മൈസൂരു - ചെന്നൈ വന്ദേ ഭാരത് ട്രെയിനിലെ യാത്രക്കാരനു നല്‍കിയ വൈകിട്ടത്തെ ലഘുഭക്ഷണത്തില്‍ ഫെവിക്വിക്ക് പശയുടെ ട്യൂബ്. ചായയ്‌ക്കൊപ്പം നല്‍കിയ പരിപ്പ് വടയ്ക്കുള്ളിലാണ് ട്യൂബ് കണ്ടെത്തിയത്. വട കടിച്ചപ്പോള്‍ അസ്വാഭാവികത തോന്നി പരിശോധിച്ചപ്പോഴാണ് ഇതു കണ്ടതെന്നും ഭാഗ്യം കൊണ്ടാണ് താന്‍ ഇതു വിഴുങ്ങാതിരുന്നതെന്നും യാത്രക്കാരന്‍ പറഞ്ഞു. ഐആര്‍സിടിസിക്കും പരാതി നല്‍കിയതോടെ, അന്വേഷണം നടത്തുമെന്നും കുറ്റക്കാര്‍ക്കെതിരെ നടപടി സ്വീകരിക്കുമെന്നും റെയില്‍വേ അധികൃതര്‍ അറിയിച്ചതായും യാത്രക്കാരന്‍ പറഞ്ഞു.

ട്രെയിന്‍ നമ്പര്‍ 20608 ല്‍ യാത്ര ചെയ്ത ലയണ്‍സ് ക്ലബ് ഡിസ്ട്രിക്റ്റ് 3241 ഇ അംഗങ്ങള്‍ക്കാണ് ദുരനുഭവം ഉണ്ടായത്. വൈകിട്ട് 3 മണിയോടെ ട്രെയിനില്‍ ലഘുഭക്ഷണം വിതരണം ചെയ്തപ്പോഴാണ് സംഭവം നടന്നതെന്ന് യാത്രക്കാരനായ ഡോ. സത്യമൂര്‍ത്തി ബാലസുബ്രഹ്മണ്യം പറഞ്ഞു. സംഘത്തിലുണ്ടായിരുന്ന ഡി. ശേഖര്‍ എന്ന യാത്രക്കാരന്‍ പരിപ്പുവട കഴിക്കാന്‍ കടിച്ചപ്പോഴാണ് ഉള്ളില്‍ ഒളിഞ്ഞിരുന്ന ഫെവിക്വിക് ട്യൂബ് കണ്ടത്. കടിച്ചയുടന്‍ ട്യൂബ് പൊട്ടുകയും പശ ശേഖറിന്റെ വായിലേക്ക് പടരുകയും ചെയ്തു. ഉടന്‍ അദ്ദേഹം ഇത് വായ്ക്കകത്തുനിന്നും നീക്കം ചെയ്തതിനാല്‍ വലിയ അപകടം ഒഴിവായി.