്ചത്. ഭക്ഷണം കഴിച്ച അറാഫത്ത് ഛര്‍ദ്ദിക്കുകയും തുടര്‍ന്ന് അദ്ദേഹത്തിന്റെ നില ഗുരുതരമാവുകയായിരുന്നു. പാരീസിലെ സൈനിക ആശുപത്രിയില്‍വെച്ചായിരുന്നു അറഫാത്ത്‌ മരണത്തിന്‌ കീഴടങ്ങിയത്‌.

രക്തത്തിലെ അണുബാധയാണ്‌ മരണത്തിന്‌ കാരണമായത്‌ എന്നാണ്‌ ആശുപത്രി രേഖ. എന്നാല്‍ അറാഫത്തിന്റെ ശരീരത്തില്‍ പൊളോണിയത്തിന്റെ സാന്നിധ്യമുണ്ടെന്ന്‌ കണ്ടെത്തുകയായിരുന്നു. അല്‍ജസീറ ടെലിവിഷനാണ്‌ ഇക്കാര്യം പുറത്തുവിട്ടത്‌.